Matayo 2
2
Avakeni Okhuchula Ewukwe
1Nga Yesu kewulwa mu Bethlehemu ya Yudea enyinga chiomuchuki Herode, avakesi veng'eniesi okhuchula ewukwe vacha Yerusalemu, nivacheva,
2“Mboena eyi kewuliywe omuchuki wa Avayahudi? Esikira khuwene eng'eniesi yiye Ewukwe, mana khwichire okhumwinamira.” 3Omuchuki Herode nga kawulira kano, kesindukha alala nende avanju va Yerusalemu vosi; 4kalanga alala avakuhani vakhongo nende avekesi vamalako, kavacheveresa eyi Kristo kenyekha kewulwe. 5Vamuwolera, “Mu Bethlehemu ya Yudea, esikira ndwolu kaandikwa nomunabii:
6‘Ewe Bethlehemu, musialo sia Yuda,
sulikho omutiti muvachuki va Ewuyuda ta,
esikira omuchuki achia okhuchula mwiwe,
onakhachuke avanju vange Israeli.’ ”
7Mana Herode kalanga avakesi veng'eniesi muwekisi kacheveresa khunivo evise evi eng'eniesi yiwonekhaniye. 8Kavachuma Bethlehemu, mana kavawolera, “Chie mutakhatakhe omwana oyo owulayi ne olumumunyola, mumbolere, sesi njie emwinamire.” 9Nivakhachekeresa omuchuki vachekukha okhuchia, neng'eniesi eyi vali ni vawene Ewukwe yavemirira okhwola nga yema aa omwana kali. 10Nga vayiwona vali nende okhwekhoya okhukali muno. 11Vengira munju vawona omwana ni ng'ina Maria, vasikama aasi vamwinamira. Vekula amavikhiro kawe vawa omwana evianwa, edhahabu, owuvani nende amarashi. 12Vavichira khungira yindi okukoola musialo siawe okhuvera vakanisiwa mumalocho okhuchakoolera Herode.
Okhwirukhira Misri
13Nga vali nivakhachekukha, engelosi ya Omwami yawonekhanira Yosefu mumalocho yamuwolera, “Yinyokha owukule omwana ni ng'ina mwirukhire Misri, mumenyeyo okhwola ngevawolera, esikira Herode anatakhanga omwana okhumwicha.” 14Yosefu kenyokha kawukula omwana nende ng'ina esiro kachia Misri, 15mana kamenyayo okhwola nga Herode kafwa. Kho amakhuwa aka Omwami kalomaloma okhuvichira mumunabii kosereswe, “Nalanga omwana wange okhuchula Misri.”
Okhwichwa khwa Avana
16Nga Herode kamanya mbo avakesi vali vamuveyire, echima liamutira kachuma veche avana vasoliri vosi mu Bethlehemu nende mulukongo olwo avali emiaka kitachu okhukoola aasi, muvise evi kali namanyirisise okhuchula khuvakesi avo. 17Awenao, akalomalomwa nende omunabii Yeremia kosereswa:
18“Omwoyo kwawulirikha mu Rama,
embungu nende okhukukuula okhukali,
Raeli alirira avana vave,
siawochereswa ta,
khulwa okhuvera vosi vaweye.”
Okhukoola Okhuchula Misri
19Nga Herode kafwa, engelosi ya Omwami yachira Yosefu mumalocho Misri, yamuwolera, 20“Yinyokha, owukule omwana nende ng'ina okoole musialo sia Israeli okhuvera avatakhirenge okhwicha omwana vafwiye.” 21Yosefu kenyokha kawukula omwana nende ng'ina kakoola musialo sia Israeli. 22Nolu kawulira mbo Arkelao njowakoola musirenge sia simwana Herode ngomuchuki, karia okhukoolayo, ne okhuvera engelosi yali yimukanisie mumalocho, kamala achie Galilaya. 23Kachia, kamenya mulukongo lwa Nazareti, kho ako akachumbulwa nende avanabii kosereswe, “Anakhalangwe mbo Omunasareti.”
Currently Selected:
Matayo 2: LNTPP
Highlight
Copy
Compare
Share
Want to have your highlights saved across all your devices? Sign up or sign in
©The Bible Society of Kenya, 2024