Yohana 20

Okhulamukha

(Mat. 28.1-10; Mk. 16.1-8; Lk. 24.1-12)

1Mana khunyanga yambeli eyomwihonga Mariamu Magadalene niyeetsa mumabwibwi, eshialo nishishimaliihe, niyoola khushilindwa, nalola lichina nilirusiibwe khushilindwa. 2Kho natsia tsimbilo, niyoola khuSimoni Petero, nende khumwechi undi oyo owa Yesu yaheela, nabasunjila ari Bamuyiniye Omwami mushilindwa, ne shikhumanyile ewa bamureele ta. 3Kho Petero narula, halala nende omwechi undi oyo, nibachooma okhutsia enashilindwa. 4Nibeelukha bombi; ne omwechi undi oyo namuyomba Petero, naranjilila okhuula khushilindwa; 5niyeenama nahengamwo, nalola tsingubo tsieisanda yeikitani nitsikonileho; nebutswa nareenjilamwo ta. 6Mana Simoni Petero yesi niyoola namulondangakhwo, naye niyeenjila mung'ani; nalola tsingubo tsieisanda yeikitani nitsikonileho, 7nende eshitambaya eshiabeele khumurwekwe nishirakonile nende isanda yeikitani ta, ne nishikanyilwe haundi shionyene. 8Mana omwechi undi oyo yesi niyeenjilamwo, owatsana owaranjilila okhuula khushilindwa, naye nalola, nasuubila. 9Shichila bali nibashili okhumanya eshisina shiamahandiiko, mbu akhoyile okhulamukha okhurula mukhufwa. 10Mana abeechi abo nibakalukha ebunango wabwe.

Yesu yamuloleshela Mariamu Magadalene

(Mk. 16.9-11)

11Naye Mariamu yali nashisinjiile elwanyi, hashilindwa, nalila amasika; ne nalilanga ario, niyeenama nahenga mung'ani, 12nalola abamalaika babili nibeekhaale, mulala ebunamurwe noundi ebunabilenje, aha omulambo kwaYesu kwakonile. 13Nibamureeba bari Mama, olililanga shiina? Naye nabasunjila ari Shichila bamubukuule Omwami wanje, ne shimanyile ewa bamureele ta. 14Olwa yali nasunjile ario yashiukhana emukongo, nalola Yesu nasinjiile, ne naramanya shinga olwa ali Yesu ta. 15Yesu namureeba ari Mama, olililanga shiina? Okhaabanga wina? Naye nakaala mbu nomulindi womukunda okwo; namusunjila ari Omwami, noba nomuyilile haundi, umboolele ewa omureele, nasi ndalamurusiayo. 16Yesu namusunjila ari Mariamu. Naye niyeeshebukha, namusunjila muluHeburania ari Raboni; eshisina mbu Omwechesia. 17Yesu namusunjila ari Orandiilakhwo tawe; okhuba eshili okhukulukha ewaPapa; ne otsie ewa abaana beefwe bali, obasunjile mbu Endi okhukulukha enzie ewaPapa, niye Seenywe; ewaNyasaye wanje, niye Nyasaye weenywe. 18Mariamu Magadalene niyeetsa nababoolela abeechi ari Emuluutsi Omwami; khandi shinga olwa yali namubooleele amakhuwa ako.

Yesu yaloleshela Abeechi

(Mat. 28.16-20; Mk. 16.14-18; Lk. 24.36-49)

19Mana olwa bwali nibwilile khunyanga eyo, niyo eyambeli eyomwihonga, emiliango olwa chieekalwa ewa abeechi bali khulwa okhuria abaYahudi; habwenaho Yesu yeetsa, nasmjila hakari, nabasunjila ari Omulembe kube khwinywe. 20Ne olwa yali nasunjile ario, yabamanyia amakhonoke nende mumbafu. Abeechi nabo nibasangaala muno, olwa bamulola Omwami. 21Mana Yesu nabasunjila khandi, ari Omulembe kube khwinywe; shinga Papa olwa yaruma isie, nindio emuruma inywe. 22Ne olwa yali nasunjile ario yabaheelela omuuya, nabasunjila mbu Bukule Roho Omutakatifu; 23abo bosi aba mubaleshela ebionoono biabwe, babilesheelwe; ne abo bosi aba mulekha nibashihandile khubionoono biabwe, balalekhwa bario ninabio.

Tomasi yabula obusuubili

24Ne Tomasi, mulala owokhwIkhumi-nababili abo, owalangwa mbu Mukhwana, shiyali nali ninabo olwa Yesu yeetsa ta. 25Kho abeechi bandi nibamusunjila bari Khumuluutsi Omwami. Naye nabasunjila ari Nimba nindalola tsimbala tsiemisumari mumakhonoke, kata okhura olwala lwanje khumbala tsiemisumari, nokhura omukhono kwanje mumbafutsie, shisuubila ta.

26Ne olunyuma lwetsindaalo munaane, abeechibe bali nibali mubwenomwo khandi, nibali nende Tomasi halala. Yesu niyeetsa, emiliango nichiikaale, nasinjila hakari, nabasunjila ari Omulembe kube khwinywe. 27Mana namusunjila Tomasi ari Leera olwalalwo hano, olole amakhono kanje; khandi leera omukhonokwo, okure mumbafu tsianje; noraba omundu ourasuubila ta, habula owobusuubili. 28Tomasi nakalusia namusunjila mbu Omwami wanje, khandi Nyasaye wanje. 29Yesu namusunjila ari Okhuba unduutsi, kho osuubiile; nabeikhabi abeenabo abasuubiile, nibaraluutsi ta.

Lichoomo lieshitabu

30Khandi Yesu yakhola ebilolelo bindi ebinji imbeli wabeechibe, ebirahandiikwa mushitabu shino ta; 31ne bino bihandiichilwe mbu musuubile shinga Yesu olwa ali ye Kristo watsana, Omwana waNyasaye; khandi mbu nimusuubiile, mube nobulamu khulwa eliiralie.

Currently Selected:

Yohana 20: OUV

Highlight

Copy