Abagalatia 2
2
Abarume bandi shinga olwa bamufuchiilila Paulo
1Mana olunyuma Iweshise shiemiyika ekhumi nachine ndatikulukha khandi ninzia eYerusalemu halala nende Baranaba, nimubukula Tito yesi ninzia ninaye. 2Ne ndatikulukha khulwako aka ndafwimbulilwa; nimbabakalila habulafu injiili yeneyo eya ndilwatsanga muBamahanga; ne mwali mumabiswi, imbeli wa abo abali aboluyali; mbu endeshe okhwitsukhana ninzilukhanga butswa, kata ninziluushe endio butswa. 3Ne kata Tito, owa ndali ninaye, nali omuYunani shibamuluunyia mbu ashebwe ta. 4Mbula ako kali khulwa abaana beefwe bobukaatii abeenjisibwa mabiswi abeenjila mabiswi khulwa okhuluura akobulekhuuie bweefwe obwa khuli ninabwo muKristo Yesu, mbu bakhukhole abasumba. 5Ne shikhwabaheelesia obwiyangu okhukhuruka, kata isaa ndala yonyene ta; mbu obwatoto bweinjiili bumenye halala nineenywe.
6Ne khubeenabo abamanyikhana mbu naboluyali (ne shinga olwa balinji khale shilili likhuwa khwisie; Nyasaye shiahenganga eshiimo shiomundu yesi ta) emboola khandi mbu abeenabo abamanyikhana mbu naboluyali shibayameetelakhwo likhuwa liosi ta; 7nebutswa balola shinga olwa ndaheebwa obulindi bweinjiili yabasinde, shinga Petero naye olwa yaheebwa ario eyo yabeshishebo. 8Okhuba owakhola Petero abe omurume wabeshishebo, khandi niye owakhola isie owaBamahanga 9Kho olwa balola obukoosia obwa ndaheebwa, banga Yakobo naKefa naYohana, ne nibo abamanyikha mbu netsisiilo, bapatana nineefwe nemikhono chiobuwinjani, isie nende Baranaba, mbu khutsie khuBamahanga, nabo khubeshishebo; 10ne beenya khwifwe likhuwa elala-mbu khuleshe okhwibirila abamanani; ne nilio likhuwa elia ndarakhwo omwoyo okhukhola.
Paulo yamukaania Petero, nibali eAndiokia
11Ne olwa Kefa yoola eAndiokia, ndamukaania mumoni namoni, okhuba kalolekha mbu eshiina shiamufwila. 12Shichila abandi abarula ewaYakobo olwa bali nibarashioolayo ta, yali naliitsanga nende Abamahanga; ne olwa bali niboolile, yeesenda inyuma niyeeyahula, nariile abali abeshishebo. 13Kata abaYahudi bandi bosi nabo nibeefwayafwayia bario halala ninaye; okhuula olwa kata Baranaba mwene yahunzulwa nobwikaati bwabwe. 14Nasi olwa ndalola shinga olwa barachendanga mubulunji ta, obwatoto bweinjiili shinga olwa buli, ndasunjila Kefa, imbeli wabwe bosi, ndi Iwe, olwa oli omuYahudi, noba nochendanga shingana Abamahanga, norachenda shingana abaYahudi ta, onyala orie okhuluunyilisia Abamahanga okhuchenda shingana abaYahudi?
AbaYahudi nabo balahonibwakhulwa obusuubili, shinga Abamahanga
15Ifwe khuli abaYahudi khulwa oburulanda bweefwe; shikhuli Abamahanga aboonooni ta; 16ne khumanyile mbu omundu shiabasilibwakhwo obulunjishi khulwa ebikhole biamalako ta, habula khulwa okhusuubilila Yesu Kristo; kho nineefwe fwesi khwamusuubilila Kristo Yesu, mbu khubasilibwe obulunjishi khulwa okhusuubilila Kristo, ne khulwa ebikhole biamalako ta; shichila omundu yesi shialabasilibwa obulunjishi khulwa ebikhole bieitorati tawe. 17Ne nikhuba nikhwanyoolekha nikhuli aboonooni, habwenaho olwa khwali nikhushikhaabanga okhubasilibwa obulunjishi muKristo, kho Kristo aba nali omukhalabani wobwonooni noho? 'A, nahatuutu ta. 18Ne nimba ninyumbakha khandi ebienebio ebia ndalikulula, habwenaho ndakhachila ndamanyikha shinga olwa endi omukhayi. 19Shichila khulwa amalako ndafwila amalako, mbu mana embeetsenje mwoyo khuNyasaye. 20Ndabambwa khumusalaba halala nende Kristo; ne endi mwoyo; khane shishili isie ta, habula Kristo oubeetsanga mwoyo mwisie; nobulamu obwo obwa endi ninabwo mumubili, endi ninabwo mubusuubili obuli muMwana waNyasaye, owa'heela niyeehaana omwene khulwanje. 21Shifwolanga obukoosia bwaNyasaye ta; shichila obulunjishi nibuba nibwitsa munjila yamalako, okhufwa khwaKristo khuba nikhwali butswa.
Currently Selected:
Abagalatia 2: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
