Matayo 4
4
Okhutemwa khwa Yesu
(Mrk. 1.12-13; Lk. 4.1-13)
1Yesu kemirirwa nende Roho kachia musichimi okhutemwa nende Setani. 2Eweneyo keyima esiokhulia eviteche amakhumi kane neviro amakhumi kane, ni viakhawa kawulira enjala. 3Setani kacha kamuwolera, “Nuli Omwana wa Nyasaye lakirisa amakina kano kave esiokhulia.” 4Nausa kamuchipa, “Liaandikwa,
‘Omunju siamenyeranga esiokhulia siong'ene ta,
nichasi wuli ekhuwa lichula mumunwa kwa Nyasaye.’ ”
5Setani kamuyira Yerusalemu, etookho echwenufu, kamucha khusisuli sia Etemperi, 6kamuwolera, “Nuli Omwana wa Nyasaye suna aasi, okhuvera liaandikwa,
‘Alikhuchuma engelosi chichie chikhulinde,’
Ne
‘chili okhukhukamula namakhono kawe,
ochacha wekumula okhukulu khukhwo khwikina ta.’ ”
7Yesu kamuchipa, “Nundi liaandikwa, ‘Ochatema Omwami Nyasaye wuwo tawe.’ ” 8Nundi Setani kamuyira khusikulu esileyi kamwekesa owami wosi owesialo noluyali lwawo. 9Setani kamuwolera, “Vino viosi njia khukhuwa niva oli khukwa aasi wunyinamire.” 10Nje nga Yesu kamuwolera, “Chula ochie Setani! Okhuvera liaandikwa,
‘Yinamiranga Omwami Nyasaye wuwo
yeng'ene oli khumukhalavanira.’ ”
11Setani kamala kamulekha, ne wona, engelosi chiacha chiamukhalavanira.
Yesu Kanja Emilimo Kikie Galilaya
(Mrk. 1.14-15; Lk. 4.14-15)
12Nga Yesu kawulira mbo vatiye Yohana, kachula kachia Galilaya. 13Ne nga Yesu kachula Nazareti kachia kamenya Kafarnaumu enanyanja, mungongo chia Sabuloni nende Nafutali, 14kho amakhuwa kawolwa nende Isaya omunabii kosereswe:
15“Mumukunda kwa Sabuloni nende okwa Nafutali,
okhuchia enanyanja engerekha wa Yordani,
Galilaya ya Avachali Avayahudi,
16avanju vamenyanga musirima
vawene owulafu owukali,
navo avamenya musialo nende musisiko siolufu
owulafu wuvakhiye.”
17Yesu kanja okhwirwacha okhuchula evise evio, nawola, “Yekanire esikira owami womwikulu wuli aambi.”
Yesu Alanga Avalovi Vane
(Mrk. 1.16-20; Lk. 5.1-11)
18Nga Yesu kali nakenda khulukuku lwenyanja ya Galilaya kawona avasoliri vaviri avali wandaye, Simoni owalangwa Petero nende Anderea nivalova eng'eni nekhanda munyanja esikira vali avalovi. 19Ne kavawolera, “Nondekho, njia khuvakhola muve avalovi vavanju.” 20Evise evio valekha ekhanda chiawe vamulondakho. 21Nolu kachiririra emberi kawona avasoliri vandi vaviri, Yakopo wa Sebedayo nende Yohana omusoliri wawe, vali ni simwana muliacho nivacheresa ekhanda chiawe, kavalanga. 22Awene nawene, valekha eliacho ni simwana, vamulondakho.
Yesu Kekesa, Kerwacha nende Okhuwonia
(Lk. 6.17-19)
23Yesu kawutokhana mu Galilaya yosi, nikekesa musinagogi chiawe, nikerwacha amakhuwa malayi akowami nende okhuwonia amalwaye kosi namatekhere muvanju. 24Efuma yiye yalanda mu Siria mwosi, kalecherwa avalwaye, nende vosi avanyakhananga nowulwaye lukano lukano, nowusiva, avevisieno, avenjulume nende avafwokoya, ne kavawonia vosi. 25Evituma viavanju viamulondakho okhuchula Galilaya, Dekapoli, Yerusalemu, Yudea nende engerekha wa Yordani.
Currently Selected:
Matayo 4: LNTPP
Highlight
Copy
Compare
Share
Want to have your highlights saved across all your devices? Sign up or sign in
©The Bible Society of Kenya, 2024