Luka 6

Abeechi bakhuunuula ingano khuSabato

(Mat. 12.1-8; Mk. 2.23-28)

1Khunyanga yindi yaSabato yali nabira mundalo tsieingano; abeechibe nibakhuunuula ingano, nibafunga mumakhono kabwe nibalia. 2Ne abandi abokhubaFarisayo nibasunga bari Mbushiina nimukhola akali omusilo okhukhola khunyanga yaSabato? 3Yesu nakalusia, nabasunjila ari Shimwasooma kata kano ta, aka Daudi yakhola olwa yali nali inzala halala naba yali ninabo? 4Mbu yeenjila munzu yaNyasaye nabukula Emikaate chiOkhubaho, nalia, nabaheelesiakhwo aba yali ninabo, echili omusilo omundu yesi okhuchiliakhwo, habula abakuhani bonyene? 5Nababoolela ari Omwana wOmundu niye Omwami waSabato.

Omundu owomukhono okwanyela

(Mat. 12.9-14; Mk. 3.1-6)

6KhuSabato yindi khandi yeenjila musinagogi niyeechesia; ne yalimwo omundu owa omukhonokwe omusaatsa kwali nikwanyela. 7Abahandiichi nende abaFarisayo nibamuyichila okhulola naba niyakhahonia khuSabato, mbu banyoole shinga olwa bakhamwinjilila itookho. 8Ne yamanya amapaaro kabwe, nasunjila omundu oyo owa omukhonokwe kwanyela ari Buukha, osinjile hakari. Naye nabuukha nasinjilaho. 9Yesu nabasunjila ari Emureeba, mbu kafuchiililwa okhukhola amalayi nohomba okhukola amabii khuSabato? Okhuhonia obulamu bwomundu nohomba okhubutibia? 10Nabahenga bosi, eyi nende eyi, namusunjila mbu Kololosia omukhonokwo; naye nakhola ario, omukhonokwe nikukalukha habwene. 11Nabo nibasinyikha shia abeenya okhwilia, nibasungana abeene khubeene, eshia bakhamukholela Yesu.

Abeechi ekhumi nababili balobolwa

(Mat. 10.1-4; Mk. 3.13-19)

12Ne mundaalo etsio yarula natsia mushikulu okhusaaya, nahonga eshilo tulu nasaayanga Nyasaye. 13Ne olwa bwashia, yalanga abeechibe, nalobola ekhumi nababili khubo, aba yakulikha mbu abarume; 14mbabano, mbu Simoni, owa yakulikha mbu Petero, nende Anderea omwana wabwe, naYakobo naYohana, naFilipo naBaritsolomayo, 15naMatsayo naTomasi, naYakobo waAlufayo, naSimoni oulangwa mbu Zelote, 16naYuda waYakobo, nende Yuda Isikariote, owali omukhobi.

Yesu yakhalabanila abemikanda emikali

(Mat. 4.23-25)

17Naye nakholomokha ninabo nasinjila hashikuuri, halala nende omukanda omukhongo kwabeechibe, nende abandu abanji abarula mubuYahudi mwosi nende eYerusalemu, nende khulukuku IweTiro nende Sidoni, abali nibeetsile okhumuhulila, nende okhuhonibwa obuteshele bwabwe; 18nabo abanyasibungwa nabaroho beshifwabwi nibahonibwa. 19Abomukanda bosi nibakhaaba obwiyangu okhumutiilakhwo; okhuba obunyali bwali niburulanga khuye, nibubahonia bosi.

Aketsikhabi, nakaWoowe!

(Mat. 5.1-12)

20Nachinguula tsimoni khubeechibe, naboola ari

Muli abeikhabi inywe abamanani; shichila obwami bwaNyasaye nobweenywe.

21Muli abeikhabi inywe abali neinzala bulaano; shichila muleekusibwa.

Muli abeikhabi inywe abalila bulaano; shichila mulatsekha.

22Muli abeikhabi inywe olwa bamukiya nibamuboona, nibamunyeka, nibasukuna eliira lieenywe shinga likhuwa libii khulwa Omwana wOmundu. 23Mwikhoye khunyanga eyo, nimusiilasiila khulwa obusangaali; shichila lole, omukabo kweenywe nomunji mwikulu; okhuba nilwo olwa abakuuka babwe bakholela abanabii.

24Ne wowe, inywe abayindal shichila mumalile okhunyoola obulemibwi bweenywe.

25Woowe, inywe abeekuure bulaano!

Shichila inzala yilamuluma. Woowe, inywe abatsekha bulaano!

Shichila muleekhuula nimulila.

26Woowe, olwa abandu bosi bamupaakanga!

Shichila nilwo olwa abakuuka babwe bakholela abanabii bobubeeyi.

