Esita 9
9
AbaYahudi bamulula abasuku babwe
1Haho mumwesi kwekhumi nakhabili, nikwo omwesi kwaAdari, khunyanga yekhumi nakhataru yakwo, olwa lilako liomuruchi nomulome okwa yakhupa bioola ahambi okhwikhola, khunyanga eya abasuku babaYahudi bali nibasuubilanga mbu bakhabaruche; nebutswa kali nikeekaluule, mbu abaYahudi nibo abaruka abo ababakiya; 2abaYahudi bakhung'aana halala mumataala kabwe mungongo tsiosi tsiomuruchi Ahasuwero, okhutiila bosi abakhaabanga okhubakholela libii kata yabulaho oubakaya; okhuba indenga yabahamba abetsimbia tsiosi khulwabwe. 3Kata abeemilisi betsingongo, nabakhulundu nabakafuna, nabo bosi abakholanga emilimo chiomuruchi, bakhoonya abaYahudi; okhuba indenga yali niyibahambile khulwa Moridekai. 4Okhuba Moridekai yali omukhongo munzu yomuruchi, ifumaye niyitswana mungongo tsiosi; omundu oyo Moridekai nameetekhanga butswa okhukhongoha. 5AbaYahudi nibeera abasuku babwe bosi nibabarema netsinganga, nobwiri nobumululi, nibabakholela aka bachama abo ababakiyanga. 6Kata muSusa litookho, abaYahudi beera nibamalilana abandu ebikhumi biraano; 7nibeera nende Parishandatsa, Dalifoni, Asipatsa; 8Poratsa, Adalia, Aridatsa; 9Parimashita, Arisai, Aridai, naWaizatsa, 10abo abaana ekhumi baHamani waHamedatsa, omusuku wabaYahudi; ne ebiyaayo, shibabitiilakhwo ta.
11Khunyanga yeneyo omuruchi yaboolelwa obukhumi bwa abo abeerelwa muSusa litookho. 12Omuruchi namusunjila Esita omukhayewe ari AbaYahudi beereele nibamalilana abandu ebikhumi biraano muSusa litookho; halala nabaana ekhumi bosi baHamani; kho aka bakhaba nibakholile mungongo tsindi tsiomuruchi kakhaba karie! Kho bulaano lisaayolio lili lirie? Olaheebwa. Kata eshia oshisaba nishiina? Shilakholwa. 13Mana Esita naboola mbu Omuruchi naba nachama, abaYahudi abali muSusa baheebwe omunwa okhukhola nende mukamba, shinga olwa kakhupilwa omulome inyanga yino; khandi mbu abaana abo ekhumi baHamani bafungwe khumusaala. 14Omuruchi nalaka mbu kabe kario; mana nibakhupa omulome muSusa; nibeelesia abaana ekhumi bosi baHamani. 15Kho abaYahudi abali nibali eSusa nibakhung'aana halala khandi khunyanga yekhumi nakhane eyomumwesi kwaAdari, nibeerela abandu ebikhumi bitaru muSusa; ne ebiyaayo, shibabitiilakhwo ta.
Lisabo liaPurimu
16Mana abaYahudi abali nibali mungongo tsiomuruchi nibakhung'aana halala okhusinjilila akobulamu bwabwe, nibaba nobuhuluushi khukabasuku babwe, nibeera khubabakiyanga abandu ebikhumila amakhumi musaafu nabiraano; ne ebiyaayo, shibabitiilakhwo ta. 17Ako keekhola khunyanga yekhumi nakhataru eyomumwesi kwaAdari; mana khunyanga yekhumi nakhane eyomumwesi tsana bahuluukha, nibachikhola inyanga yamasabo nokhutsatsahala. 18Habula abaYahudi abali muSusa bakhung'aana omwesi nikuli ekhumi nakhataru khandi nende ekhumi nakhane; mana nikuli ekhumi nakharaano, bahuluukha nibachikhola inyanga yamasabo nokhutsatsahala. 19Khulwako, abaYahudi abomubisoma, nabamenya mumataala akabula tsingoba, bakholanga inyanga yekhumi nakhane eyomwesi kwaAdari yibe inyanga yokhutsatsahala neyamasabo, eshikukuu, inyanga yokhukoobelana emikabo.
