Matayo 7
7
Okhukhalakira Avandi
(Lk. 6.37-38,41-42)
1“Ochakhalakira ta kho wesi ove nuchakhalakirwa. 2Esikira okhukhalakira okhu okhalakira njokhu olikhalakirwa, ne esikero esi owana njesi ochiakhunyola. 3Esikira sina owone esiwawa mumoni yowasio ne okhaywe okhuwona olusala mumoni yiyo wamwene? 4Ne onyala ochie okhuwolera wandayo, ‘Lekha ekhuchuse esiwawa siri mumoni wuwo’, ne wamwene oli nolusala mumoni wuwo? 5Ewe omwikati, changirira ochuse olusala mumoni wuwo kho onyale okhuwona owulayi nokhuchusa esiwawa esiri mumoni yowasio.”
6“Muchasukunira embwa evinju vichwenufu ta, ne muchasukunira engurwe evinju viowukusi ta. Chiri okhuvisenaka wusa, ne chimala chivakalukhanakho.”
Save, Takhe, Khong'onde
(Lk. 11.9-13)
7“Save, nanywe muchia okhuweresiwa, takhe, nanywe muchiakhunyola, khong'onde nanywe muchia okhwikulirwa. 8Esikira, oyo osava aweresiwa, otakha anyolanga, naye okhong'onda, kekulirwa.” 9Njemusacha sina, omwana wuwe namusava omukati ali okhumuwa ekina? 10Namwe amuwe enjukha namusavire eng'eni? 11Khanu, niva mbo enywe avali avavi mwamanya okhuwa avana venywe evinju vilayi, naye Papa wenywe owomwikulu sialikhuweresa evilayi evingi avovosi avamusava! 12Kho khanu kholere avasienywe akamwenya vavakholere, esikira kano njakali mumalako nende muvanabii.
Omuliango Munyerere
(Lk. 13.24)
13“Yingirire mumuliango munyerere. Esiriwa siokhuchia mumuliro sivalayi, avachiayo vangi okhuvera, engira yokhuchiayo nyangu. 14Nausa esiriwa siokhuchia muwulamu sinyerere, navachiayo vatiti okhuvera engira yokhuchiayo ndinyu.
Omusala Namatunda Kakwo
(Lk. 6.43-44)
15“Mukesiye okhulondekhana nende avanabii vowuveyi, avachia khuvachakho mumasero kamakondi nekhane mukachi visuche evialava. 16Muchia khuvamanya okhulondana namatunda kawe. Esabibu sichinyala okhwama mumawa ta, ne amatunda malayi sikamanga khuluchanjasi ta. 17Khanu omusala mulayi kwamanga amatunda malayi, nakwo omuvi kwamanga amavi. 18Omusala mulayi sikunyala okhwama amatunda mavi ta, nakwo omuvi sikunyala okhwama amalayi tawe. 19Omusala kuchama amatunda malayi kuchemwa nokhusukunwa mumuliro. 20Khanu muchia khuvamanya okhulondana namatunda kawe.”
Sinavamanyakho ta
(Lk. 13.25-27)
21“Sikalikho mbo wulimunju wunanganga, ‘Omwami, Omwami’, achia khwingira muwami womwikulu ta, nausa oyokhola elienya lia Papa wange oli mwikulu. 22Olutalo olwo avangi vanakhanjevenge, ‘Omwami, Omwami, sikhwerwacha mulicha lilio, khwatimania evisieno mulicha lilio, nundi khwakhola amangayimwa mulicha lilio ta?’ 23Nje nga enakhavakanie nowululu, ‘Sinavamanyakho tawe, chulano muchie muli avanju vamayanu!’ ”
Avombakhi Venju Vaviri
(Lk. 6.47-49)
24“Kho wulimunju owulira amakhuwa kange kano nokhukalonda, ali ngomusacha mukesi owombakha enju yiye khulwanda; 25efula yakwa, emikhula kiacha, omuyaka kwawuucha namaani kwakhupa enju eyo, ne siyakwa ta okhuvera yali yombakhwa khulwanda. 26Naye wulimunju owulira amakhuwa kange kano ne siakalonda ta, ali ngomunju musiru owombakha enju yiye khu muyekhe; 27efula olu yakwa, emikhula kiacha, omuyaka kwawuucha namaani mana kwakhupa enju eyo yakwa, okhukwa okhukali!”
Owunyali wa Yesu
28Nga Yesu kali nikakhamala okhuwola amakhuwa ako, esituma siavanju siawuka khumekeso kake, 29esikira sikekesa ngavekesi vamalako vawe ta, kekesa ngomunju oli nowunyali owukhongo.
©The Bible Society of Kenya, 2024