Isaya 41
41
Aka Nyasaye yasuubisia Isiraeli
1Muholeele imbeli wanje, inywe tsinguku;
abandu nabo basakulushe;
basite ahambi, mana baboole;
khusitilane ahambi khulwa obukhalachi.
2Niwina owabuusiye oundi okhurula ebukwe,
owa obuhuli bwakaanilanga hosi hosi ewa atsia?
Oumuheelesinjia amahanga, nakwisia abaruchi imbeliwe?
Abarusinjia babe shinga olufu khulukangalwe,
ne khubuyingobwe shinga olububa oluchingwa nomuyeka.
3Abalondachilila, nabira shisale,
kata khunjila eya ebilenjebie biralondelakhwo ta.
4Niwina owakhola akeenako nakoosia,
nalanganga tsinzibulo okhurula khukhuchaaka?
Nisie OMWAMI, owambeli,
nahalala nende obumaliilishi, isie nisie.
5Tsinguku tsialola nitsiria;
tsindulo tsieshialo tsiatechela;
basita ahambi, niboola.
6Buli mundu akhoonyana nende owashie;
khandi buli mundu asunjila owashie mbu tinyie.
7Omubaatsi natinyisia omwiraanyi weitsahaabu,
naye oukhupilanga inyoli namutinyisia ulia oukhupilanga khwiyika,
naboola khumilimo chiokhuunga, mbu Nobulayi;
nabitiila nende emisumari mbu bileshe okhusikukha.
8Ne iwe, Isiraeli, omusumba wanje,
Yakobo owa ndalobola,
olwibulo lwaAburahamu omwitsa wanje;
9niwe owa ndatiila okhurula khundulo tsieshialo,
nikhulanga okhurula khushihesi shiashio,
nikhuboolela mbu Niwe omusumba wanje,
ndakhuloboole nindakhusukuna ta;
10oraria tawe,
okhuba endi ninawe halala;
orafwa omwoyo ta, okhuba isie nisie Nyasayewo;
ekhuheelesia amaani; toto mwene, ekhukhoonya;
toto, ekhuleeta nomukhono kwanje musaatsa okuhulanga.
11Lola, abo bosi abakhusinyishilanga balatiilwa tsisoni nibafwimbwa omurwe;
abakhuyinganinjia shibalaba eshindu ta, nibatiba.
12Olabakhaaba, ne shiolabanyoola ta,
abeenabo abayingana ninawe;
abo abakhuseera shibalaba eshindu ta;
balakhama pe.
13Okhuba isie OMWAMI Nyasayewo ekhutiila omukhono musaatsa,
nikhusunjila mbu Oraria tawe;
ndalakhukhoonyanga.
14Oraria ta, iwe Yakobo inyende,
nineenywe oruIsiraeli;
ndalakhukhoonyanga; nolwa OMWAMI aboola;
ne omununuliwo niye Omutakatifu waIsiraeli.
15Lola, ekhukhola obe eshihuulilo eshiyia eshimemu eshili nende ameeno;
olahuula tsingulu, notsitubula,
nokhola ebikulu shinga omukhuutsi.
16Olabibisia, nakwo omuyeka kulabiyila,
khandi eshiimbalakusi shilabisalasia;
nawe oleekhoyela OMWAMI,
olamufumia Omutakatifii waIsiraeli.
17Abamanani nende abatakha bakhaaba amatsi, ne kabulaho;
tsinimi tsiabwe natsio tsihalaashe khulwa obuloho;
nasi OMWAMI ndalabahabina,
isie Nyasaye waIsiraeli shindalabalekha tawe.
18Embisula emialo khubikulu ebikhaya,
nende tsisebele mumabanda;
ekhola eshitsiimi litiba liamatsi,
nende eshialo eshiumu, tsimoni tsiamatsi.
19Eraaka mushitsiimi omusiita,
nende omupeeli, nende omuhatasi, nende omubono;
esimikha mushitsiimi shiomuyeshe omutaraakwe,
nende omutitsari, nende omuteyashuri, chiosi halala;
20mbu balole, nibamanya,
nibayililisia, nende okhutiila khushisina, bosi halala,
shinga olwa kuli omukhono kwOMWAMI okwakholile,
khandi shinga olwa ali Omutakatifu waIsiraeli owalonga.
21OMWAMI aboola mbu Rumbula eshifuneshio;
Omuruchi waYakobo aboola mbu Leera amakhuwako.
22Abanyasaye chino chikaleere,
chikhuboolele akeetsa okhwikhola.
Chikhuboolele ebisina biamakhuwa akamalile okhubira,
khukayililisiekhwo.
Chikhuboolele amakhuwa akali okhwitsa,
khumanye akalarulamwo.
23Khaboole akaleekhola olunyumakhwo;
mana khulamanya mbu muli abanyasaye toto.
Khakholekhwo, kata amalayi kata amabii,
khung'ang'aale nikhutechela.
24Lole muli butswa;
ebikhole bieenywe nebikhaya;
oumulobola inywe noweshisinyo.
OMWAMI nalanga abanyasaye okhulolosia obunyali bwachio
25Embuusiye oundi okhurula enotsi, naye witsile;
nokhurula aha eliuba lifwindilanga, ne alafumia eliira lianje;
naye alarulila khubeemilisi shinga ouseena amatoyi,
kata shinga omulonji olwa aswala litoyi.
26Niwina owakeelwatsa okhurula khukhuchaaka, mbu khumanye?
Kata khale, mbu khuboole Habwene!
Toto mwene, abulaho ouboola, toto mwene abulaho oumanyia,
toto mwene abulaho ouhulila amakhuwa keenywe.
27Nisie ouranjilila okhuboolela Sayuni mbu Lola, ngako;
khandi eheelesia Yerusalemu oundi ouleera amakhuwa amalayi.
28Ne olwa ehenga, abulaho omundu,
kata mubo abulamwo omwibaali oukalusia likhuwa olwa embareeba.
29Lole, bosi nibutswa;
emilimo chiabwe nemikhaya;
ebifwanani biabwe ebisalule nomuyeka nende obukoyaani.
Currently Selected:
Isaya 41: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
