Avaroma 7
7
Omufwano Okhuchula Khuwulamu Womusacha Nomukhasi Wuwe
1Vasiefwe, mumanyire wulayi wene mbo amalako kaamiyanga omunju nasiri omulamu, ndalomalomanga khwavo avamanyire amalako. 2Kho omukhasi watekha, ali aasi wamalako komusacha wuwe omusacha nasiri mulamu, nausa omusacha wuwe nafwa, ava mulekhule khumalako ako. 3Ne nundi ali okhulangwa omuheyi niva amenya nende omusacha wundi omusacha wuwe nasiri mulamu. Nausa omusacha wuwe kafwa, ali mulekhule okhuchula khumalako ako, ne natekhera omusacha wundi, simuheyi ta. 4Kho kachio vasiefwe, mwakhafwa khumalako okhuvichira mumuviri kwa Kristo, mbo muve esinju silala, muambane muyo owasisimuswa okhuchula muvafu mbo khuve nikhwamira Nyasaye eviamo. 5Olu khwali ni khusimenyire muva liomuviri, eliekomba liefwe eliowoni, eliachwayiriswa nende amalako, liali likhola emilimo muvinju viomuviri viefwe okhwama eviamo viefwa. 6Evise vino, eva liefwe liomuviri lilekhuywe okhuchula khumalako. Khufwiye khuviali ni viachuwoa, mbo khuchakhola emilimo muvinju vikhale viamalako kaandikwa ta, nichasi muwulamu wuyakha wa Roho.
Amalako nende Owoni
7Khanu khuwole sina? Amalako woni niwo? Khava ta! Ata kachio, kava mbo amalako kawumao, sinakhamanyire owoni ta. Sinakhamanyire okhwekomba siosina ta, amalako nikachawola, “Ochekomba ta.” 8Nausa owoni wunyolanga oweyangu mumalako, wulecha mwise eliekomba liosiliosi. Amalako ni kawumao, owoni wufwiye. 9Nali mulamu nisiri okhumanya amalako, nausa olu amalako kacha, owoni wasisimukha, nange nafwa. 10Elako elio elienyekha limbe owulamu liava njolufu khwise. 11Sikira owoni wanyola oweyangu mumalako, wambeya ne okhuvichira mumalako wanjicha. 12Kho amalako kene machwenufu, ne elako echwenufu nundi liawene nundi elayi. 13Khanu esio esilayi, njesialecha efwa mwise? Khava ta! Owoni njowulecha efwa mwise, okhuvichira musinju silayi, mbo khowoni wuve ni wuwonekhana okhuva mbowoni niwo. Mana owoni owo okhuvichira mulako wuve ni wuwonekha okhuva owononi okhuvicha esikero.
Elwanakana Mwifwe
14Khumanyire mbo amalako kesiroho, nange ndi oweva liomuviri, owakusiwa khuwoni. 15Simanyirisanga evikholwa viange ta. Sikira sikhola evi nenya tawe, nausa khola evinju evi naleka. 16Khanu nivakhola evinju vinjenya ta, mba ndafukiriranga mbo amalako malayi. 17Kho nonu sinise onakholanga evinju evio ta, nausa owoni wumenyire mwise. 18Sikira emanyire mbo siwumao siosisiosi esilayi esimenyire mwise ta, yaani, muva liomuviri kwange. Nyala okhwenya esia awene, nausa sinyala okhusikhola ta. 19Sikira sikholanga esilayi esi nenya ta, nausa esivi esi njenya njesikhola. 20Khanu nivakhola evinjenya okhukhola, simba nise khanu onakholanga ta, nausa owoni wumenyire mwise. 21Khanu enyola lino niliri elako mbo ninenya okhukhola esiawene, owuvi wuli wusa aambi nange. 22Sikira esangalira Amalako ka Nyasaye, mukachi mwomwoyo kwange. 23Nausa mbona muvinju viomuviri kwange amalako kandi akakhupana nende amalako komwoyo kwange nikakhola okhuva omuwoe khumalako kowoni akamenyire muvinju viomuviri kwange. 24Ndimunju omuvi muno! Njanu oli khunanula okhuchula khumuviri kwefwa kuno? 25Ekhupira Nyasaye ochio muno okhuvichira mu Yesu Kristo Omwami wefwe! Kho nonu, ese samwene ekhalavanira amalako ka Nyasaye nende omwoyo kwange, nausa muva liomuviri kwange ekhalavanira elako liowoni.
Currently Selected:
Avaroma 7: LNTPP
Highlight
Copy
Compare
Share
Want to have your highlights saved across all your devices? Sign up or sign in
©The Bible Society of Kenya, 2024