Luka 11

Aka Yesuyeechesia khukobusaayi

(Mat. 6.9-15; 7.7-11)

1Olwa yali nasaayilanga habundu wundi, ne niyakhalekha, oundi owokhubeechibe yamusunjila ari Omwami, okhwechesie okhusaaya, shinga Yohana olwa yeechesia abeechibe. 2Nabasunjila mbu Olwa musaaya musunjenje muri: Seefwe, Eliiralio liriibwe, Obwamibwo bwitse. 3Okhuheelesie inyanga shia inyanga ebiliibwa bieefwe bieinyanga. 4Nokhuleshela ebionoono bieefwe, shichila nineefwe khuleshelanga buli mundu ouli nelikobi khwifwe. Norakhuyila mukhuteemwa ta.

5Nabasunjila ari Niwina khwinywe ouba nali nende omwitsa, mana natsia ewuwe mushilo hakari, namusunjila ari Owashianje, ukhoonyekhwo nemikaate chitaru; 6okhuba omwitsa wanje undi yeetsile ewanje narula khuluchendo, nasi shindikhwo nende eshia emurenjeshela ta; 7naye nakalusia, nali munzu, naboola mbu Lekha okhunyasia; omuliango kumalile okhwikalwa, neefu khukonanga nabaana banje; shinyala okhubuukha ekhuheelesie ta? 8Emuboolela mbu naba narakhabuukha wamuheelesiakhwo khulwa obwitsa ta, khane khulwa obulumilifubwe alabuukha namuheelesia chiosi echia yeenya. 9Nasi emusunjila mbu sabe, mulaheebwakhaabe, mulanyoola; khong'onde, muleekulilwa. 10Okhuba buli mundu ousaba aheeba; noukhaaba, anyoola; noukhong'onda, aleekulilwa.

11Kata niwina khwinywe owakhaba nali omwibuli, omwanawe namusaba omukaate, wamuheelesia lichina? Kata inyeeni, naye mushilenje shieinyeeni wamuheelesia inzokha? 12Kata naba nasaba libuyu, yakhamuheelesia likatia noho? 13Kho inywe abali ababii olwa mumanyile okhubaheelesia abaana beenywe ebihaanwa ebilayi, Seenywe owomwikulu shialashila muno okhubaheelesia Roho Omutakatifu abo abamusaba?

Yesu nende Beelezebuli

(Mat. 12.22-30; Mk. 3.19-27)

14Ne yali narusinjia lidimoni lindi lisilu; ne olwa lidimoni liali nilirulile, omundu oyo omusilu yaboola; abemikanda nabo nibachenya. 15Nebutswa abandi khubo basunga mbu Arusinjia amadimoni khulwa obunyali bwaBeelezebuli omwami wamadimoni. 16Abandi nibamuteema, nibamusaba eshilolelo eshirula mwikulu. 17Nebutswa yamanya amapaaro kabwe, nabasunjila ari Buli buruchi obubeetsanga nibwahukhaane obwene khubwene, bukwitsanga amakunda, inzu nayo yikwitsanga khunzu yindi. 18Kata Setani yesi naba nabeetsanga niyaahukhaane omwene khumwene, oburuchibwe bulanyala burie okhusinjila? Shichila musunganga mbu erusinjia amadimoni khulwa obunyali bwaBeelezebuli. 19Ne isie nimba nirusinjia amadimoni khulwa obunyali bwaBeelezebuli, kho abaana beenywe bakarusinjia khulwa obunyali bwawina? Khulwako bo balamukabukhasilia amakhuwa. 20Ne isie nimba nirusinjia amadimoni khulwa olwala lwaNyasaye, kho Obwami bwaNyasaye bumuulilekhwo.

21Omundu wamaani owimanuule ebimanulwabie olwa alindanga litaalalie, emianduchie chiba shisale; 22ne omundu undi oumushila amaani olwa amwitsila namuhula, amunuula ebimanulwabie biosi ebia yali nasuubililanga, nakabula ebiyaayobie.

23Ouraba ninasi halala ta, yafukulanga; nourakhung'aasia ninasi ta, asalaasinjia.

Okhukalukha khwaroho weshifwabwi

(Mat. 12.43-45)

24Ne roho weshifwabwi olwa aba narulile mumundu, abiranga aha amatsi kabula, nakhaaba aha ahuluushila; ne naranyoolile ta, amalanga aboole ari Lekha engalushe munzu yanje omwa ndarula. 25Ne olwa yoolamwo, anyoola niyeyilwe niying'oonilwe. 26Mana atsia yeenda abaroho bandi musaafu abamushila obubii, beenjila bamenyamwo; mana obumaliilishi bwomundu oyo buba obubii okhushila shinga olwa yabeelenje.

Ikhabi yatoto

27Ne olwa yaboola amakhuwa ako, omukhasi undi mumukanda yachinguula omwoyo, namusunjila ari Nebieikhabi inda eyakhwibula, nende tsimbeele etsia wanuuna. 28Naye nakalusia, mbu Ne elishila elo, nabeikhabi abo abahulilanga amakhuwa kaNyasaye nibakalinda.

