Yohana 14

Yesu niye injila eyitsia khuSamwana

1Omwoyo kweenywe kuleshe okhubeeyabeeya ta; musuubililanga Nyasaye, musuubilile isie siesi. 2Munzu yaPapa mulimwo ebimenyo ebinji; nikaba nikarabeele kario ta, khane ndakhamubooleele; okhuba enzia okhumukasilia habundu. 3Ne nimba ninzia nimukasilia habundu, ndaleetsa khandi nimwinjisia ewanje, mbu ewa endi isie, nineenywe mwesi mubeho. 4Ne ewa enzia, mumanyile injila eyitsiayo. 5Tomasi namureeba ari Omwami, shikhumanyile ewa otsia ta; ne khwakhamanya khurie injila? 6Yesu namuboolela mbu Isie nisie injila, khandi obwatoto, khandi obulamu. Abulaho owitsila Papa narabirila khwisie ta. 7Nimwakha'manyile, khane mwakhamumanyile nende Papa yesi; nokhurula olwa leelo mumumanyile, khandi mumuluutsi.

8Filipo namusunjila ari Omwami, okhumanyiekhwo So watsana; ako kakhakhuhela. 9Naye Yesu namusunjila mbu Khane ndabeelenje nineenywe eshise eshirambi shiri nanwa, nawe noshili okhu'manya, Filipo? Ounduutsi isie amuluutsi Papa; kho oboola orie, mbu Okhumanyie Papa? 10Shiosuubilanga shinga olwa endi muPapa, khandi Papa shinga olwa ali mwisie, ta? Amakhuwa aka emuboolelanga, shingaboola khubwanje ta; ne Papa oumenyanga mwisie neniye oukholanga emilimochie. 11Mu'suubile, shinga olwa endi muPapa, khandi Papa mwisie; kata mbu mu'suubile khulwa emilimo chiene nachio. 12Toto mwene, emusunjila mbu ousuubililanga isie, emilimo echia ekholanga, yesi alachikhola; kata alakhola echishila echio; shichila enzia khuPapa. 13Ne liosi liosi elia mulasaba muliira lianje, ndalalikhola, mbu Papa aheebwe oluyali muMwana. 14Nimuba nimu'saba likhuwa liosi muliira lianje, ndalalikhola.

Yesu yasuubisia okhuruma Roho Omutakatifu

15Nimuba nimu'heela, mulahulilanga amalako kanje. 16Nasi ndalamusaaya Papa, naye alamuheelesia Omuhabini undi, abeetsenje nineenywe obushia nobushia, 17neniye Roho wobwatoto; owa eshialo shiranyala okhumwinjisia ta okhuba shishimulola kata okhumumanya tawe. Inywe mumumanyile, okhuba amenyanga nineenywe, khandi alaba mwinywe. 18Shindalamulekha ababisandu ta; eni okhumwitsila. 19Neshise eshitiiti butswa, mana eshialo shishindolakhlwo khandi ta; ne inywe mundola. Ne okhuba endi mwoyo, neenyu mwesi mulaba mwoyo. 20Khunyanga eyo mulamanya shinga olwa endi muPapa, neenyu mwisie, nasi mwinywe. 21Ouli ninako amalako kanje nakahulilanga, niye ouheelanga isie; noyo ouheelanga, alaheelwa nende Papa, nasi ndalamuheela nimumanyishila. 22Mana Yuda, ourali Isikariote ta, namusunjila mbu Omwami, kabeele karie owenya okhukhumanyishila ifwe, ne khushialo tawe? 23Yesu nakalusia namusunjila mbu Omundu naba niyambeela isie, alahulilanga amakhuwa kanje; Papa naye alamuheela, ne khulamwitsila, nikhukhola eshimenyo shieefwe ninaye. 24Ourambeela ta shiahulilanga amakhuwa kanje tawe; ne likhuwa elia muhulila shinelianje ta, habula eliaPapa owaruma.

25Amakhuwa kano emubooleele olwa eshimenyanga nineenywe. 26Ne Omuhabini oyo niye Roho Omutakatifu, owa Papa alaruma muliira lianje, alamwechesia amakhuwa kosi, namwitsusia khumakhuwa kosi aka ndamusunjilanga. 27Omulembe emuleshela; omulembe kwanje emuheelesia; ne shimuheelesia shinga shialo olwa shihaananga tawe. Emioyo chieenywe chieshe okhubeeyabeeya kata okhuria. 28Muhuliile shinga olwa emubooleele, ndi Nzinyokha, khandi emwitsila. Nimuba nimu'heelile, mwakheekhoyile, shichila enzia khuPapa; okhuba Papa yashila isie. 29Ne bulaano emubooleele nikashili okhwikhola, mbu olwa kaba nikeekholile, musuubile. 30Shindalasungana nineenyu muno khandi ta, okhuba omukhulundu weshialo shino ali okhwitsa, ne shiali neshindu khwisie ta; 31habula mbu eshialo shimanye shinga olwa emuheela Papa; khandi shinga Papa olwa yandachilisia, niIwo olwa ekhola. Buushe, khutsie.

Currently Selected:

Yohana 14: OUV

Highlight

Copy