Avaroma 6
6
Okhufwa Khuwoni Nende Owulamu mu Okhuambana ni Kristo
1Khuwole khuchie khanu? Khuchiririre okhukhola owoni kho mbo embavasi chia Nyasaye chive enyingi? 2Khava ta, kakhava kachie efwe avafwa khuwoni nundi khuchiririre okhumenya muwoni chana? 3Simumanyire mbo fwesi avavatiswa mu Kristo Yesu khwavatiswa mufwa lilie ta? 4Khanu khwasikhwa ninaye khukhuvatiswa mufwa lilie, kho nga Kristo kasisimuswa muvafu muwukhumi wamaani ka Papa, efwe fwesi khuve nikhukenda muwulamu wuyakha. 5Kava mbo khuambanire ninaye mufwa ngelilie, okhwola khuli okhuambana ninaye mu esisimusa sielilie. 6Khumanyire mbo eva liefwe ekhale liavambwa ninaye mbo omuviri kwowoni kusakulwe, mbo khuchava avaambe vowoni ta. 7Sikira oyo ofwiye akanguluywe okhuchula khuwoni. 8Nausa niva khufwiye ni Kristo, khusuvira mbo khuli nundi okhumenya ninaye. 9Sikira khumanyire mbo Kristo olu kasisimuswa okhuchula muvafu sialifwa nundi tawe, nundi efwa liwuma owunyali khuniye. 10Efwa eli kafwa, kafwira owoni, lulala lwong'ene, nausa owulamu owamenyire, amenyire muwuambani ni Nyasaye. 11Kho enywe mwesi mukhoya mwewone mwavene avafu khuwoni ne avalamu khu Nyasaye mu Kristo Yesu. 12Muchalekha owoni nonu okhuchuka mumiviri kienywe ta, okhuvakhola mulonde elienya liawuo tawe. 13Muchaana evinju viemiviri kienywe khuwoni vive evinju viowuvi ta, nausa mwiane khu Nyasaye ngavanju vachusiswe mulufu mwava avalamu, ne muchuse wulisinju siemiviri kienywe khu Nyasaye ngevinju viowulungi. 14Sikira owoni siwuli okhwamiya mwinywe ta, okhuvera simuli aasi wamalako ta nausa aasi wembavasi.
Avaambe va Owulungi
15Khanu khuwole sina? Khuchirire okhukhola owoni sikira sikhuli aasi wamalako ta, mbo khuli aasi wembavasi? Khava ta! 16Musiri okhumanya mbo nimweana mwavene khumunju yesiyesi ngavaambe vachekefu, mulikhuva avaambe voyo oyu muwulira, yive khuwoni, owulecha efwa, namwe khuwuwuliri okhulecha owulungi? 17Nausa khukhupire Nyasaye ochio muno, mbo enywe avali avaambe vowoni mwakhava avawuliri mumioyo okhwola khusikero siamekeso aka mwaweresiwa. 18Enywe mwananulwa okhuchula muwoni, khanu mwakhava avaambe vowulungi. 19Njumikhira elomaloma lia wuli lwosi, sikira yowulemu wenywe. Sikira nga mwali nimweana nende wulisinju sia emiviri kienywe khuvinju vinyaalu, nende owononi owukali muno, khanu evise vino muane evinju via emiviri kienywe khu owulungi khulwa okhwitakasa. 20Olu mwali avaambe vowoni, mwali valekhule okhulondana nende owulungi. 21Khanu nganga sina eyi mwanyola muvinju evi khanu evise vino mukholera esoni? Evinju evio viosi viwera mwifwa. 22Nausa, khanu mbo mulekhuywe okhuchula muwoni ne mwakhava avaambe va Nyasaye, enganga yenywe njokhutakaswa ne viwera muwulamu wa wuli lwosi. 23Sikira omuchungo kwowoni njefwa, nesianwa sia werere esia Nyasaye njowulamu wa wuli lwosi mu Kristo Yesu Omwami wefwe.
©The Bible Society of Kenya, 2024