Isaya 48
48
Obulakusi khukebindu ebiyiakha
1Hulile kano,
inywe abeinzu yaYakobo,
abalangwa eliira mbu Isiraeli,
nimurula mumwo yaYuda;
abeetsubanga khuliira liOMWAMI,
nimurumbula Nyasaye waIsiraeli,
habula mubwatoto kata mubulunjishi tawe.
2Okhuba beelanganga mbu nabelitookho litakatifu,
nibeeleeta khuNyasaye waIsiraeli;
eliiralie niye OMWAMI omwene mahe.
3Ndeelwatsile amakhuwa akambeli, okhurula khale;
toto, karula mumunwa kwanje, ningalolosia ebulafu;
shialwangu ndakakhola, ne kamala nikeekhola.
4Shichila ndamanya mbu oli omutinyu,
likosilio nalio nelikhanu lieshibia,
ne obwenibwo nomukasa;
5niko akachila nikhuboolela okhurula khale;
nikashili okhwikhola, ndakhumanyiye;
mbu oleshe okhuboola mbu Eshifwanani shianje shikakholile,
eshifwanani shianje eshibaatse, kata eshifwanani shianje eshisalule, shikalachile.
6Wakahuliile; lolakanokosi;
neenyu, shimulakeelwatsa?
Emumanyia amakhuwa amayia okhurula olwa leelo,
niko akamabiso, aka oramanya ta.
7Kalonjilwe bulaano, okhurula khale ta;
nokhuula olwa leelo shiwakahuliile tawe;
mbu oleshe okhuboola ori Mbula, ndakamanya.
8Toto mwene, shiwahulila ta; toto, shiwamanya ta;
toto, okhurula khale amarwiko shikayeekukha ta;
shichila ndamanya shinga olwa wakholanga akobukhobani muno,
khandi shinga olwa walangungwa mbu omukhayi okhurula khulubeleshelo.
9Khulwa eliira lianje eshindia oburima bwanje,
khandi khulwa ifuma yanje ekhwisimilisilia,
endeshe okhukhwatisia.
10Lola, ndakhuteemile, habula shinga ifeetsa ta;
ndakhuchelile mumulilo omululumu kwobusandibwi.
11Khulwanje omwene, khulwanje omwene, ekhola;
mbula eliira lianje liakhoonoonibwa lirie?
Oluyaii lwanje shimuheelesia oundi ta.
OMWAMI okhununula Isiraeli
12Urechele amarwi, iwe Yakobo,
khandi Isiraeli omulanje wanje;
nisie ye; nisie owambeli,
khandi nisie omumaliilishi.
13Toto mwene, omukhono kwanje kwakhupa eshialo omuse,
khandi omukhono kwanje musaatsa kwabambula likulu;
olwa embilanganga,
bisinjilanga halala.
14Inywe mwesi, mwikhung'aasie, muhulile;
niwina mubo owayeelwatsile amakhuwa kano?
Owa OMWAMI aheelanga aloosia aka yeenya khuBabeli,
nomukhonokwe kulaba khubaKalidayo.
15Isie omwene ndaboolile; toto, ndamulanjile;
ndamwendile; ne alakaasanga khunjilaye.
16Site ahambi ninasi, muhulile;
okhurula khukhuchaaka shindaboolile masilisi ta,
nokhurula olwa keekhola, ndalinjiho;
ne bulaano Omwami NYASAYE yarumile nende Rohowe.
17Kano niko aka OMWAMI, omununuliwo, Omutakatifu waIsiraeli,
aboola; mbu
Nisie OMWAMI Nyasayewo,
oukhwechesinjia akakhukhoyeele,
oukhwimililanga khunjila eya okhoyile okhutsiilakhwo.
18Shiakhuha waba niwahuliile amalako kanje!
Mana omulembekwo kwakhabeele shingana omwalo,
nende obulunjishibwo shinga amarunda akeinyanza;
19olwibulolwo nalwo lwakhabeele shingana omuyeshe,
nende abarula mundayo shinga tsinzalu tsiakwo;
eliira lialwo shiliakhakhaliishe kata okhwakamibwa imbeli wanje ta.
20Murule eBabeli, mwilushe abaKalidayo;
mwilwatse kano nende omwoyo kwokhwimba,
mukaboole nimukarumbula okhuula khushihesi shieshialo;
mbu OMWAMI yanunuule Yakobo omusumbawe.
21Ne olwa yabeemilila mubitsiimi biomuyeshe obuloho shibwabalia ta;
yabarusilia amatsi mulwanda;
khandi yaarasia olwanda, amatsi nikafututukha.
22OMWAMI aboola mbu Khubamayaanu, kubulaho omulembe.
Currently Selected:
Isaya 48: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
