Isaya 26
26
Olwimbo lwobwisiichi mubutetsi bwOMWAMI
1Munduukho eyo olwimbo luno luleembw mushialo shiaYuda; mbu
Khuli nelitookho liamaani;
araho obuhonia bube olukoba nende olwashi.
2Mwikule ebilibwa,
lihanga lilunjishi eliiinyilanga khubwisiikwa liinjilemwo.
3Olamulindanga oyo owa omwoyokwe kumliile mwiwe mumulembe kwatoto;
okhuba akhwisiikanga.
4Mumwisiichenje OMWAMI obushia nobushia,
okhuba OMWAMI YAHWEH niye olwanda lwobumeli.
5Okhuba akwisiye abamenyanga hekulu, mwitookho liahekulu;
alitiitiyia, alitiitiyia kata okhuula khwiloba,
aliisia kata okhuula khulufu.
6Eshilenje shilaliseenela hasi,
nibio ebilenje biabamanani nende amakulu kabatakha.
7Injila yomulunjishi neingololofu;
oleng'aasinjia omuhanda kwomulunjishi.
8Yee, khukhulindiiliile, e OMWAMI, munjila yobukhalachibwo;
emioyo chieefwe chiikombanga eliiralio nende obwitsulilwibwo.
9Ndakhwikombile nende omwoyo kwanje mushilo,
yee, roho yanje mukari wanje yilakhukhaabanga neshinani;
okhuba olwa obukhalachibwo bubeetsangaho mushialo,
nolwa abamenyanga mushibala beekanga obulunjishi.
10Kata omundu omubii nakoosibwa arie,
shialeeka obulunjishi ta.
Mushialo eshikololofu akholanga obumayaanu,
kata shialolanga obukhulundu bwOMWAMI ta.
11OMWAMI, omukhonokwo kuchinguushile, ne shibalolanga ta;
ne balalola obulumilifubwo khubandubo, nibafwimbwa omurwe;
yee, omulilo kulabasambila elala abakhuyinganinjia.
12OMWAMI, olakhureelaho omulembe;
okhuba niwe owakhukholeele emilimo chieefwe chiosi.
13E OMWAMI Nyasaye weefwe, abaami bandi abarali iwe ta bakhuruchilenje;
ne mwiwe wenyene khularumbulilangamwo eliiralio.
14Abo nabafwa, shibalalamukha ta;
abo nebiiniini, shibalabuukha ta;
niko akachila wabakoonyile nobamulula,
nosisia kata obwitsulilwi bwabwe.
15Wayeenjiyiye lihanga, OMWAMI,
wayeenjiyiye lihanga; wayeenyooleele oluyali;
wakaliyiye tsinzakho tsieshibala.
16Mumatinyu, OMWAMI, beetsile ewuwo;
bahwehwera amasaayo amanji olwa obuchesiyibwo bwali khubo.
17Shinga omukhasi owahelile inda olwa alumwa nalakaya munumwaye,
olwa ali ahambi okhwibula;
nolwa khubeele ifwe imbeliwo, e OMWAMI.
18Khwahelile inda, khwatsuunilwe,
khwabeele shinga abeebula emiuya;
shikhwakholile obuhonia bwosi bwosi mushialo,
kata abandu shibeebuulwe mushibala tawe.
19Abafwabo balalamukha; emilambo chiabandu banje chilabuukha.
Sisimushe, nimwimba, inywe abamenyangn mulukushi,
okhuba eliimelio lili shinga eliime liobulafu,
khandi liloba lilarusia ebiiniini.
20Yitsa, lihanga liabandu banje, winjile mubisikabio niwikala emiliangochio munyumawo;
wibise eshise eshitiiti okhuula olwa obusinyishi bulaba nibubirile.
21Okhuba lole, OMWAMI arula habunduwe okhukuuma abomushibala khulwa obumayaanu bwabwe;
liloba nalio lilabisula eshitsayi shialio,
nilirafuunikha abeerwa balio khandi ta.
Currently Selected:
Isaya 26: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
