Luka 10

Amakhumi-musaafu barumwa

1Haho inyuma wamakhuwa ako Omwami yaraho abandi amakhumi musaafu, nabaruma babili babili imbeliwe mubuli litaala nende buli handu hosi ewa omwene yali nali okhutsia. 2Nabasunjila ari Lichesa nelikhongo, habula abakholi nabatuutu; kho musaaye Omwami omwenechesa mbu arume abakholi mwichesalie. 3Mutsie khunjila tsieenywe; lole, emuruma shinga ebimeeme biamakondi hakari mubisuutse. 4Murachinga iloloti, kata omufuuko, kata ebilaaro ta; kata murashiesia omundu yesi khunjila tawe. 5Ne munzu yosi eya mwinjilamwo, ranjilile muboole mbu Omulembe kube munzu yino. 6Ne naba nalimwo omundu womulembe, omulembe kweenywe kuleekhala khuye; ne nabulamwo, kho kulakalukha khwinywe khandi. 7Ne mutong'e munzu mwenomwo, nimuliitsamga nende okhunywa ebia bamuha; shichila omukholi wemilimo akwanile omushaarakwe. Murahuyahuyanga okhurula omwo okhwinjila omwo tawe. 8Ne litaala liosi elia mwinjilamwo, nibamwinjisia, liitsenje khubienebio ebia bamurenjeshela; 9Ichandi muhoninjie abalwale ababa nibalimwo, nimubasunjila muri Obwami bwaNyasaye busitile ahambi nineenywe. 10Ne litaala liosi elia mwinjilamwo, nibaramwinjisia ta, mutsie ebulafu munjila tsialio, nimuboola muri 11Kata olufu Iwelitaala lieenywe oluhandile khubilenje bieefwe, khulweyanga nikhumufukula; nebutswa mumanye lino, mbu obwami bwaNyasaye busitile ahambi. 12Emuboolela mbu kalibakhwo amaangu khunduukho eyo khulwa Sodomu, okhushila shinga olwa kalibeela litaala lieenelo.

Woowe khumatookho akareekalukhasia ta

(Mat. 11.20-24)

13Woowe khwiwe, Korazini! Woowe khwiwe, Betsesaida! Shichila emilimo chiamakana echiakholelwa mwinywe chilaba nichiakholelwa muTiro nende Sidoni, khane bakheekalukhasiye khale, nibeekhaale nibeefwalile amakunia nibeepuuka likoshe. 14Nebutswa kalibakhwo amaangu khulwa Tiro nende Sidoni mushiina okhushila shinga olwa kalimubeela inywe. 15Nawe, Kaperinaumu, witsa okhuchinguulwa mwikulu? Mbula, witsa okhwisibwa okhuula eMakombe.

16Oumuhulila inywe, yambulila isie; noumufukula inywe, yafukula isie; noufukula isie amafukula oyo owaruma.

Amakhumi-musaafu abo bakalukha

17Mana abo amakhumi musaafu bakalukha nibasunga bari Omwami kata amadimoni kakhuhulilanga khulwa eliiralio. 18Naye nabasunjila ari Ndamuluutsi Setani nakwile shinga oluhenu, okhurula mwikulu. 19Lole, ndamuheele obunyali okhuseena khunzokha nende khumakatia, nende khubunyali bwosi bwomusuku oyo, kata shibulaho eshilamusaalisiakhwo ta. 20Habula mureekhoyelanga ako, mbu abaroho bamuhulilanga, ta; ne mwikhoyenje shichila ameera keenywe kahandiikwa mwikulu.

Okhwikhoya khwaYesu

(Mat. 11.25-27; 13.16-17)

21Khushise shieneshio yeekhoya muRoho Omutakatifu, naboola mbu E Papa, Omwami welikulu nende eshibala, ekhuupila orio shinga olwa wabisa abachesi nabarechelefu amakhuwa kano, nokabisulila abaana abahele; orio, Papa, okhuba nolwa kakaasa imbeliwo. 22Papa yambeelesia ebindu biosi; ne abulaho oumanyile Omwana, mbu niye wina, habula Samwana; kata Papa, mbu niye wina, habula Omwana, nende omundu yesi owa Omwana achama okhumubisulila.

