Matayo 6
6
Amekeso khu Khuana Muwusimi
1“Kesiye, muchakhola amalayi kenywe emberi wavanju kho vavawone ta. Nimukhola muchio simunyola omuchungo okhuchula khu Papa wenywe owomwikulu ta.
2“Kho nuwana esinju siosi okhukhonya avamanani, ocheyekesanga ta, ngavekati vakholanga musinagogi nende khumianda, kho avanju vavafumie. Evawolera akang'ali, vanyola khale omuchungo kwawe. 3Nuana esiokhukhonya avamanani, omukhono kukwo omukota kuchamanya esi mulungi kukhola ta. 4Kho okhuana khukhwo khuve muwekisi, naye Papa wuwo owonanga muwekisi achia okhukhuchunga.
Amekeso Okhulondana Nesala
5“Nusala ochava ngavekati ta, esikira vasimanga okhwema nokhusala musinagogi nende mumasang'angira kho vawonekhane navanju. Ng'ali yene vawolera vanyola omuchungo kwawe khale. 6Nausa ni wenya okhusala, yingira musikoro wuwo mana niwakhekalao omuliango osale papa wuwo nuli muwekisi, Naye papa wuwo owonanga akowekisi achia khukhuchunga.
7“Mukhusala ochekhonyera amakhuwa amangi amerere nga Avachali Avayahudi ta. Nivo vaparanga mbo vali khuwulirwa okhuvera amakhuwa amangi akavawola. 8Muchava nganivo ta esikira Papa wenywe amanyire evi mwenya ata nimusiri okhumucheva. 9Khanu salenge muchi:
Papa wefwe oli mwikulu,
Elicha lilio linyole oluyali.
10Owami wuwo wiche,
Kawenya kekholekhe,
Khusialo nga kekholekha mwikulu.
11Ochuwe lero esiokhulia siefwe esia wulinyinga.
12Ochuvere embi chiefwe,
nga fwesi khuveranga avachwononeranga.
13Ochachuyira mukhutemwa ta
Nausa ochuwonie mumavi.
14Esikira nimuvera avanju amavi kawe, Papa wenywe womwikulu yesi alikhuvavera. 15Nimuchavera avanju ta, Papa wenywe yesi sanyala khuvavera embi chienywe ta.
Amekeso Khukhweyimana Esiokhulia Khulwokhusala
16“Ne niweyima okhulia, ochakhola esisa ngavekati ta, esikira vakhunianga oweni wawe mbo eonga liawe liwonekhe navanju. Evawolera muwung'ali vanyola khale omuchungo kwawe. 17Nausa niweyima okhulia, sava mumoni, nokhwevakha amafucha khumuchwe kukwo, 18kho okhweyimana khukhwo khuchawonekhana wusa navanju ta nichasi papa wuwo owonanga muwekisi achia khukhuchunga.”
Emiandu Mwikulu
(Lk. 12.33-34)
19Muchevikhira emiandu kienywe musialo eyi amasiriyi namwe engekhenu vichonona nende eyi vevi vatechula veva ta, 20nausa yevikhire emiandu kienywe mwikulu eyi amasiriyi namwe engekhenu, nende eyi avevi vachatechula veva ta. 21Okhuvera eyimiandu kikio kiri njeyimwoyo kukwo kwosi kuli.
Owulafu Womuviri
(Lk. 11.34-36)
22“Emoni njetaa yomuviri. Khulwako emoni chichio ni ndayi, omuviri kukwo kwosi kwichula owulafu. 23Nausa emoni chichio chiava embi, omuviri kukwo kwosi kwichula esirima. Khanu owulafu wuli mwiwe wava esirima, esirima esio sikhongo po!”
Nyasaye nende Emiandu
(Lk. 16.13; 12.22-31)
24Awumao onyala okhukhalavanira avakhongo vaviri, okhwola aviyire mulala nasime owundi, nomba afukirisanie nende mulala nalekerese owundi. Sunyala okhukhalavanira Nyasaye nemiandu ta.
25“Khulwako vawolera, muchava neenda omwoyo okhulondekhana nowulamu wenywe ta, esimulikhulia namwe esimulikhunywa, namwe okhuendera emiviri kienywe, esimulikhufwala ta. Owulamu siwukhira esiokhulia nemiviri sikikhira evifwalo?” 26Lengere enyuni chiamukulu, sichichakanga ta namwe okhukesa nokhuvikha muviaki ta, nausa papa womwikulu achilisanga wusa. Nenywe simuli avowukhonyi okhuchikhira? 27Njanu khwinywe nava neendamwoyo anyala okhumeta esikero khuwulamu wuwe? 28Ne sikira sina nimuendera enguo? Lengere evimuli viomumikunda nga vikhulanga, sivinyakhananga okhwecheresa ta. 29Nange vawolera, ata Solomoni muluyali lulwe lwosi, sikafwalakho nga silala khunivio ta. 30Kho niva mbo Nyasaye afwalanga owunyasi womumikunda owuli nowulamu nyingayino nokhusukunwa mumuliro muchuli, siali khuvafwala okhuvicha awenao enywe avesuvira etiti? 31“Khanu muchaenda omwoyo nimucheva, ‘Khunalie sina?’ Namwe, ‘Khunanywe sina?’ Namwe mbo, ‘Khunafwale sina?’ 32Esikira Avachali Avayahudi vatakhatakhanga evinju vino, nausa papa wenywe owomwikulu amanyire mbo mwenyekha muve nevinju vino viosi.” 33Khanu changirire mutakhatakhe owami wa Nyasaye nende owulungifu wawo, nevinju vino viosi virikhuva vienywe nundi.
34“Khanu muchaendera muchuli ta, muchuli yirikhweendera eyene. Lekhe owutinyu wolutalo wulunyale.”
©The Bible Society of Kenya, 2024