Akokhuheela abasuku

(Mat. 5.38-48; 7.12)

27Nasi emuboolela inywe abahulilanga, mbu Heelenje abasuku beenywe, nimubakholela amalayi abamukiya; 28mubasaayile abamulaka eshilaka munwa, baheebwe ikhabi, nimubasabila abamukhupia khumabii. 29Oukhupaama oluseya lulala, omumanyie olundi naIwo; noyo oubukula likotilio, ne inguboyo eyomukari oramwima tawe. 30Omuheelesie buli mundu oukhusaba eshindu; noyo oubukula emianduchio, orachisaba khandi ta. 31Ne shinga olwa mwenya abandu bamukholelenje inywe, nineenywe mubakholelenje murio.

32Ne nimuba nimubaheela abamuheelanga inywe, obwo nobukoosia shi? Shichila kata aboonooni baheela abo ababaheelanga. 33Khandi nimuba nimubakholelanga amalayi abamukholela inywe amalayi, obwo nobukoosia shi? Shichila kata aboonooni bakholanga bario. 34Ne nimuba nimubahosinjia abo aba musuubilanga okhunyoola khubo ebindi, obwo nobukoosia shiina? Kata aboonooni bahosinjia aboonooni ebindu, mbu bakalusilibwe bario. 35Ne butswa heelenje abasuku beenywe, nimubakholela amalayi, nimubahosiakhwo ebindu nimurafwa emioyo ta; mana omukabo kweenywe kulaba omunji, neenywe mulabeetsanga abaana baOyo Ouli Ikulu Muno; shichila ye noweshisa khubamakalu nende ababii. 36Mubeelenje tsimbabasi, shinga Seenywe olwa abeelanga tsimbabasi.

Akokhukhalachila abandi

(Mat. 7.1-5)

37Ne murayaasinjia omundu eshiina, mana inywe shimulayaasibwa tawe; kata murabakhalachila eshiina, mana inywe shimulakhalachilwa eshiina tawe; bohololenje, mana mulabohololwa. 38Haanenje, nineenywe mulaheebwa; eshichelo eshilayi, eshiikaarwe, eshisungusilwe, eshibumbilwe okhusundukha hasi, nolwa balachela mungubo tsieenywe; okhuba eshichelo shiene eshia muchelelangamwo, nishio eshia mulachelelwamwo khandi.

39Khandi nababoolela muluchelo, ari Omubofu anyala okhwimilila omubofu washie? Shibalakwa bombi mubuko? 40Omwechibwa yesi shiashila omwechesiawe ta, ne buli mundu olwa aba nakholilwe omulamba, alaba shinga omwechesiawe olwa ali.

41Kata mbushiina nohenganga akhakokha akhali mumoni yowashio, noreetsulilakhwo eshirundu eshili mumoni yiyo ta? 42Kata wakhanyala orie okhumuboolela owashio mbu Mwana, lekha ekhuyinie akhakokha akhali mumoniyo, ne noralolanga eshirundu eshio eshili mumoni yiyo? Omwikaatii iwe, ranjilila oyinie eshirundu eshili mumoni yiyo, mana olalola bulayi okhuyinia akhakokha akhali mumoni yowashio.

Omusaala kumanyikha khulwa ebiamo biakwo

(Mat. 7.17-20; 12.34-35)

43Shichila kubulaho omusaala kwosi omulayi okwamanga ebiamo ebibii, kata omusaala omumayaanu kurio okwamanga ebiamo ebilayi. 44Shichila buli musaala kumanyishilanga khubiamo biakwo okwene. Shichila khubisisia abandu shibanokangakhwo amakhuyu ta, kata khumatsoyi shibanokangakbwo tsinzabibu tawe. 45Omundu omulayi okhurula mwibiildlo lilayi eliomumwoyokwe arusinjiamwo ebili ebilayi; noyo omubii okhurula mwibiikho libii arusinjiamwo ebili ebibii; okhuba khulwa obunji obwomumwoyo omunwakwe kuboolanga.

Omute kwolwanda, nomuse kwomuyeshe

(Mat. 7.24-27)

46Ne nishiina eshichila nimunanganga mbu Omwami, Omwami, nimurahulila aka emboolanga ta? 47Buli mundu ounzitsilanga nahulila amakhuwa kanje nakakhola, ndalamumanyia shinga olwa afwana; 48afwanana nende omundu owoombakha inzu, nayaba hasi muno, nakhupa omuse khulwanda; ne olwa emikhula chieetsa, omuchela nikukhupa inzu eyo namaani, nikuranyala okhuchireesia ta; okhuba yoombakhwa bulayi. 49Naye ouhulilanga narakhola ta, afwanana nende omundu owoombakha inzu khwiloba aharali omuse ta; omuchela nikukhupa inzu eyo namaani, ne habwene nahabwene niyikwa; okhusasikha khweinzu eyo nikhuba okhukali muno.

Currently Selected:

Luka 6: OUV

Highlight

Copy