Avaroma 2
2
Ekhalakira lia Nyasaye
1Khanu owuma esifune siokhweteteya, munju ewe, ata ovenukhalakira omunju wundi, sikira nukhalakira omunju wundi wekhalakira wamwene sikira ewe omukhalaki, okholanga evinju evio wesi. 2Khumanyire mbo ekhalakira lia Nyasaye livanga khwavo avakhola evinju ngevio. 3Munju ewe, opara mbo nukhalakira avo avakhola evinju evio, ne nawe ovikhola, onakherukhe okhukhalakirwa ni Nyasaye? 4Namwe wesuvisira owungi owesivera sisie, okhuva ochayulikha nende owesimirisa? Osiri okhumanya mbo esisa sia Nyasaye sienyekha sichukhole khwekanire? 5Nausa nende emioyo kienywe emiomu siekina munewungikhiranga esikhupo khulutalo lwesieri olu ekhalaka liawene lia Nyasaye linakhawonekhe. 6Sikira alikholera wulimunju okhulondana nende evikholwa vivie. 7Khuavo avesimirisa mukhukhola amalayi nivenya okhuweresa Nyasaye oluyali wuli lwosi, alivawa owulamu wa wuli lwosi. 8Nausa khwavo avokhweveyeresa ne sivalonda owang'ali ta, nausa valonda owuvi, valinyola echima nende okhuchamukha. 9Khuliva nende evinyasio nende eminyakhano khu siawulimunju okholanga amavi. Omuyahudi nali owamberi nende Omugiriki yesi. 10Nausa owukhumi nende oluyali nende omulembe viliva khu wuli mulala okhola amalayi, Omuyahudi owamberi nende Omugiriki yesi. 11Sikira Nyasaye siayekhanga ewuleka ndala ta. 12Vosi avakhakhola owoni nivakochiswe amalako, vosi vanakhasikhe nivawuma amalako, ne vosi avakhakhola owoni nivamanyire amalako vanakhakhalakirwe nende amalako. 13Sikira sinje avawulira amalako avalungi emberi wa Nyasaye ta, nausa avakhola akamalako kawola njavalifukiririswa. 14Olu Avachali Avayahudi avawuma amalako vakhola muva liawe evi amalako kenya, vakwa amalako khuvene, ata niva vawuma amalako. 15Vekesa mbo esimalako kenya siaandikwa khumioyo kiawe, nata amaparo kawe kosi kavavera nenganakani chiawe evise vilala chivasitaka nundi evise vindi chivateteya. 16Khulutalo olwo, olu okhulondana nende Injili yange, Nyasaye akhalakiranga eviekisa eviavanju okhuvichira mu Kristo Yesu.
Avayahudi nende Amalako
17Niva mwelanga mwavene mbo muli Avayahudi ne mweyikina amalako nokhwefumia sikira yeva lienywe ni Nyasaye. 18Nimuwola mbo mumanyire elienya lilie kho mweyama esilayi, sikira amalako kavekesa ka Nyasaye. 19Ne niva mumanyire mbo ninywe avemirisi khuvaofu, nende owulafu khwavo avali musirima. 20Ninywe avakololosi vavasiru, avekesi vavana, avali nende amalako kekesa emanya nende owung'ali. 21Enywe nonu avekesa avandi, simwiyekesakho mwavene? Olu mukania avandi okhwiva, enywe mwivanga? 22Muwola mbo omunju sikenya kakhola owuheyi ta, enywe muheyanga? Enywe avaleka evifwananie, enywe mukholanga akacholanire, nimwiva mu Etemperi? 23Enywe avefumia mumalako, muchalaasa Nyasaye nimukhalaka amalako? 24Sikira ngamaandiko kawola, “Elicha lia Nyasaye likholerwa esifwavi mu Avachali Avayahudi okhuvera yenywe.” 25Okhukhewa ng'ali khuli nowusicho niva mbo mulonda amalako. Nausa niva mukhalaka amalako, okhukhewa khwenywe khuli wusa khuva ngokhuchakhewa. 26Niva omunju ochasi Omuyahudi ochakhewa akholanga ngamalako kenya, okhuchakhewa khukhwe sikhuli khuwonekhana ngowakhewa? 27Kho nonu avo avachakhewa mumuviri nausa valonda amalako vali okhukhalakira enywe avakhewa ne mukhalaka amalako. 28Sikira sinje Omuyahudi wang'ali tawe oli wusa wokhumukulu, namwe okhukhewa khwang'ali sisinju sierwanyi khumuviri wusa ta. 29Muyahudi niye, oli achio mukachi, ne okhukhewa khwang'ali sinju siomwoyo, sia Roho sisiomuviri wusa ta. Efuma yiye yichula khu Nyasaye, siyiri eyavanju ta.
Currently Selected:
Avaroma 2: LNTPP
Highlight
Copy
Compare
Share
Want to have your highlights saved across all your devices? Sign up or sign in
©The Bible Society of Kenya, 2024