Avaroma 4
4
Omufwano Kwa Abrahamu
1Khanu khuwole sina khu Abrahamu, kuka wefwe? 2Sikira niva Abrahamu kavalikha omulungi khuvikholwa, ava alikho nesinju siokhwekinisiria, nausa siyiri emberi wa Nyasaye ta. 3Amaandiko kawola kachie? “Abrahamu kasuvira Nyasaye ne kavalikha mbo khanu niye mulungi.” 4Oyo okhola emilimo, omuchungo kukwe sikuvalikha okhuva esianwa ta nausa esienyekha. 5Naye oyo ochakhola evikholwa nausa asuvira mu ovaliranga owulungi avamavi, esuvira lilie livalikha ngowulungi. 6Kho Daudi yesi aana ekhavi khumunju oyu Nyasaye avalira owulungi owuchali owa evikholwa:
7“Valinekhavi avo ava embi chiawe chilekheywe, nende avowoni wawe wulekheywe.
8Ali nekhavi omunju oyu Omwami siali okhumuvalira owoni wuwe ta.”
9Khanu ekhavi yino yivalirwa avakhewa vong'ene, namwe navachakhewa vosi? Khuwola khuchi esuvira livalirwa khu Abrahamu ngowulungi. 10Khanu kavalirwa achie? Yali nasiri namwe ni kakhakhewa? Siyali ni kakhakhewa ta, nausa nasiri okhukhewa. 11Kakhewa ngesimanyiro namwe okhufukirisia owulungi owu kali nanyoye okhuvichira musuvira nasiri okhukhewa. Esifune siokhukhewa siali okhumukhola papa wavo vosi avasuvira okhukhewa nikhuwumao, ava owulungi wavalirwa wusa. 12Ne nundi ave papa wavakhewa, avachali avakhewa wusa ta, nausa nundi avalonda engira eyo eyesuvira eli papa Abrahamu kali nalio nasiri okhukhewa.
Omulako kwa Papa Kunyolekhana Okhuvichira Musuvira
13Omulako khu Abrahamu nende avolwiwulo lulwe, mbo esialo siliva siawe, sikwacha okhuvichira mumalako ta nausa okhuvichira muwulungi wesuvira. 14Niva mbo njavalonda amalako avali khunyola esialakwa, esuvira lia wusa ne omulako kwa werere. 15Sikira amalako kalechanga echima, ne aamalako kawuma, okhufunaka amalako khuva khuwumao.
16Njesikira omulako ni kuli khusuvira, kho mbo kuve okwembavasi, ne kuve khuvosi avolwiwulo lulwe—siyiri wusa khuvalonda amalako tawe, nausa kuve nundi khwavo avasanga musuvira lia Abrahamu, sikira nje papa wefwe fwesi. 17Nga amaandiko kawola, “Ekhulombire papa wamaanga amangi” emberi wa Nyasaye oyu khwasuvira, Nyasaye owana owulamu khuvafu ne mana alange evinju vichalio vimala vivao. 18Abrahamu kasuvira, ata niva siali siwumao esiokhusuvira, mbo aliva papa wamaanga amangi. Nga vali nivamuwoleye, “Kho ngavolwiwulo lulwo valikhuva.” 19Sikayeyera musuvira olu kapara khumuviri kukwe tawe, okwali nikuweye amaani sikira kali amalire emiaka emia ndala, namwe olu kalengera khuwukumba wa Sara ta. 20Ne esuvira lilie siliayeyera khumulako kwa Nyasaye ta, nausa katinyiriswa musuvira nga kaweresa Nyasaye oluyali. 21Nausa kali nende owung'ali mbo Nyasaye anyala okhukhola nga kalaka. 22Njesikira esuvira lilie lia “Valikha khuniye ngowulungi.” 23Nausa amakhuwa mbo, “Kavalirwa,” sikaandikwa khulwa niye yeng'ene tawe, 24nausa khwifwe fwesi. Khuli okhuvalirwa efwe avasuvira muniye owasisimusa okhuchula muvafu Yesu Omwami wefwe. 25Niye njoyu vecha khulwa embi chiefwe ne kasisimuswa khulwa efwe okhuvalikha avalungi.
Currently Selected:
Avaroma 4: LNTPP
Highlight
Copy
Compare
Share
Want to have your highlights saved across all your devices? Sign up or sign in
©The Bible Society of Kenya, 2024