Evikholwa 21

Paulo achia Yerusalemu

1Olu khwalekhana navo, khwanina emeri khwachia khwola mwikinga lia Kosi. Olutalo lwalondakho khwola Rode nokhuchula eweneyo khwachia Patara. 2Khwanyolayo emeri yichia Foinike khwengiramo khwachia nayo. 3Khwola aakhunyala okhuwona Kupro, khwayilekha khumukhono mukhasi khwachia okhwola Siria mana khwekhera mwitookho lia Tiro sikira emeri yenyekhanga yisire awenao emisiko. 4Khwanyola eweneyo avalondi mana khwekhalayo enyinga saba. Okhuvichira mu Roho, vakania Paulo vachi achachia Yerusalemu ta. 5Enyinga chiefwe echiokhwikhala eweneyo nichiakhawa, khwachekukha khwachianakana nolukendo. Vosi navakhaye vawe alala navana vachuerekesa okhwola vachuchusa mwitookho. Khwola khulukuku lwenyanja khwasikama aasi khwasala mana khwasewulana. 6Khwamala khwanina emeri kho navo vakoola engo.

7Nikhwakhamala olukendo lwa Tiro, khwachia Tolemai okhukhesa avasiefwe khwekhala navo olutalo lulala. 8Olutalo lwalondakho khwachekukha khwachia Kaisarea, khwengira munju ya Filipo omulandia wekhuwa, owali mulala khuvanju saba avali nivawuywe Yerusalemu ngavayetereri. 9Kali navana vave vakhana vane avali nivachatekha, avachusanga owunabii. 10Nikhusikhayeyo enyinga enditi, omunabii mbo Agabo kachayo okhuchula Yudea. 11Kachwichakho kawukula olukhova lwa Paulo kewoa amakhono namakulu mana kawola, “Roho Muchwenufu awola kano, ‘Avayahudi vachia okhuwoa mwene lukhova luno vachi mana vamuane mumakhono ka Avachali Avayahudi.’ ” 12Olu khwawulira kano, efwe alala nende avanju valiyo khwekalikhira Paulo mbo alekhe okhuchia Yerusalemu. 13Paulo kachipa, “Munakholanga sina, okhulira wusa nimuwumisa omwoyo kwange? Esendi tayari okhuwoywa ata nokhufwira Yerusalemu khulwelicha lia Omwami Yesu.” 14Nikhwakhakhirwa okhumuwomberesa khwawulera mana khwawola, “Elienya lia Omwami liekholekhe.”

15Nikhwakhekhalakhoyo, khwachekekha evinju viefwe mana khwachia Yerusalemu. 16Avalondi valala okhuchula Kaisarea vachia nafwe vachuyira munju ya Mnasoni owa Kupro. Mnasoni kali mulondi okhuchula khale ne kenyekhanga khuchie khwikhale ewuwe.

Paulo akeniya Yakopo

17Olu khwola Yerusalemu avasiefwe vachwingisa nowusangafu. 18Olutalo lwalondakho paulo kachuwukula khwachia naye ewa Yakopo, avasakhulu vekanisa vosi valiyo. 19Nikhwakhavakhesa, kavawolera kosi aka Nyasaye kali nakholire mu Avachali Avayahudi okhuvichira khuwukhalavani wuwe. 20Olu vawulira vafumia Nyasaye. Vamuwolera, “Mwana wefwe, onyala okhuwona wamwene, amaelefu ka Avayahudi vasuvira, mana vatira amalako vomisa. 21Vawoleywe okhulondana nawe, mbo wekesanga Avayahudi vosi avali muvialo vindi okhulova Musa. Ovawolera ochi vachakheva avana vawe ta nundi vachalonda emima kia Avayahudi ta. 22Khanu kalikhuva kachie? Okhwola valikhuwulira mbo wichire. 23Khanu khola nga khukhuwolera. Khuli navanju vane avalia esiechuvo, 24yewunga navo mumulukha kwawe okwokhwechwenula, ochunge nende evienyekha, mana vaveke emichwe kiawe. Wakhola ochio, vosi valikhumanya mbo aka vawoleywe khwiwe kowuveyi, nundi vachi wesi omenyanga okhulondana nende amalako ka Musa. 25Okhulondana nende Avachali Avayahudi avasuvira, khwavachumiye ebarua nikhuvawolera mbo valekhe okhulia siosisiosi esi vatisiye evifwananie, nende amalasire, nende esolo yosi eyemikire, nundi valekhane nesifwavi.” 26Paulo kawukula avanju avo kachia navo. Olutalo lwalondakho kakhola navo omulukha kwokhwechwenula. Kamala kachia mu Etemperi okhuana ekhuwa okhulondana nende enyinga chiokhumala emilukha kiokhwechwenula, nende esianwa siokhuanwa khulwa wuli mulala khunivo.

Paulo Atirwa mu Etemperi

27Olu enyinga saba chiali aambi okhuwa, Avayahudi va Asia avali ni vawene Paulo mu Etemperi vachwayirisa avanju mana vamutira. 28Vakhupa oluyoka, “Avanju va Israeli khuyetane! Ono njomunju onakendanga wuli awunju nikekesa avanju akawukhanire nende avanju va Israeli, akania amalako ka Musa nundi kengisise Avagiriki mu Etemperi nachafukisie Awunju achwenufu ano.” 29Vali vawene Trofimo, ochula Efeso, nivali nende Paulo mwitookho, vapara vachi Paulo kali amulechire mu Etemperi. 30Okukhero kwechula mwitookho omwo, navanju vatima vewusa alala. Vatira Paulo vamukhwesulula vamuchusa erwanyi wetemberi ne evise evio vekala eviriwa. 31Olu vali nivenya okhumwicha, ekhuwa liachira omukali wavamahe mbo Yerusalemu yosi yichuye okukhero. 32Awene nawene kawukula avamahe vasie vatima vachiayo. Olu vawona omukali wavamahe nende avamahe vasie, valekha okhukhupa Paulo. 33Omukali wamahe kachia aa Paulo kali kamutira mana kachusa ekhuwa mbo vamuwoe neminyololo kiviri. Kamala kacheva, “Ono njanu ne akholiresi?” 34Avanju valala vawola lino, avandi vawola eliawukhanire. Omukali wamahe sikamanyirisa esiali nisikholekhire ta sikira okukhero kwali kungi. Kalakirisa mbo vamuyire musiwoo. 35Olu vola khungasi, avamahe vamukinga sikira mbo okukhero kwali kwichuyechuye muvanju nivenya okhumukhupa. 36Esituma siavanju sialondakho nisiyokera, “Chie mumwichire aaleyi.”

Paulo Keteteya

37Nga Paulo kali nikenya okhwingiswa musiwoo, kawolera omukali wavamahe, “Khuwolerekho esinju?” Kawola, “Omanyire Olugiriki? 38Siniwe Omumisiri owanjisakho emiero anyumao, wemirira avasiku amaelefu kane okhuchula Asia wavayira musichimi?” 39Paulo kamuchipa, “Esendi Omuyahudi okhuchula Tarso eya Kilikia, omumenywa wetookho ekali. Khusava mbo nusima ndekhule nomalomekho navanju.” 40Olu kamuwa oweyangu, Paulo kema khungasi kekesa avanju nomukhono mbo vawulere. Nivakhawulera, kavalomalomera Muluebrania, kawola:

Currently Selected:

Evikholwa 21: LNTPP

Highlight

Copy