Avaroma 3
3
1Khanu siosina esi Omuyahudi akhirira avandi? Namwe owulayi wokhukhewa siosi? 2Khuli nende owukhala mungira chiosi. Khwanje khuchi, Omuyahudi njoyu vakanisa endakaano ya Nyasaye. 3Khanu niva mbo avandi sivali vasuvirifu ta? Okhuchasuvira khwawe khunyala khwachusao owusuvirwa wa Nyasaye? 4Khava ta! Lekha Nyasaye ave wang'ali ne wulimunju ave muveyi, ngamaandiko kawola,
“Mbo khove nufukirirwa mumakhuwa kako,
nokhire olu vakhukhalakira.”
5Niva mbo owuvi wefwe wukira khumanye owukhalaki wang'ali wa Nyasaye, khunawole khuchie? Mbo Nyasaye ayekhera oluveka lulala okhucha echima lilie khwifwe? (Nomaloma ngomunju.) 6Khava ta! Kho khanu Nyasaye kakhakhalakira achie esialo? 7Khanu niva okhuvichira muwekati wange owung'ali wa Nyasaye wuwonekha khulwowukhumi wuwe, esikira sina nikhalakirwa ngomwoni? 8Ne sikira sina ndove okhukhola amavi mbo owulayi wiche? Nga avanju vandi vachukikhira nivawola vachi khwekesanga khuchio. Vanakhakhalakirwe nga venyekha okhukhalakirwa.
Awumao yesiyesi Omulungi
9Khanu kachie? Efwe Avayahudi khulikho nowulayi wosiwosi okhukhira avandi? Tawe, ata ta! Sikira emboye khale mbo Avayahudi nende Avachali Avayahudi vosi vali aasi wamaani kowoni. 10Nga liaandikwa:
“Awumao omulungi, tawe, awumao ata mulala!
11Awumao omanyirisanga awumao otakhatakhanga Nyasaye.
12Vosi vawukha, vosi alala vawukha,
awumao okholanga amalayi, awumao ata mulala ta.”
13“Emikokopiro kiawe kiasama ngeng'ani,
vekhonyera enimi chiawe okhuveya.”
“Owufisi wenjukha wuli munimi chiawe.”
14Eminwa kiawe kichuye evilaamo nende owusiva.
15“Amakulu kawe kali lwangu okhwitisa amalasire,
16wuli aavachia valecha okhwonona neminyakhano.
17Mana engira yomulembe sivayimanyire ta.”
18“Okhuria Nyasaye sikhulikho munganakani chiawe ta.”
19Khanu khumanyire mbo akelako liwola, liwolera avo avali aasi wamalako, kho avanju vosi vakhaywe esi vekatirisirakho, nesialo siosi sikhalakirwe ni Nyasaye. 20Sikira awumao omunju yesiyesi ofukiriswa emberi wa Nyasaye okhuvichira okhulonda amalako ta, sikira okhuvichira mumalako, avanju vamanya owoni.
Okhufukirirwa ni Nyasaye
21Khanu owulungi wa Nyasaye wakhamanyikha owuchavichira khumalako ta. Owulungi wuno njowu amalako nende avanabii vaanira owuveri. 22Nyasaye akholanga avanju okhuva avalungi, musuvira mu Yesu Kristo khuvosi avasuvira. Kho sikhulikho nende okhwawukhania ta. 23Sikira avanju vosi vakhola owoni ne vasuta aleyi nowukhumi wa Nyasaye. 24Nichasi Nyasaye okhuvichira mu embavasi chichie engali ngesianwa, awola achi khuli avalungi okhuvichira mukhunanulwa khuli mu Kristo Yesu. 25Nyasaye kamuana ngesitiso, kho mbo mumalasire kake embi chiavanju chilekherwa niva vamusuvira. Yino yali okhwekesa owulungi wa Nyasaye, sikira mukhwefwira khukhwe kakhachulekhera owoni wefwe wukhale. 264Kano kali okhwekesa mbo khulwa evise vino niye njomulungi ne avaliranga owulungi oyo oli nesuvira mu Yesu. 27Khanu kho siosi esikira khwekinie? Siwumakhoo ta. Esikira sina? Khulwesifune sievikholwa? Tawe, nausa khulwesuvira. 28Kho khumalirise khuchi omunju avalikha okhuvomulungi khulwesuvira, siyiri khuvikholwa viamalako ta. 29Namwe Nyasaye ono, Nyasaye wa Avayahudi vong'ene? Siali Nyasaye wa Avachali Avayahudi vosi ta? Yee, ata Avachali Avayahudi vosi. 30Sikira Nyasaye ali wusa mulala, ne alikhufukirisia avakhewa khulwesuvira liawe nende avachakhewa okhuvichira musuvira liawe. 31Khanu khuli okhuchusao amalako khulwesuvira lino? Khava ta, sikali kachio tawe, khulikhutinyirisa amalako.
Currently Selected:
Avaroma 3: LNTPP
Highlight
Copy
Compare
Share
Want to have your highlights saved across all your devices? Sign up or sign in
©The Bible Society of Kenya, 2024