Isaya 38
38
Obulwale bwaHezekia
(2 Abaru. 20.1-11; 2 Akets. 32.24-26)
1Mundaalo tsienetsio Hezekia yalwala, naba ahambi okhufwa. Ne Isaya omunabii, omwana waAmozi, yamutsiila namusunjila ari Kano niko aka oMWAMI aboola; mbu Kasia amakhuwa keinzuyo; okhuba witsa okhufwa, shiwitsa okhuhona ta. 2Mana Hezekia yeeshiukhasia nahenga khwisiisi, nasaaya OMWAMI, 3naboola ari E OMWAMI, witsulile bulaano, ekhusaaya, shinga olwa ndayeechendelesiye imbeliwo mubwatoto nende omwoyo kwahabwene, nikhola akeenako akali amalayi mumonitsio. Hezekia nalila obutinyu muno. 4Mana likhuwa liOMWAMI nilimwitsila Isaya, liri 5Tsia omuboolele Hezekia mbu Kano niko aka OMWAMI, Nyasaye wakuukawo Daudi, aboola; mbu Embuliile okhu-saayakhwo, enduutsi amasikako; lola, ekhumeetela khubuyindifubwo emiyika ekhumi nachiraano. 6Ne ndalakhuhonia mumukhono kwomuruchi waAshuru, nende litookho lino; khandi ndalateetsa litookho lino.
7Ne shino shilaba eshilolelo khwiwe eshirula ewOMWAMI, mbu OMWAMI alakhola likhuwa lino elia aboolile; 8mbu lola, ndalakalusia eshiinikha khumaniinilo, aha shiishile khumaniinilo kaAhazi khulwa omubasu; ndalashikalusia inyuma khumaniinilo ekhumi. Kho eliuba liakalukha amaniinilo ekhumi khumaniinilo aka liali niliishiilekhwo.
9Aka Hezekia omuruchi waYuda yahandiika olwa yali niyalwalile, nahonile mubulwalebwe, ngakano; mbu
10Ndaboola mbu Mundaalo tsiobukhuumu bwanje ekhoyile okhwinyokha;
ndalatsia khushilibwa shieMakombe,
enyimilwe emiyika chianje echisikaale.
11Ndaboola mbu Shindalamulola OMWAMI mushialo shiabo abali mwoyo;
shindalabalola abandu khandi ta, mubamenyanga mushialo.
12Eshimenyo shianje shiyiniibwe nishiyilwa ehale ninasi,
shinga liheema liomwayi;
ndafumbile obulamu bwanje shinga omulushi wetsingubo olwa akhola;
alakhalachila khumatefwel keshilushilo;
okhurula mushiteere okhuula mushilo unzakaminjia.
13Endakaya okhuula mutsuli;
shinga italanyi olwa yikhola, nolwa atubula amakumba kanje kosi;
okhurula mushiteere okhuula mushilo unzakaminjia.
14Shinga iminyi kata liwang'i, nolwa ndibootsa;
embinda shielikuukuu; tsimoni tsianje nitsihweelelela khulwa okhuhenganga hekulu;
E OMWAMI, esitoheelwe; obe iwe omusingo kwanje.
15Nemboole shiina? Ne yambooleelekhwo khandi neniye owalikholile;
ndalatsiitsanga kahala emiyika chianje chiosi khulwa obululu obwomumwoyo kwanje.
16E Omwami, omwoyo kwanje kulabeetsanga omulamu halala ninawe;
ohuluusie iroho yanje.
Khulwako umbonie, ukhole embeetsenje mwoyo.
17Lola, kali akomulembe kwanje akachila ndanyoola obululu muno.
Ne khulwa obuheeli khuroho yanje wachihonia mubuko bwobutibi;
shichila wasukuune ebionoono bianje emukongowo.
18Okhuba Makombe shiyinyala okhukhwitsoomia ta,
okhufwa shikhunyala okhukhufumia tawe;
abo abeeshela mubuko shibanyala okhunaayila obwatotobwo ta.
19Ouli mwoyo, ouli mwoyo, neniye oulakhwitsoominjia,
shinga nasi olwa ekholanga inyanga yino;
saabwe alamanyinjia abaanabe obwatotobwo.
20OMWAMI yeekasiye okhumbonia,
niko akachila khulakhupanga obukhana, nikhwimba tsinyimbo tsianje,
tsindaalo tsieefwe tsiosi munzu yOMWAMI.
21Ne Isaya yali niyasunjile mbu Babukule libumbi liamakhuyu, balire khwibure lihandekhwo, mana alahona. 22Hezekia naye yali nasunjile mbu Shili heena eshilolelo eshilolosia mbu ndalatikulukha okhuula enanzu yOMWAMI?
Currently Selected:
Isaya 38: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