23Mana nashiukhanila abeechibe, nabasunjila mabiswi, ari Netsieikhabi tsimoni etsilolanga ebia mulolanga inywe, 24shichila emuboolela mbu abanabii abanji nende abaruchi abanji bali nibeekombanga okhulola ebia mulolenga inywe, nibarabilola ta; nokhuhulila aka muhulilanga inywe, nibarakahulila ta.

OmuSamaria omulayi

25Ne lola, omukhulundu wamalako undi nasinjila namuteema, ari Omwechesia, nekhole endie mbu mana enaamilwe obulamu bwobumeli? 26Naye namureeba mbu Kahandiikwa karie mumalako? Osoomanga orie? 27Nakalusia, nasunga mbu Omuheelenje Omwami Nyasayewo nende omwoyokwo kwosi neshiimoshio shiosi namaaniko kosi, nende obuyililisibwo bwosi; nende owashio shinga olwa wiheela omwene. 28Naye namuboolela mbu Okalusiye habwene; kholanga orio, mana olabeetsanga nobulamu.

29Naye niyeenya okhwiha obulunjishi; kho yamureeba Yesu ari Ne owashianje niye wina? 30Yesu nakalusia naboola mbu Omundu undi yali nakholomokha narula eYerusalemu okhutsia eYeriko; nakwa mubanuuli, nabo nibamufwalula tsingubo nibamwara tsinguma, nibatsia, nibamulekha nali shinga oufwa. 31Kho keekhola mbu omukuhani undi yali nakholomoshela khunjila eyo; ne olwa yamulola, nabira elubeka. 32Khandi omuLawi yesi ario, olwa yoolaho namulola, yabira elubeka. 33Nebutswa omuSamaria undi olwa yali nali khuluchendo, yoolaho ewa yali; ne olwa yamulola, eshisa shiamutiila, 34natsia ewa yali, naboha tsingumatsie, natsukhakhwo amafura nende idivai; namuniinia khumuruko okwa yali nachendelangakhwo, namuyila enanzu yobucheni, namukasilia bulayi. 35Mana mukamba yayinia tsitinari tsibili, natsiheelesia omwenenzu, naboola mbu Omulinde bulayi; ne etsia wakheekhoonyele nitsiakhashila tsino, isie ninjeleele ndalakhurunga. 36Oluutsi orie, khubeenabo bataru niwina oweekhola owashie khumwenoyo owakwa mubanuuli? 37Naye nakalusia mbu Oyo owamubeela tsimbabasi. Yesu namubiila ari Nawe tsia, okholenje orio.

Yesu yacheniha ewaMaritsa naMariamu

38Haho olwa bali khunjila nibashitsia, yeenjila mwitaala lindi; mana omukhaana undi oweliiralie mbu Maritsa yamwinjisia munzuye. 39Ne yali nomukhaana wabwe oulangwa mbu Mariamu; naye niyeekhala hamakulu kaYesu, nahulilanga amakhuwake. 40Nebutswa Maritsa yali natiyiishe khulwa obunji bwokhutitiikhana; namwitsila, naboola mbu Omwami, shioteebakhwo likhuwa khumukhaana weefwe, shinga olwa yandeshile okhutitiikhana sienyene? Kho omubiile yakhoonye. 41Ne Omwami nakalusia, namusunjila ari Maritsa, Maritsa ohendelanga nofulukhanila ebindu ebinji; 42ne eshienywa neshindu shilala shionyene; okhuba Mariamu yeeloboleele omukabo omulayi, okuramubukulwakhwo ta.

Currently Selected:

Luka 10: OUV

Highlight

Copy