Evikholwa 20

Paulo Akola Makedonia nende Ewugiriki

1Okukhero nikwakhawa, Paulo kalanga avalondi vacha alala kavatinyirisa mana kamala kavalekha kachia Makedonia. 2Kavicha mumbeka omwo katinyirisa avanju namakhuwa amangi mana kamala kachia Eugiriki. 3Kekhala eweneyo emiesi kitachu, nolu kali ni kechekekha okhuchia Siria, kanyola ekhuwa mbo Avayahudi vali vamukhova. Kamala kachoola okhukoola navichira Makedonia. 4Sopatro, omwana wa Pirho okhuchula Berea kachia naye alala nende Aristariko nende Sekundo okhuchula Thesalonike; nende Gayo, owa Dabe, nende Timoteo; nende Tukiko nende Trofimo okhuchula Asia. 5Vachia vachulindira Troa. 6Efwe khwachula Filipi nikhwakhamala enyinga chiokhulia omukati kuchasimo emera, khwavanyola Troa nivakhamalayo enyinga chichanu, khwekhalayo navo khulwenyinga saba.

Paulo Akeniya Troa Olumalirisi

7Olutalo lwokhuchangira khwichuma, olu khwali nikhwikhaye alala okhulia esiokhulia, Paulo kavalomalomakho napara okhuchulayo olutalo lwalondakho. Kachanakana okhulomaloma amakhuwa kake okhwola akachi wesiro. 8Khwali nende etaa enyingi mukorofa omu khwali nikhwikhaye. 9Omuwukha mulala, owalangwa mbo Eutuko, kali kekhaye mwitirisia. Kanja okhuwungula olu Paulo kali nasilomaloma muwuleyi, olundolo chiamuminya, kakwa okhuchula mukorofa yakhatachu vamwangala nafwiye khale. 10Paulo kekha aasi kenama aakali, kamufumberera mana kawola, “Muchesindukha ta, owulamu wuwe wumulimo.” 11Olu kakoola amukulu kakhalaka omukati kalia mana kachanakana okhulomaloma navo okhwola olu wanukha namala achekukha. 12Vawukula omuwukha oyo vachia naye nimulamu emioyo kiawe nikiri emilekhule muno.

Achula Troa achia Mileto

13Efwe khwanina emeri khwachangira khwachia Aso eyi khwenyekhanga khuwukule Paulo nga kali napangire sikira kenya okhuchiayo navichira musiangalamwe. 14Olu kachunyola Aso, khwamuwukula khwachia naye okhwola mwitookho lia Mitulene. 15Nikhuchula eweneyi khwachira mumeri khwola mwikinga lia Kio olutalo lwalondakho. Olutalo lwokhuviri khwola mwikinga lia Samo ne olwalondakho nundi khwola mwitookho lia Mileto. 16Paulo kali achooye okhuchavichira Efeso sikira sikenya okhumalira evise Asia ta. Kali anaavananga mbo nikanyalikha kole Yerusalemu olutalo lwa Pentekote.

Elomaloma lia Paulo Emalirisi Khuvasakhulu Vekanisa lia Efeso

17Nali Mileto, kachumania ekhuwa Efeso mbo avasakhulu vekanisa vache vawukanane naye. 18Olu vacha kavawolera,

“Enywe mwavene mumanyire nga namenya nanywe enyinga chiosi okhuchula olutalo lwokhuchangirira nisena okhukulu khwange Asia. 19Nakhakhalavanira Omwami mukhwetutuya okhukali, nende mukhulira, nende mumatemo kosi akakhanjichakho okhuvichira mulienya lia Avayahudi. 20Sinariakho okhuvawolera siosisiosi esiowukhonyi khwinywe, nende okhuvekesa awulafu nende okhuchula khunju okhuchia khuyindi, 21ninjusa owuloli emberi wa Avayahudi nende Avagiriki oweliekanira khu Nyasaye nende esuvira mu Omwami wefwe Yesu Kristo. 22Khanu munjekerese, ndachianga Yerusalemu niriye Roho, ne simanyire esinanjekholekhanakho eweneyo ta, 23nichasi Roho Muchwenufu kambanga owuloli muwuli etookho mbo esiwoo nende esinyasio vinindire. 24Nausa simbonakho mbo owulamu wange wowukhonyi khwise ta, nisiri okhwoseresa omulango kwange nende owukhalavani owunanyola okhuchula khu Omwami Yesu, mbo njuse owuloli khu Injili yembavasi chia Nyasaye. 25Khanu manyire mbo enywe mwesi, ava nakhakendamo ninirwacha owami simunambonekho nundi ta. 26Khulwako, ndachusanga owuloli nyingayino mbo sindikho nesikha siosi khumalasire kenywe ta, 27esikira sinariakho okhuvawolera amakerako kosi aka Nyasaye ta. 28Mwilengere mwavene nende amakondi kosi aka Roho Muchwenufu kava wa mbo mwaye, mulinde ekanisa eli Nyasaye mwene kanyola okhuvichira mumalasire komwana wuwe. 29Manyire mbo ninakhachia, eviwulukhu evilulu virikhuvachamo siviri khulekhakho ekondi ata elala ta. 30Nundi avanju vali khwewukha okhuchula mwinywe nivawola owuveyi mbo vakhwese avalondi vavalonde. 31Khanu muve meso, mukhewulire mbo khulwemiaka kitachu esiro nesiteche sinalekhakho okhufuchira wulimunju namasika ta. 32Khanu esa yino, evacha mu Nyasaye nende mwikhuwa liembavasi chichie, elinyala okhuvombakha nokhuvawa omukavo kwosi oku kavikhira avanju vave. 33Sinekombakho efesa yomunju, namwe edhahabu namwe enguo ta. 34Mwavene mumanyire mbo amakhono kano njakambanga esi nenya siosi, ata nende avo avakhwali navo. 35Mumakhuwa kano kosi, navekesise mbo nikhukhola emilimo namaani khuchio, kenyekheye khuyete avatekhere, ni khukhewulira amakhuwa ka Omwami Yesu, nga kawola, ‘Okhuana khulimo ekhavi okhuvicha okhuwereswa.’ ”

36Nikakhamala okhuwola akenako, kasikama aasi kasala alala navo vosi. 37Vosi valira nokhumufumberera nivamusewula. 38Eliavaveresa olukali mu kosi njekhuwa eli kali nawoye, mbo sivanakhamuwonekho nundi ta. Vamala vamuerekesa vamwosa eyi emeri yali.

Currently Selected:

Evikholwa 20: LNTPP

Highlight

Copy