Yeremia 34
34
Yeremia yachesiyia Zedekia
1Likhuwa elieetsela Yeremia okhurula khuMWAMI, olwa Nebukhadineza omuruchi waBabeli, nelihelie liosi, naboburuchi bwosi bwebialo obwali mubunyalibwe, baseera Yerusalemu namataala kalio kosi, ndielino; 2mbu Kano niko aka OMWAMI, Nyasaye waIsiraeli, aboola; mbu Tsia osungane naZedekia omuruchi waYuda, omuboolele ori Kano niko aka OMWAMI aboola; mbu Lola, ehaana litookho lino mumukhono kwomuruchi waBabeli, naye alalisamba nomulilo. 3Shioleehonokokha mumukhonokwe ta, ne olabukulwa nohaanwa mumukhonokwe; tsimonitsio tsilalola tsimoni tsiomuruchi waBabeli, naye alasungana ninawe, omunwa khumunwa, ne olatsia eBabeli. 4Nebutswa hulila likhuwa liOMWAMI, iwe Zedekia omuruchi waYuda; kano niko aka OMWAMI aboola khukoko; mbu shiolifwa khulwa olukanga ta. 5Olifwila mumulembe; ne shinga olwa basambila abakuukabo, abaruchi bakhale abakhuranjilila, nolwa balakhusambila iwe amaleesi; ne balakhwikhuula, bari Bayaye, Omwami! Okhuba okhuboola emboolile; nilwo olwa OMWAMI asunga.
6Mana Yeremia omunabii yaboolela Zedekia omuruchi waYuda amakhuwa ako kosi eYerusalemu, 7olwa lihe liomuruchi waBabeli liaseerana nende Yerusalemu namataala kosi kaYuda akali nikasikaale, mbu Lakhishi nende Azeka; okhuba khumataala ketsingoba kaYuda, niko konyene akatong'a.
Indakano khukabakholi abakula abali abaHeburania yoonoonibwa
8Likhuwa elieetsela Yeremia okhurula khuMWAMI, olwa omuruchi Zedekia yali nalakaane indakano nende abandu bosi abali eYerusalemu, okhubarumbulila akobulekhuuli; 9mbu buli mundu alekhuule omusumbawe nomukholiwe omukula oweshikhasi, naba nali omuHeburania; mbu omundu yesi aleshe okhumukhola omusumba omuYahudi omwana wabwe. 10Nabo abakhulundu nende abandu bosi nibahulila, abo bosi abali nibeenjiile mundakano tsana mbu buli mundu alekhuule omusumbawe kata omukholiwe oweshikhasi, baleshe okhubakhola abasumba khandi ta; bahulila, nibabalekhuula. 11Nebutswa olunyumakhwo bashiukhana, nibakalusia abasumba abo nabakholi beshikhasi, aba bali nibalekhuulile; nibabakalusia muburukwi babe abasumba nabakholi beshikhasi. 12Khulwako likhuwa liOMWAMI nilimwitsila Yeremia okhurula khuMWAMI; 13liri Kano niko aka OMWAMI, Nyasaye waIsiraeli, aboola; mbu Ndalakana nabakuuka beenywe indakano khunyanga eya ndabarusia mushialo shiaMisiri, okhurula munzu yobunyakhani; nimboola mbu 14Emiyika olwa chilabeetsanga nichihweele musaafu, mulekhuule buli mundu omwana wabwe ouli omuHeburania ouba niyakhukusibwa, ne namalile okhukhukholela emiyika chisasaba; omulekhuule akhurulekhwo. Nebutswa abakuuka beenywe shibayambulila kata okhureka amarwi ta. 15Neenyu mwali nimushiukhaane, nimukholanga akali amalayi mumoni tsianje, nimurumbulanga akobulekhuule, buli mundu khuwashie; khandi mwali nimulakaane ninasi indakano munzu eyo eyikulikhwa khuliira lianje; 16nebutswa mwamala mushiukhane nimwonoonia eliira lianje, nimukaiusia buli mundu omusumbawe nabuli mundu omukholiwe oweshikhasi, aba mwali nimulekhuulile shinga olwa bachama; nimubakalusia muburukwi, okhubeetsanga abasumba beenywe nabakholi beenywe beshikhasi. 17Khulwako kano niko aka OMWAMI aboola, mbu Shimwayambulila ta, okhurumbula akobulekhuuli, buli mundu khumwana wabwe nabuli mundu khuwashie; ne lole, isie emurumbulila inywe obulekhuuli bundi, OMWAMI aboola; mbu khulukanga, nokhuluumbe, nokhunzala; ndalamukhola mube eshiriisio mubwami bwosi bweshialo. 18Ne abandu abo abakhaya indakano yanje, nibaroosia amakhuwa keindakano eya bakhola imbeli wanje, ndalabakhola shinga eshimoosi eshia baarasia ebitonye bibili, nibabira hakari wabio, 19mbu abakhulundu baYuda nabakhulundu baYerusalemu, nabasumba abalate, nabakuhani, nabandu bosi beshialo, ababira hakari webitonye bieshimoosi tsana. 20Ndalabahaana mumakhono kabasuku babwe, nomumakhono ka abo abayiima obulamu bwabwe; emilambo chiabwe nachio chilakwa ebiliibwa biamanyonyi akomwikulu nende tsisolo etsiomushialo. 21Naye Zedekia omuruchi waYuda, halala nabakhulundube, ndalabahaana mumakhono kabasuku babwe, nomumakhono ka abo abayiima obulamu bwabwe, mbu mumakhono kelihe liomuruchi waBabeli, elimurulilekhwo. 22Lole, ndalalachilisia, OMWAMI aboola, nimbakalusia khwitookho lino; nabo balaliseera, nibalibukula, nibalisamba nomulilo; ne ndalakwisia amataala kaYuda amakunda, aharali abamenyamwo ta.
Currently Selected:
Yeremia 34: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
