Ezekieli 7
7
Eshihesi nishiula
1Khandi likhuwa liOMWAMI nilinzitsila, liri 2Nawe, mwana womundu, kano niko aka Omwami NYASAYE aboolela eshialo shiaIsiraeli; mbu Eshihesi; mbu eshihesi shiulile khutsikoona tsine tsiosi tsieshialo. 3Ne bulaano eshihesi shili khwiwe, nasi ndalaruma oburima bwanje khwiwe, nikhuyaasia, tsinjilatsio shinga olwa tsili; khandi ndalakhukuuma khulwa ebisinyobio biosi. 4Kata imoni yanje shiyilakhubeelelelela, kata shindalakhubeela tsimbabasi ta; nebutswa ndaIakhukuuma khulwa tsinjilatsio, ebisinyobio nabio ebili hakari mwiwe; mana mulamanya mbu isie nieie OMWAMI.
5Kano niko aka Omwami NYASAYE aboola; mbu Liraba lilonda khumaraba kandi; lola, liitsanga. 6Eshihesi shiulile, eshihesi tsana shiulile; shisisimuushe okhukhufukula; lola, shiitsanga. 7Imongo yulile khwiwe, iwe oumenyanga mushialo; eshise shiulile, induukho yili ahambi; inyanga yeindiri, eyirali eyetsingalakala ta khutsingulu. 8Ne bulaano enzitsa okhukhusundulila obululu bwanje, ninzusia oburima bwanje khwiwe, nikhuyaasia tsinjilatsio shinga olwa tsili; ne ndalakhukuuma khulwa ebisinyobio biosi. 9Kata imoni yanje shiyilabeelelela, kata shindalakhubeela tsimbabasi ta; ne ndalakhukuuma tsinjilatsio shinga olwa tsili, ebisinyobio nabio nibili hakari mwiwe; mana mulamanya mbu isie nisie OMWAMI, khandi mbu ekhupanga.
10Lola, induukho njieyo; lola, yisita ahambi; imongoyo yirulile; ebiela bisebuushe; obwichinjimisii bukaniishe. 11Amahababa kakhulile nikaba indabushi yobubii; ne okhurula khubo ta, kata okhurula khubunji bwabwe kata khubuyinda bwabwe; kata shibulabaho obushilaasii mubo tawe. 12Eshise shiulile, induukho yisita ahambi. Omukuli aleshe okhwikhoya, kata omukusii okhwikhuula ta; okhuba oburima buli khubunji bwabwe bwosi. 13Okhuba omukusii shialakalushila eshieneshio eshia akusiye, olwa bashili mwoyo bombi, ta; okhuba libisulo lili khubunji bwabwe bwosi; shililakalukhasibwa ta; khulwa obumayaanu bwabwe abulaho ouleetinyia omwene ta.
14Bakhupile itarumbeta, nibarechekha ebindu biosi; nebutswa abulaho outsie mwihe; okhuba oburima bwanje buli khubunji bwabwe bwosi. 15Elwanyi, olukanga luliho; mukari, oluumbe neinzala bilimwo; ouli mumukunda alafwa khulwa olukanga; ne ouli mwitaala, inzala noluumbe bilamumalilana. 16Ne abaleehonokokha khubo balaba khutsingulu shinga amahusi akomwibanda nibeekhuula bosi, buli mundu khubumayaanubwe. 17Amakhono kosi kalatubukha, amasikamo kosi nikakwa shinga amatsi. 18Baleeboha tsingubo tsiamakunia, ne indenga yilabafuunikha; tsisoni tsilaba mumoni mwabwe mwosi, nokhumirwe nibali mulubeko. 19Balasukuna tsifeetsa tsiabwe khunjila, kata tsitsahaabu tsiabwe tsilaba shinga eshiobukaali; tsifeetsa tsiabwe netsitsahaabu tsiabwe shitsilanyala okhubahonia khunduukho yoburima bwOMWAMI, kata shitsilanyala okhubeekusia kata okhwitsusia tsinda tsiabwe ta. Okhuba nitsio etsialinji eshiisichirasio shiobumayaanu bwabwe. 20Eshiisiaho shiashio shieing'oono bashikalula obwikhulumamii; nibashikhola ebifwanani biebisinyo biabwe nebiemisilo chiabwe; ne niko akachila ndashibakwisilia eshiobukaali. 21Ndalashihaana mumakhono kabasuku shibe eshioluyiitsi shiabwe, kata khubabii beshialo shibe eshiyaayo; nabo balashionoonia. 22Ndalashiukhana nimbarusiakhwo tsimoni, nabo baloonoonia habundu wanje ahakoosii; kata abanyaka baleenjilamwo nibahoonoonia.
23Yiraanya omunyololo; okhuba eshialo shiitsuulemwo ebikhole ebibii biamabanga; litookho niliitsulamwo amahababa, 24khulwako ndalaleera abandu abokhubamahanga abashila obubii, okhulia tsinzu tsiabwe; ndalaakamia obwichinjimisii bwabamaani; ne habundu wabwe ahatakatifu haloonoonibwa. 25Indengusia yiitsanga; balakhaaba omulembe, ne shikulabaho ta. 26Amaraba kalalonda khumaraba kandi; akaboolwa kalalonda khukaboolwa; balakhaaba libisulo khumunabii; nebutswa amalako kalasishila khumukuhani, nobuchesiyii khubakofu. 27Omuruchi yeekhuula; omukhulundu afwimbwakhwo okhufwamwoyo; nabo abandu beshialo, amakhono kabwe katubukha. Ndalabakholela akahela tsinjila tsiabwe, nimbayaasia shinga olwa kabakhoyela; nabo balamanya mbu isie nisie OMWAMI.
Currently Selected:
Ezekieli 7: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
