Yohana 19

1Mana Pilato namubukula Yesu, namunywekha. 2Abasikari nabo nibasinga olusimbi lwamahwa, nibalura khumurwekwe, nibamufwala ingubo yeisambarau; 3nibamwitsila, nibasunga bari Mulembe, Omuruchi wabaYahudi! Nibamupaama tsikhofi. 4Pilato narula khandi, nabasunjila ari Lole, endi okhumurusia nimuleera khwinywe, mumanye mbu shinduutsi eshikha shiosi muye ta. 5Mana Yesu narula, nafwalilwe olusimbi lwamahwa nende ingubo yeisambarau. Pilato nabasunjila ari Omundu ngwoyo! 6Kho olwa abakhulundu babakuhani nende abakhalabani abo bamulola, bayiiba, nibasunga bari Omubambe, omubambe khumusalaba! Pilato nababoolela ari Inywe mumubukule, mumubambe khumusalaba; okhuba isie shinduutsi eshikha shiosi muye ta. 7Nabo abaYahudi nibamukalusia mbu Khuli nende lilako, ne khwilako elo akhoyile okhufwa, shichila omwene yeekhola Omwana waNyasaye.

8Olwa Pilato yahulila likhuwa elo, yameeta okhuria, 9niyeenjila khandi muPraitorio, nareeba Yesu ari Warula heena? Naye Yesu shiyamukalusia likhuwa liosi ta. 10Kho Pilato namureeba ari Shiumboolelakhwo likhuwa ta? Shiomanyile shinga olwa endi nobunyali okhukhulekhuula, khandi endi nobunyali okhukhubamba khumusalaba? 11Yesu namukalusia ari Shiwakhabakhwo nobunyali bwosi khwisie, norakhabuheebwa okhurula mwikulu tawe; niko akachila oyo owayareele mumukhonokwo ali nobwonooni obukhongo okhushila. 12Habwenaho Pilato nakhaaba shinga olwa anyala okhumulekhuula; nebutswa abaYahudi nibayiiba, nibasunga bari Noba nomulekhuula omundu uno, shioba noli omwitsa waKaisari ta; buli mundu yesi owikhola omwene omuruchi, amufilkula Kaisari. 13Kho olwa Pilato yahulila amakhuwa ako, yarusia Yesu elwanyi, niyeekhala khushifumbi shiobuyaasi, habundu ahalangwa mbu Obwelu bwamachina, ne muluHeburania mbu Gabatsa. 14Ne yali inyanga yokhwikhwanilia Pasaka; ne yali shinga isaa yakhasasaba. Naye nasunjila abaYahudi ari Omuruchi weenywe ngwoyo! 15Nabo nibayiiba, bari Murusie, murusie, omubambe khumusalaba. Pilato nabareeba ari Khane nemubambe Omuruchi weenywe? Abakhulundu babakuhani nibakalusia bari Shikhuli nende omuruchi ta, habula Kaisari. 16Mana namuhaana mumakhono kabwe mbu abambwe khumusalaba.

Yesu yabambwa khumusalaba

(Mat. 27.32-44; Mk. 15.21-32; Lk. 23.26-43)

Kho nibamubukula Yesu; 17naye narula, omwene nachinjile omusalabakwe, okhuula habundu ahalangwa mbu Habundu haShihanganga, ahalangwa muluHeburania mbu Gologotsa; 18habwenaho nibamubambilaho khumusalaba, nende abandi babili halala ninaye, oundi elubeka noundi elubeka, naye Yesu hakari. 19Khandi Pilato nahandiika eliira, nalira khumusalaba; nilihandiikwa liri YESU WENAZARETI, OMURUCHI WABAYAHUDI. 20Ne abanji abokhubaYahudi basooma eliira elo; okhuba habundu yaho ewa Yesu yabambwa hali ahambi nende litookho; nalio liahandiikwa muluHeburania, nende muluLatini, nende muluYunani. 21Kho abakhulundu babakuhani babaYahudi nibamusunjila Pilato bari Orahandiika mbu Omuruchi wabaYahudi, ta; habula mbu Ye yaboolanga ari Nisie Omuruchi wabaYahudi. 22Pilato nakalusia ari Elia ehandiichile, emalile okhuhandiika.

