Isaya 49
49
Omusumba wOMWAMI alaba obulafu khumahanga
1Inywe tsinguku, mumbulile;
ninywe tsimbia tsiabandu abali ehale, reche amarwi;
okhurula khulubeleshelo, OMWAMI yananga;
okhurula munda yamama yarumbulanga eliira lianje;
2khandi yakhola omunwa kwanje shinga olukanga olumemu;
yambisa mushiinikha shiomukhonokwe;
khandi yakhola eshisele eshirelele,
niyamhiikha butinyu mumotiaye.
3Niyamboolela ari Niwe omusumba wanje;
Isiraeli, owa ndaleenyoolelamwo oluyali.
4Nasi ndasunga mbu Ndanyakhaane butswa,
ndamalile amaani kanje mumakhuwa amakhaya, akabutswa;
ne toto mwene, OMWAMI niye ouli nobwatoto bwanje,
khandi Nyasaye wanje niye ouli nomurungo kwanje.
5Ne bulaano OMWAMI aboola,
ye owanonga okhurula khulubeleshelo mbu embe omusumbawe,
okhukalusia Yakobo khuye,
nokhumukhung'aasilia Isiraeli;
shichila endi owoluyali mumoni tsiOMWAMI,
khandi Nyasaye wanje yeekholile amaani kanje;
6toto, aboola ari
Nelikhuwa eliangu elirahela ta, iwe okhuba omusumba wanje okhubuusia tsimbia tsiaYakobo,
nende okhukalusia abalindwa baIsiraeli;
ndalakhuheelesia khandi mbu obe obulafu khubamahanga,
mbu obuhonia bwanje buule khushihesi shieshialo.
7Kano niko aka OMWAMI,
omununuli waIsiraeli khandi Omutakatifuwe,
aboolela oyo owa abandu bafwola, oyo owasinya lihanga liosi,
omusumba wabaami, mbu
Abaruchi balalola nibabuukha;
nabakhulundu, nibeenama;
khulwa OMWAMI oubeetsanga omwisiikwa,
niye Omutakatifu waIsiraeli, owakhuloboole.
Aka Sayuni okhukalusibwa habwene
8Kano niko aka OMWAMI aboola, mbu
Khushise shiokhukoosia ndakhukalusiyemwo,
khandi khunyanga yobuhonia ndakhukhoonyile;
ne ndalakhulinda, nikhuhaana obe indakano yabandu,
okhubuusia eshialo,
okhubaliisia amakunda okhuba obulaame bwabwe;
9nimbaboolela ababohe mbu Murule;
nabali mushiilima, mbu Mwilolosie.
Balaayanga khunjila,
khandi khubikulu ebikhaya balaba nende obwayilo.
10Inzala shiyilabaluma kata obuloho okhubalia ta;
kata omuyeka kweshimiyu kata omubasu shikulabalia tawe;
shichila ye oubabeela tsimbabasi alabeemilila,
khandi alabeebaalila injila ahambi nende tsisebele tsiamatsi.
11Khandi ndalakhola ebikulu bianje biosi injila,
emihanda chianje nachio chilachinguukha.
12Lola, yabo balarula ehale;
khandi lola, yabo okhurula enotsi khandi okhurula mumbo;
nende yabo okhurula mushialo shiaSinimu.
13Iwe likulu, yimba, nawe eshialo, otsatsahale;
nineenywe tsingulu, murundushe munyimbo;
shichila OMWAMI yalemiye abandube,
nabakholela akeshisa abandube abasanda.
14Nebutswa Sayuni yaboola mbu OMWAMI yandeshile,
khandi Omwami yanzibiliile.
15Omukhasi yakhanyala okhwibilila omwanawe oushinuuna,
naramukholela akeshisa omwana wolubeleshelolwe, noho?
Toto, bano bakhanyala okhwibilila;
nasi shindakhakhwibilila iwe ta.
16Lola, ndakhusaarile khubikalo biamakhono kanje;
olukobalwo lusinjilanga imbeli wanje obushia nobushia.
17Abakhuumbakha baanguha okhushila abo abakhulikulula;
abakhukwisia likunda barula mwiwe.
18Chinguula tsimonitsio tsimbeka tsiosi, olole;
bano bosi beekhung'aasia halala mbu bakhwitsile.
OMWAMI aboola mbu Isie uno!
Olabeefwala bosi shinga eshisiaho,
nobeebohela, shinga olwa omweha akhola.
19Shichila amakundako nende obwonooneshibwo nende eshialoshio eshiamululwa,
toto mwene olabafwindisia abamenyanga mwiwe;
nabo abakhumila balaba ehale.
20Abaana bobulekhwabwo balamala basunje mumarwiko bari Habundu hano nahafwindikhu;
undiyanjile, enyoole ewa emenya.
21Mana olasunga mumwoyokwo ori
Niwina owanzibulila bano,
olwa ndafwilwa, nindi omukumba, ninzarwa;
ne niwina owaooola?
Lola, ndalinji sienyene eshisoma;
bano, kho barula heena?
22Kano niko aka Omwami NYASAYE aboola; mbu
Lole, ndalachinguulila amahanga omukhono kwanje,
nimbasinjisilia abetsimbia tsiabandu eshiloleio shianje;
nabo balaleera abaanabo abasiani khubilifu biabwe,
abaanabo abakhaana nabo balachingwa khumabeka kabwe.
23Nabaruchi balaba abaso abakhwola,
nende abakhaye babwe abamawo abakhunuunia;
balakhwinamilia obweni bwabwe hasi,
nibakhomba olufu olwokhubilenjebio;
nawe olamanya mbu nisie OMWAMI,
khandi mbu abanindiililanga shibalafwimbwa omurwe ta.
24Owamaani anyala okhunuulwa eshioluyitsishie,
kata abahambwa nowamariisia okhuhonibwa noho?
25Ne kano niko aka OMWAMI aboola; mbu
Kata aba owamaani yahamba balabukulwa,
khandi eshioluyiitsi shiowamariisia shilahonibwa;
shichila ndalamuyingania oukhuyingania iwe,
khandi ndalahonia abaanabo.
26Nabeenabo abakhusandia iwe, ndalabaliisia inyama yemibili chiabwe abeene;
khandi bala neela amabanga kabwe abeene, shinga abameelile idivai;
nabandu bosi balamanya mbu isie OMWAMI endi omuhoniawo,
khandi omununuliwo, Omwene Bunyali waYakobo.
Currently Selected:
Isaya 49: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
