Ezekieli 5
5
1Nawe, mwana womundu, bukula olukanga olumemu; olwikhoonyele shinga olumwo, niwibeka omurwe nende eshilefushio; mana obukule iratili eyokhuchelela, nokabula liswi tsana. 2Eshitonye shiakhataru shialio osambile mumulilo hakari mwitookho, olwa tsindaalo tsiobwikalilwi tsiliba nitsihweele; khandi obukule eshitonye shiakhataru shialio, oshireme nolukanga mwitookho tsimbeka tsiosi; neshitonye shiakhataru shialio osalaasilie omuyeka; nasi ndalatsomola olukanoa munyuma wabwe. 3Khandi obukule khulio elindi litiiti, olibohe mungubotsio. 4Ne khulienelo khandi obukulekhwo, olisukune mumulilo, olisambe mumulilo; ne mubwenomwo mularulamwo omulilo nikutswana munzu yosi yaIsiraeli. 5Kano niko aka omwami NYASAYE aboola; mbu Shino nishio Yerusalemu; ndamureele hakari mumahanga, ebialo bindi nabio bimufumbila. 6Ne mububiibwe yakhayile obukhalachi bwanje okhushila amahanga ako, nakhaya amalako kanje okhushila ebialo ebio ebimufumbila; okhuba bo baloba obukhalachi bwanje; ne amalako kanje, shibaihendile muko ta. 7Khulwako, kano niko aka Omwami NYASAYE aboola; mbu Okhuba muli abeinduli okhushila amahanga akamufumbila, nimurachenda mumalako kanje kata okhuhulila obukhalachi bwanje, kata okhukhola akobukhalachi bwamahanga akamufumbila, ta, 8kho khulwako, kano niko aka Omwami NYASAYE aboola; mbu Lola, isie, isie omwene, emuyinga; ndalakhola obuyaasii hakari mwiwe, amahanga nikalola. 9Ndalakhola mwiwe aka ndarashiakholakhwo, kata aka ndareetsa okhukholakhwo khandi ta, khulwa ebisinyobio biosi. 10Khulwako abasamwana balalia abaana babwe hakari mwiwe, nabo abaana balalia abasamwana; nasi ndalakhola obuyaasii mwiwe, ne abomusikalokwo kwosi ndalabasalaasia khumiyeka chiosi. 11Kho isie uno! Omwami NYASAYE aboola, Ndaleerusiaho, shichila wayoonoonia habundu wanje ahatakatifu khulwa ebindubio biemisilo biosi nende ebisinyobio biosi; kata imoni yanje shiyilabeelelela, kata shindalababeela tsimbabasi ta. 12Eshitonye shiakhataru eshiomwiwe shilafwa khulwa oluumbe, khandi khulwa inzala balamalilanwa hakariwo; eshitonye shiakhataru shilakwisibwa nolukanga, tsimbekatsio tsiosi; neshitonye shiakhataru ndalasalaasia khumiyeka chiosi, ninzomula olukanga munyuma wabwe.
13Kho oburima bwanje buloosibwa burio, nasi ndalahutsulusilia obululu bwanje khubo, nindihootselesia; nabo balamanya mbu isie OMWAMI ndaboolile mubulumilifu bwanje, olwa ndalaba ninzusiye obululu bwanje khubo. 14Khandi ndalakhukwisia likunda nende linyeko mumahanga tsana akakhufumbila, mumoni tsiabosi ababiranga. 15Kho olaba linyeko nende lichaayo, lisiomo nende amariisia, khumahanga tsana akakhufumbila, olwa ndalakhola obuyaasii khwiwe muburima nomubululu nomubukuumi obululu; nisie OMWAMI ouboolile; 16olwa ndalakhurumila ebisele ebibii bieinzala ebileera obumululi, ebia ndalaruma okhumumulula, khandi ndalamukaliyilia inzala tsana, nifunaka omutiichilo okwa mwisiililakhwo, mbu obusuma, 17nimurumila inzala netsisolo tsimbii, ne olarwilwa abaanabo khulwabio; kata nende oluumbe namabanga bilabira hakari mwiwe; khandi ndalaleera olukanga khwiwe; nisie OMWAMI ouboolile.
Currently Selected:
Ezekieli 5: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
