Tsinjelo 21
21
1Omwoyo kwomuruchi kuli mumukhono kwOMWAMI shinga tsikhwarul tsiamatsi;
akushiukhasinjia hosi aha yeenya.
2Buli injila yomundu neinunji mumonitsie omwene;
nebutswa OMWAMI achelanga emioyo.
3Okhukhola obulunjishi nende obukhalachi khumuchamisinjia OMWAMI okhushila okhumala omusango.
4Okhwilola, nende omwoyo kwobwichinjimisi,
nibio itaha yomutamaanu, ne nobwonooni.
5Amapaaro kabeshinani kachoomanga khubwikuru;
ne buli mundu ouyuyukhana, yoola khubutakha.
6Okhunyoola obuyinda khunjila yolulimi lwobubeeyi khubeetsanga omuuya omukhaya kwa abo abarunanga okhufwa.
7Amayukuba kabatamaanu kalabang'ulila eyo;
okhuba balobanga okhukhola akobukhalachi bwatoto.
8Injila ya oyo ouyombeelelwa nobubii neishiamu okhushila;
ne omweleleshe ye, ebikholebie nihabwene.
9Nobulayi okhumenya khunungo,
okhushila okhumenya halala nomukhasi womunwa munzu.
10Omutamaanu yeekombanga amabii;
owashie shianyoola okhukoosibwa mumonitsie tawe.
11Omukokonyi olwa akuumwa, oyo oubula amachesi achesihanga;
ne omuchesi olwa achesiyibwa, atiilanga obumanyi.
12Omulunjishi yeetsulilanga inzu yomumayaanu;
abamayaanu bakwisibungwa okhuula mukhutiba.
13Owikalanga amarwi khukhuhaaba khwomumanani,
naye yesi alilakaya, ne shialihulilwa ta.
14Eshihaanwa shiamasilisi shisiminjia obusinyishi,
ne eshiomufuusi shisiminjia oburima obululu.
15Nobusangaali khubalunjishi okhukhola obukhalachi bwatoto;
ne khubakholi bobubii, nobusasii.
16Omundu outiimatiima nalekha injila yokhumanyilisia alamenya mwibunjesi liebiinini biabafwa.
17Ouheelanga omwenya alaba omumanani;
ouheelanga idivai nende amafura shialaba omuyinda ta.
18Omumayaanu neshinunulo shiabalunjishi;
naye omukhobani khulwa omukololofu.
19Nobulayiokhumenyamushitsiimi okhushila okhumenya nomukhasi oweshibiiyile, owomunwa.
20Buliho obuyinda bwolukoosi muho, halala namafura mushimenyo shiomuchesi;
ne omundu omuyingwa abimilanga pe.
21Oulondanga obulunjishi nende tsimbabasi anyoolanga obulamu nende oluyali.
22Omuchesi aniinanga khulukoba lwelitaala liabamaani,
niyeesia tsingufu tsiobusuubilifu bwalio hasi.
23Oulindanga omunwakwe nende olulimilwe yeelindanga omwene khumanyakhano.
24Omundu omwichinjimisii oweisunga, eliiralie nomukokonyi;
akholanga mubutsaalishi bwobwichinjimisii.
25Obwikombi bwomukara bumwiranga;
okhuba amakhonoke kalobanga okhukhola emilimo.
26Aliho oukhaayungwa niyeekomba eshiteere shiosi;
ne omundu omulunjishi ahaananga; shiyeemananga ta.
27Omusango kwomumayaanu neshisinyo;
nokhushila muno, olwa akuleeranga namapaaro amatamaanu.
28Omuloli omubeeyi alatiba;
ne omundu ouhulilanga alaboola akayindila.
29Omundu omutamaanu yeeyuminjia mumoni;
ne omukololofu ye, ayililisinjia khunjilatsie.
30Shibuliho obuchesi bwosi, kata okhumanylisia, kata obwibaali,
obunyala okhufukula OMWAMI ta.
31Ifarasi yirechesheelwe inyanga yelihe;
nebutswa obuhuli nobwOMWAMI.
Currently Selected:
Tsinjelo 21: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
