Esita 8
8
AbaYahudi baheebwa omunwa okhusinjilila obulamu bwabwe
1Khunyanga yeneyo omuruchi Ahasuwero yamuheelesia Esita omukhayewe inzu yaHamani omusuku wabaYahudi. Naye Moridekai niyeenjila imbeli womuruchi; okhuba Esita yabuula shinga olwa ali ye samwana. 2Mana omuruchi narusia ingakaye eya yali nanuulile khuHamani, namuheelesia Moridekai. Naye Esita namukhola Moridekai abe omusinjilili weinzu yaHamani.
3Esita nasunjila omuruchi khandi, niyeekhupa hasi hamakuluke, namusaaya muno, nalila amasika, mbu arusieho amabii kaHamani omuAgagi, netsiemitsie etsia yali nakasiliye abaYahudi. 4Mana omuruchi namunyiilila Esita indabushi yeitsahaabu. Kho Esita nabuukha, nasinjila imbeli womuruchi. 5Nasunga mbu Omuruchi naba nachama, nasi nimba ningoosibwa imbeliwe, kata likhuwa liene nilinyoolekha nilili habwene imbeli womuruchi, nasi nimba ninyonya tsimonitsie, amakhuwa kahandiikwe okhufukula tsibarwa tsilia, etsiakholwa namachesi kaHamani waHamedatsa omuAgagi, etsia yahandiika okhutibia abaYahudi abali mungongo tsiosi tsiomuruchi. 6Okhuba ndakheefwila endie okhulola amabii akalabakwila abandu banje? Kata ndakheefwila endie okhulola obutibibwi bwabaluyia banje? 7Mana omuruchi Ahasuwero naboolela Esita omukhayewe nende Moridekai omuYahudi, ari Lole, emuheelesiye Esita inzu yaHamani; naye omwene bamufunjile khumusaala shichila yara omukhonokwe khubaYahudi. 8Ne bulaano muhandiiche khukabaYahudi shinga olwa muchama, muliira liomuruchi, nimurakhwo eshibalikho shieingaka yomuruchi. Okhuba lihandiiko liosi eliba nilihandiikwa muliira liomuruchi, nililikhwo eshibaliho shieingaka yomuruchi, abulaho ounyala okhulikalukhasia.
9Mana abahandiichi bomuruchi balangwa khushise shieneshio, mumwesi kwakhataru, nikwo omwesi kwaSiwani, khunyanga yamakhumi kabili nakhataru yakwo; amakhuwa nikahandiikwa, kosi aka Moridekai yalaka shinga olwa kali, khubaYahudi, nokhubakhulundu, nabakafuna, nabeemilisi betsingongo tsiosi, okhurula ebuHindi okhuula eEtiopia, tsingongo eshikhumi amakhumi kabili namusaafu, khubuli lukongo mubuhandiichi bwalwo, nokhubuli bandu mululimi lwabwe nokhubaYahudi mubuhandiichi bwabwe, nomululimi lwabwe. 10Yakahandiika muliira liomuruchi Ahasuwero, nabalikha eshibalikho shiomuruchi; naruma tsibarwa nabarume abachendela khufarasi, abachendela khutsifarasi tsietsimbilo muno, etsialinji khumilimo chiomuruchi, etsieebulilwa mubitioli biomuruchi. 11Mumahandiiko ako omuruchi yaheelesia abaYahudi bosi abomubuli taala omunwa okhukhung'aananga okhusinjilila akobulamu bwabwe; nokhumulula nokhwira nokhutibia lihe lioluyia lwosi kata olukongo lwosi olwakheenya okhubaseera, kata abaana babwe abatiiti kata abakhasi babwe; khandi okhuyaaya ebindu biabwe, bikwe ebioluyiitsi, 12khunyanga ndala mungongo tsiosi tsiomuruchi Ahasuwero, mbu khunyanga yekhumi nakhataru eyomumwesi kwekhumi nakhabili, nikwo omwesi kwaAdari. 13Ikopi yelihandiiko tsana yatswa nibwa mumbia tsiosi tsiabandu, mbu omulome kukhupwe khukalakwa mubuli lukongo, mbu abaYahudi babe nibeerecheeshe inyanga eyo okhumala eshikwoli khubasuku babwe. 14Kho abarume tsana abachendela khufarasi tsietsimbilo etsialinji khumilimo chiomuruchi, nibaanguyilisibwa nibanichilisibwa nelilako liomuruchi; omulome nikukhupwa khukalakwa eSusa, litookho.
15Naye Moridekai narula ewa omuruchi yali, niyeefwalile tsingubo tsieshiruchi tsindafu netsieibuluu, nali nolusimbi olukhongo Iweitsahaabu, neingubo ifuubila yeikitani indorotoro neisambarau; litookho liosi liaSusa nilikhupa tsingalakala nilitsatsahala. 16Obulafu nibubaho khubaYahudi, nobutsatsahafu, nokhwikhoya, noluyali. 17Ne mubuli lukongo nomubuli taala, hosi hosi ewa lilako nomulome kwomuruchi bioola, abaYahudi bali nobutsatsahafu nomwikhoyo, lisabu neshikukuu. Abanji abomubandu beshialo nibeekhola abaYahudi; okhuba indenga yabahamba khulwa abaYahudi.
Currently Selected:
Esita 8: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975