23Mana abasikari olwa bali nibamalile okhumubamba Yesu khumusalaba, babukula ebiifwalobie, nibabikabula emikabo chine, buli musikari omukabo; khandi nende inguboye eyomukari; ne ingubo eyo eyomukari shiyali nende obunabilo bwosi ta; yalukhwa bulukhwa yosi, okhurula ikulu. 24Nibasungana bari Khuleshe okhuchirandula, ne khuchiupile ikha, ounochibukule niwina? Mbu lihandiiko liusibwe, elisunga mbu

Bakabana ebiifwalo bianje,

Nibakhupa ikha khungubo yanje.

Niko aka abasikari bakhola .

25Ne baliho nibasinjiile ahambi nende omusalaba kwaYesu, nyinamwana, nende omukhaana wabwe nyina, niye Mariamu mukha Kulopa, nende Mariamu Magadalene. 26Kho olwa Yesu yalola nyina, nende omwechi oyo owa yaheelanga nasinjiileho, yasunjila nyina ari Mama, omwanawo ngwoyo! 27Mana nasunjila omwechi oyo ari Mawo ngwoyo! Habwene nahabwene omwechi oyo namuyila ewuwe.

Okhufwa khwaYesu

(Mat. 27.45-56; Mk. 15.33-41; Lk. 23.44-49)

28Olunyuma lwako, Yesu, namanyile mbu amakhuwa kosi kali uikahweele. Mbu lihandiiko liusibwe yasunga ari Obuloho bundia. 29Ne yali niyirenjeekhweho isiongo yeidivai eyiraanyile; nibabukula eshiangwe eshiali nishiitsuulemwo idivai eyiraanyile eyo, nibashira khulusi, nibayila khumunwakwe. 30Olwa Yesu yali namalile okhubukula idivai eyiraanyile eyo, yasunga mbu Kahweele; niyeenamia omurwe, nahaana rohoye.

Yesu yafumirwa mumbafu

31Ne okhuba yali inyanga yokhwikhwanilia, abaYahudi basaba Pilato mbu bafunakwe ebilenje nibarusibwaho, mbu emilambo chileshe okhutong'a khumisalaba khuSabato ta; shichila inyanga yasabato eyo yali inyanga ikhongo. 32Kho abasikari nibeetsa, nibafunaka ebilenje biowambeli oyo, nende ebioundi oyo owa yabambwa ninaye; 33ne olwa boola khuYesu, nibalola shinga olwa amalile okhufwa, shibamufunaka ebilenje ta; 34nebutswa mulala khubasikari abo yamufumira mumbafu nende lifumo; ne habwene nahabwene amabanga nende amatsi nikarulamwo. 35Nomwenoyo owalola yarumbula akobuloli, nobulolibwe nabwo nobwatoto; khandi amanyile mbu aboolanga akatoto, mbu nineenyu mwesi musuubile. 36Okhuba amakhuwa kano keekhola mbu lihandiiko liusibwe, mbu Likumbalie liosi shililifunakwakhwo ta. 37Khandi lihandiiko lindi liboola liri Balmmuhenga oyo owa bafumira.

Yesu yaalisibwa mung'ani

(Mat. 27.57-61; Mk. 15.42-47; Lk. 23.50-56)

38Nolunyuma lwamakhuwa ako, Yusufu oweArimatsaya, owali omwechi waYesu, ne mabiswi, shichila yaria abaYahudi, yasaba Pilato mbu abukule omulambo kwaYesu; naye Pilato namuheelesia omunwa. Kho niyeetsa, nabukula omulambokwe. 39Khandi Nikodemo yesi niyeetsa, omwenoyo owamwitsila olwambeli mushilo, nali nende omutsokasio kwamanemane nende tsisubili, ebihela shinga tsiratili eshikhumi. 40Nabo nibabukula omulambo kwaYesu, nibakuboha musanda yeikitani halala nende amalesi ako, shinga eshiima shiabaYahudi eshiokhuyabila abafu olwa shiali. 41Ne habundu yaho ewa yabambilwa, kwaliho omukunda; nomumukunda okwo yalimwo ing'ani imbia eya omundu yesi arashiaalisibwamwo ta. 42Kho muyeneyo niyo eya bamwalisiamwo Yesu, khulwa amakhuwa kokhwikhwama khwabaYahudi, shichila ing'ani eyo yali ahambi.

Currently Selected:

Yohana 19: OUV

Highlight

Copy