Isaya 11
11
Oburuchi obulunjishi obweshisebuchisi shiaYese
1Ne eshisebuchisi shilarula mushirichili shiaYese,
khandi omurombo okurula mushisinashie.
2Roho wOMWAMI naye alaba khuye,
roho yobuchesi neyobumanyilisi,
roho yobwibaali neyamaani,
roho yobumanyi neyokhuria OMWAMI;
3okhuria OMWAMI khulamuchamisinjia,
shialakhalaka amakhuwa nalonda aka tsimonitsie tsilolanga,
kata okhukabukhasia nalonda aka ahulila namarwike, ta;
4ne alabakhalachila abamanani nende obulunjishi,
nakabukhasilia abasandile beshialo nende obukololofu;
khandi alakhupa eshialo nende indabushi yomunwakwe,
niyeera abatamaanu nende omuuya kwomunwakwe.
5Obulunjishi nabwo bulaba omushiipi kwomushishienjeshie,
nabwo obwisiikwa omushiipi okwa yeebohela.
6Eshisuutse shilamenya halala nende omusie kwelikondi,
khandi ingwe yilakona halala nende eshimeeme shieimbusi;
khandi nende eshimoosi nende italanyi indoro bilaaya haiala;
nomwana omutuutu alabiimilila.
7Imoosi nayo nende itubu tsilaaya halala;
abaana batsio balakona halala;
khandi italanyi yilaaya obunyasi shinga ing'ombe.
8Omwana oushinuuna alabaya khubwina bweinzokha,
naye omwana owaleshile okhunuuna alara omukhonokwe mukhombe yeshiyilikoma.
9Shibalatsuunia kata okhwonoonia eshindu shiosi mushikulu shianje shiosi eshitakatifu ta;
okhuba eshialo shilaba nishiitsuulemwo obumanyi bwOMWAMI shinga amatsi olwa kafuunikha inyanza.
10Khunyanga eyo eshisina shiaYese, eshisinjila shibe eshilolelo khumahanga kosi, niye owa abamahanga balakhaaba; nobuhuluushilobwe bulaba obwoluyali.
Omusikalo kulakalukha, nikuhula abasuku bosi
11Khunyanga eyo Omwami alanyiila omukhonokwe khandi olwakhabili okhununula omusikalo kwabandube abalasikala, okhurula eAshuru, okhurula eMisiri, okhurula ePatsarosi, okhurula eKushi, okhurula eElamu, okhurula eShinari okhurula eHamatsi, nende okhurula khunguku tsieinyanza.
12Khandi alasinjisilia amahanga eshilolelo,
nakhung'aasia abaIsiraeli abo abaarwa,
nabunjelesia halala abaYuda abali nibasalaanile,
okhurula khundulo tsine tsiosi tsieshialo.
13Imbalikha yaEfuraimu yilahwaho,
nabo abanyasinjia Yuda balaakamibwa;
abaEfuraimu shibalatiililwa abaYuda imbalikha,
kata abaYuda okhunyasia abaEfuraimu ta.
14Nabo baleeyuula nibayeelela khwibeka liabaFilisiti mumbo;
bosi halala balayaaya abandu bebukwe;
balabanyiilila Edomu nende Moabu omukhono;
abaAmoni nabo balabahulila.
15Naye OMWAMI aloomilia elala omukhono kweinyanza yaMisiri,
nasiomesia olwala khuMwalo okwo,
nende omuyekakwe okufululusia,
nakukhupa nakukabukhasia emiombi musaafu,
nachesiamwo abandu nebilaaro.
16Khandi kulababo omuhanda khulwa omusikalo kwabandube abalatong'a,
okhurula eAshuru;
shinga olwa kwaliho khulwa abaIsiraeli khunyanga eya barulilamwo mushialo shiaMisiri.
Currently Selected:
Isaya 11: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
