Bikolwa 3
3
Okutambwa kwa musaiza ondema omusabiirya
1Ekiro kimwei oPeetero nʼoYokaana ni batembatemba okwaba omwiramyo oku saawa mwendai eza igolo, esaawa eya kusabiramu. 2Waalowo omusaiza eyaali ondema okuligira kimwei niyabyaliibwe. Buli kiro baamutanga awo oku lwige olwayetebwanga Olusai okusabiirya empiiya oku bantu abaingiranga omu mbuga za iramyo. 3Niyaboine oPeetero nʼoYokaana nibakwaba okwingira omwiramyo, nʼabasaba empiiya. 4OPeetero nʼoYokaana nibamuwanga amaiso, oPeetero nʼamukoba ati, “turoleere.” 5Nikwo okubaroleera, nakusuubira nti babbaaku kyebakumuweerya.
6Baitu oPeetero nʼamukoba ati, “Efeeza nʼezaabbu tindina nʼakadooli, baitu kyendina nikyo nakuweerya. Omwibara rya Yesu Kurisito oMunazaaleesi, tambula.” 7Awo nʼamukwata omukono gwamwe ogulyo nʼamwimula. Amangu ago amagulu gaamwe nʼobukongoizole ni biiramu amaani. 8Nʼaimuka amangu ago nʼayemeera, nʼatambula, nʼaingira na bo omu lubuga lwa iramyo, nakutambula, nakuguluka era nakuwaisya oKanca. 9Abantu boona boona ni bamubona nakutambula era nakuwaisya oKanca. 10Ni bamweteja nali niye oyo eyaikalanga oku Lwige Olusai olwa iramyo nakusabiirya. Boona boona ni bawuniikiira muno era ni beewuunya olwʼekyo ekimwikireku.
OPeetero byeyabaziire omwiramyo
11Omusabiirya niyaali aceekwaite oku Peetero nʼoYokaana, abantu boona boona ni batangaaliira ni bairuka ni baaba egiri oPeetero nʼoYokaana omu Bbalaza eyetebwa eya Solomooni. 12OPeetero niyababoine, nʼabakoba ati, “Abasaiza aBaisirairi, kini kibeewuunyisirye lwaki? Lwaki mukuturoleera mutyo? Mukulowooza buyinza bwaiswe, oba busai bwaiswe omu maiso ga Kanca nibyo bisoboleserye oni okutambula? 13OKanca wʼIbbulaimu, era owa Isaaka, era owa Yakobo, oKanca wa bazeiza baiswe, niye atumbirye omuweereza waamwe oYesu, gwemwawaireyo ni mumwegaanira omu maiso ga Piraato eyaali asaarewo okumutaisya. 14Baitu nywe ni mwegaana Akwera era Aikiriire, ni musaba okubataisirya omwiti. 15Mwaitire oyo agabira boona obwomi, baitu oKanca nʼamuyimboola era kini iswe tuli bajuurwa baakyo. 16Okwikiriza oYesu oyo nikwo kuwaire omuntu oni gwemukubona era gwemumaite amaani, era okwesiga oYesu nikwo kumuleeteire okutambirwa kimwei nka nywena nimukubona.”
17“Ale ati abaluganda, mmaite nga nywe, amwei nʼabafugi baanywe, byemwakoore oYesu, mwabikoore mu butamanya. 18Omu bini oKanca nʼaikiirya byeyabaziire omu balangi baamwe boona boona aba irai, abaalanganga oku Kurisito waamwe nti alibonaabona. 19Aleni ati buni mwenenye mwire egiri oKanca, ebibbi byanywe bibaiyibweku, oKanca leke aweeryenge emitima gyanywe okuwumula, 20era abatumire oKurisito, nga niye oYesu gweyabakomeirye eirai. 21OKurisito oyo ateekwa okubba omwiguru okwica ebintu byona byona nibiriira obuyaaka, nkʼoKanca niyabaziire omu balangi baamwe abakwera abaalowo eirai, 22olwakubba oMusa yakobere ati, ‘OMukama OKanca alibatumira omulangi nka nje, aliriga omu baganda baanywe. Mumuwuranga omu byona byona byalibakoba. 23Baitu buli muntu ataliwura mulangi oyo aliiyibwa omu bantu ba Kanca, nʼamalibwawo.’#Tek 18:15,18,19 24Era abalangi boona boona abaabazire, okuliga oku Samwiri nʼabaamwiririire, ebiro bini baabirangire. 25Nywe muli baana ba balangi era aba ndagaano ya Kanca gyeyakoore nʼabaize baanywe, nʼakoba Ibbulaimu ati, ‘Omu baizukulu baamu, amanga goona goona aga mu nsi nimwo galiweerwa omukisa.’#Kwe 33:18; 26:4 26OKanca niyakomerye omuweereza waamwe, yeekereire kumutumira niinywe, abaweerye omukisa nakubayindula nywena nywena okuliga omu bibbi byanywe.”
Currently Selected:
Bikolwa 3: RUULI-NYALA
Highlight
Share
Copy
Want to have your highlights saved across all your devices? Sign up or sign in