Olwibulo olwnayaanu olwenya eshilolelo

(Mat. 12.38-42; Mk. 8.12)

29Ne olwa emikanda chiali nichikhung'aananga ewa yali, yachaaka okhuboola mbu Olwibulo luno nolwibulo olumayaanu; Iwenyanga eshilolelo; ne shilulaheebwakhwo eshilolelo shiosi ta, habula eshilolelo shiaYona. 30Okhuba shinga Yona olwa yeekhola eshilolelo khubaNinewe, nolwa Omwana wOmundu alaba eshilolelo khubolwibulo luno. 31Omuruchi omukhasi oyo owesautsi alibuukha mumuse halala nende abandu abolwibulo luno, nabakhalachila eshiina; shichila ye yarula khundulo weshibala okhuhulila obuchesi bwaSulemani; ne lole, oushila Sulemani ali hano. 32AbaNinewe balisinjila mumuse halala nende abolwibulo luno, nibalukhalachila eshiina; shichila bo beekalukhasilia obwilwatsii bwaYona; ne lole, oushila Yona ali hano.

33Abulaho omundu ouhambia itaha, mana wachira hasi mungulu, kata okhuchifuunikhakhwo eshimwelo, habula okhuchira khushichibi shiayo, mbu mana abeenjilanga balole obulafu bwayo. 34Itaha yomubilikwo niyo imoniyo; kho imoniyo niyiba habwene, omubilikwo kwosi nakwo kuba nikwitsuulemwo obulafu; ne niyiba imbii, omubilikwo nakwo kuba nikwitsuulemwo eshiilima.

Itaha yomubili

(Mat. 5.15; 6.22-23)

35Kho ohenje bulayi, obulafu obuli mwiwe buleshe okhuba eshiilima. 36Niko akachila, omubilikwo kwosi nikuba nikwitsuulemwo obulafu, nikubula nende eshitonye shiosi eshilimwo eshiilimD, kulaba nikwitsuulemwo obulafu bwonyene, shinga olwa itaha yakhanga niyikhulangaalila.

Yesu yafukula abaFarisayo nabakhulundu bamalako

(Mat. 23.1-36; Mk. 12.38-40; Lk. 20.45-47)

37Haho olwa yali naboolanga, omuFarisayo undi yamulanga okhulia ebiliibwa ewuwe; naye niyeenjila, niyeekhala habiliibwa. 38Ne olwa omuFarisayo oyo yalola, yahuka okhuba shiaranjiliile okhusaaba narashialia ta. 39Omwami namusunjila ari Mbula, inywe abaFarisayo mulabinjia eshikombe nende eshikaye emukongo wabio, ne mukari mweenywe mubeetsanga nimwisuulemwo obunuuli nende obumayaanu. 40Abasilu inywe, oyo owalonga ebielwanyi shiali ye owalonga nende ebiomukari nabio niina? 41Nebutswa muhaanenje ebieshisa khubienebio ebili mukari; ne lole, ebindu biosi bilamubeelanRa ebisiiye.

42Ne woowe, inywe abaFarisayo! Shichila mwahulanga eshitonye shielikhumi shiokhuminanaa, nende likhubi, nende buli eliani, nimumaayia obukhalachi bwatoto nende obuheeli bwaNyasaye; niko aka mwali nimukhoyeele okhukhola, oburalekha okhukhola akeene kalia ta.

43Woowe, inywe abaFarisayo! Shichila muheelanga ebifumbi ebiambeli mutsisinagogi, nokhushiesibwa muluyia.

44Woowe khwinywe! Shichila mwingana ebilindwa ebiralolekha ta, abandu abachendanga hekulu khubio nibaramanya tawe.

45Mana mulala khubakhulundu bamalako nakalusia namusunjila ari Omwechesia, nosunga orio okhunyekanga nineefwe fwesi. 46Nasunga mbu Woowe kata khwinywe abakhulundu amalako! Shichila mutuukhanga abandu emisiiko echirachinjikha bulayi ta, neenyu abeene shimutiilangakhwo khumisiiko echio kata nende olwala lulala tawe.

47Woowe khwinywe! Shichila muumbakhanga ebilindwa biabanabii, ne abakuuka beenywe nibo ababeera. 48Kho muli abaloli, khandi muchamanga ebikhole biabakuuka beenywe; shichila bo nibo ababeera, neenyu muumbakhanga ebilindwa biabwe. 49Niko akachila obuchesi bwaNyasaye bwaboola mbu Ndalabarumila abanabii nende abarume; nabandi khubo balabeera nibabeelusia; 50mbu mana amabanga kabanabii bosi akeebeena okhurula khumusuule kabanzwe khubolwibul o luno 51okhurula khumabanga kaAbeli okhuula khumabanga kaZakaria, owafwila hakari weshimalilo shiemisango nende ihekalu; toto, emuboolela mbu kalibanzwa khubolwibulo luno.

52Woowe, inywe abakhulundu bamalako! Okhuba mwayiniaho eshibohololo shiobumanyi; inywe shimwayeenjilanga abeene ta, khandi mwayinjila abeenabo abali nibeenjilanga.

53Ne olwa yali narulile mubwenomwo, abahandiichi nende abaFarisayo bachaaka okhumusukuha muno, nibamureka emibero mumasungoke, 54nibamukoneshelanga, okhutiila khwikhuwa elia aboola.

Currently Selected:

Luka 11: OUV

Highlight

Copy