20Naye Moridekai nahandiika amakhuwa ako, nabayilila tsibarwa abaYahudi bosi abali mungongo tsiosi tsiomuruchi Ahasuwero, etsiahambi netsiehale pe, 21okhubabiila mbu balindenje inyanga yekhumi nakhane eyomumwesi kwaAdari, nende eyekhumi nakharaano eyomumwesi tsana, omuyika buli muyika, 22shinga olwa tsiali tsindaalo etsia abaYahudi banyoolelamwo obuhuluushi khubasuku babwe, khandi omwesi okwa bakalusilibwa obutsatsahafu mushilenje shieshibeela, eshikukuu mushilenje shiamasika; mbu batsikhole tsibe tsindaalo tsiamasabo nobutsatsahafu, neyokhukoobelana emikabo, neyokhuyilila abamanani ebihaanwa.
23AbaYahudi nibafuchiilila okhukholanga shinga olwa bachaachile, khandi shinga Moridekai olwa abahandiichiile; 24shichila Hamani waHamedatsa, omuAgagi, omusuku wabaYahudi bosi, yali nakholile mumachesike amakhuwa khubaYahudi okhubatibia, nakhupile Puri, eshisina mbu ikha, okhubamalilana nokhubatibia. 25Nebutswa olwa amakhuwa koola imbeli womuruchi, yalaka mutsibarwa mbu tsiyemitsie tsimbii etsia yali nakholile mumachesike khukabaYahudi tsikalushile khumurwe kukwe omwene; khandi mbu ye nabaanabe bafungwe khumusaala. 26Niko akachila nibakulikha tsindaalo etsio mbu Purimu, khulwa eliira liaPuri. Kho khulwa amakhuwa kosi keibarwa tsana, nokhulwa kosi aka bali nibaluutsi khumakhuwa tsana, nakali nikabakwiliile, 27abaYahudi basinjisia likhuwa, nibeetuukha abeene nabaana babwe, nabosi abakhaba nibeeyunjile khubo, lileshe okhuchweyekha; eliene ndielino, mbu bakhalindanga tsindaalo etsio tsibili, lihandiiko liatsio shinga olwa liali, neinduukho yatsio, omuyika buli muyika. 28Khandi mbu tsindaalo etsio tsiakheetsulilwa nitsilindwa mubuli Iwibulo, nomubuli inzu, nomubuli lukongo, nomubuli taala; khandi mbu tsindaalo etsio tsiaPurimu tsirahwa mubaYahudi, kata eshiitsulilo shiatsio okhwakama munzibulo tsiabwe ta.
29Mana Esita, omukhaye womuruchi, omukhaana waAbihaili, naMoridekai omuYahudi, bahandiika akobunyali bwosi okhutinyisia ibarwa eyo yakhabili khukaPurimu. 30Ne yayilila abaYahudi bosi tsibarwa, mungongo tsiosi eshikhumi amakhumi kabili namusaafu etsioburuchi bwaAhasuwero, namakhuwa komulembe nobwatoto, 31okhutinyisia tsindaalo etsio tsiaPurimu munduukho tsiatsio, shinga Moridekai omuYahudi naEsita omukhaye womuruchi olwa bali nibababiilile, khandi abeene shinga olwa bali nibasinjisiye khulwabwe, nokhulwa tsinzibulo tsiabwe, mumakhuwa kokhuhonga inzala naketsimbungu. 32Lilako liaEsita liatinyisia amakhuwa ako kaPurimu; nikahandiikwa mushitabu.
Currently Selected:
Esita 9: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975