Genesis 35

Nyasaye yamuheelesilia Yakobo ikhabi eBeteli

1Nyasaye naboolela Yakobo mbu Rula, otikulushe otsie eBeteli, omenyeyo; omukholeleyo Nyasaye eshimalilo shiemisango, owatsana owakhuloleshela olwa weelukhanga Esau omwana weenywe 2Mana Yakobo nasunjila abomwitaalalie, nende bosi aba yali ninabo, ari Murusie abanyasaye abacheni abaliho mwinywe, nimwilafia abeene, nimwikalukhasia mubiifwalo bieenywe; 3mana chende khutikulushe khutsie eBeteli; nasi ndalakholelayo Nyasaye eshimalilo shiemisango, owatsana owambabina khunyanga yamasila kanje, naba ninasi khunjila eya ndatsiilakhwo. 4Nibaheelesia Yakobo abanyasaye abacheni bosi abali mumikhono chiabwe, nende tsingaka etsiali mubirwi biabwe; naye Yakobo nabibisa hasi womuruba okuli eShekhemu.

5Nibabuusia oluchendo; oburii obukhongol nibutiila amataala akali nikababotokhana, abalimwo nibaralonda abaana baYakobo ta. 6Kho Yakobo niyoola eLuzu, elili mushialo shiaKanaani, nilio Beteli, ye nende abandu bosi aba yali ninabo. 7Niyoombakhayo eshlmalilo shiemisango, nakulikha habundu yaho mbu Eli-Beteli, okhuba habwenaho Nyasaye yamwibisushila, olwa yali niyeelukhanga omwana wabwe. 8Naye Debora omulesi waRebeka nafwa, nayabilwa mundalila weBeteli hasi womuruba okwo; nakwo nikukulikhwa eliira mbu Aloni-bakhutsi.

9Mana Nyasaye yamuloleshela Yakobo khandi olwa yali narulanga ePadanaramu, namuheelesia ikhabi. 10Nyasaye namuboolela mbu Eliiralio niYakobo; eliiralio shililalangungwa mbu Yakobo khandi ta, habula Isiraeli lilaba eliiralio; namulanga eliira mbu Isiraeli. 11Nyasaye namusuniila mbu Nisie Nyasaye Ounyala Biosi; wibulenje niwinjiha; lihanga khandi omukhung'aano kwamahanga kalarula mwiwe, abaruchi nabo balarula mundayo; 12neshialo eshia ndaheelesia Aburahamu nende Isaka, ekhuheelesia iwe, nende olwibulolwo munyumawo enduheelesia eshialo eshio. 13Mana Nyasaye nakulukha okhurula aha yali, habundu yaho ewa yali nasungaane ninaye. 14Yakobo naye nasinjisiayo isiilo, habundu yaho aha yasunganila ninaye, isiilo yelichina lisongokhu; mana natsukhakhwo omusango kwokhutsushilwa, natsukhakhwo amafura. 15Yakobo nalanga habundu yaho aha Nyasaye yasunganila ninaye eliira mbu Beteli.

Okhufwa khwaRaheli.

16Kho nibachaaka oluchendo okhurula eBeteli; ne nilushisikala oluchendokhwo okhuula eEferatsi, mana Raheli nachaaka okhulumwa okhwibula, okhwibulakhwe nikhuba okhutinyu muno. 17Ne olwa yali nalumwa butinyu, omwibusiawe yamusunjila ari Oraria ta; okhuba bulaano witsa okhuba nende omwana undi omusiani. 18Mana olwa omwoyokwe kwali nikwenya okhukhalikha, okhuba yamala nafwa, yamukulikha eliira mbu Benoni: habula samwana yamukulikha mbu Benyamini. 19Raheli nafwa, nayabilwa khunjila eyitsia eEferatsi, nilio Betselehemu. 20Yakobo nasinjisia lichina lisongokhu khushilindwashie; nilio Isiilo yEshilindwa shiaRaheli okhuula olwa leelo. 21Isiraeli natsiililila nakhoma liheemalie imbeli womunaara kwaEderi.

Abaana baYakobo

(1 Akets. 2.1-2)

22Nikaba mbu olwa Isiraeli yali nashimenya mushialo eshio, Reubeni natsia nakona nende Biliha, omusuria wasamwana; Isiraeli naye nahulilakhwo.

Ne abaana baYakobo bali ekhumi nababili; 23abaana baLea mbabano; Reubeni, omwana wambeli waYakobo, nende Simeoni, nende Lawi, naYuda, naIsakhari, naZabuloni; 24abaana baRaheli, Yusufu nende Benyamini; 25nabaana baBiliha, omukholi waRaheli, Dani nende Nafutali; 26nabaana baZilipa, omukholi waLea, Gadi nende Asheri; bano nibo abaana baYakobo, aba yeebula muPadanaramu.

Okhufwa khwalsaka

27Naye Yakobo niyoola ewaIsaka samwana eMamure, eKiriatsiaraba, nilio Heberoni, ewa Aburahamu nende Isaka bali nibamenyakhwo. 28Ne tsindaalo tsialsaka tsiahela emiyika eshikhumi nende amakhumi munaane. 29Isaka nakhalikha omwoyo, nafwa, nalonda abandube, nakofuule, tsindaalotsie nitsihelile; nabo Esau nende Yakobo abaanabe nibamuyabila.

Currently Selected:

Genesis 35: OUV

Highlight

Copy