2 Abatsesalonika 2
2
Omundu omukhayi oyo
1Ne bulaano, baana beefwe, khumakhuwa kokhwitsa khwOmwami weefwe Yesu Kristo nende okhukhung'aasibwa khweefwe khuye, khumusaaya; 2mbu muleshe okhusikukha bwangu mumwoyo kata okhuhenda, khulwa obulakusi kata khulwa lisungo kata khulwa ibarwa eyipaarwa mbu yirula khwifwe, nibiboola mbu induukho yOmwami yimalile okhuula. 3Omundu yesi aramukaatia munjila yosi yosi ta; shichila shiyileetsa obuhunzushi niburashieekhola ta, nende omundu oyo omukhayi okhufwimbulwa, niye omwana wobukori tsana. 4Niye ouyinjilisinjia, niyeeyemekha okhufukula kosi akalangwa mbu Nyasaye, kata akeenamilungwa. Kata omwene niyeekhaale muhekalu yaNyasaye, niyeerumbulanga mbu niye Nyasaye.
5Khane shimwitsulilanga mbu olwa ndali nishiliho nineenywe ndamuboolela amakhuwa kano? 6Khandi mumalile okhumanya eshimwikalilanga shinga olwa shili, mbu afwimbulwe induukhoye niyulile. 7Shichila kata bulaano obukhayi obwo bukholanga mumabiswi butswa, okhuula olwa oyo oumwikalilanga alayinibwaho. 8Mana owobukhayi alifwimbulwa, owatsana owa Omwami Yesu alamalilana khulwa okhufuura khwomuuya okhurula mumunwakwe, namukwisia omukhaya khulwa okhulolekhakhwe olwa aleetsa. 9Ne okhwitsa khwomwenoyo khuleekhola khulwa obukholi bwaSetani nende ebikhole biobunyali nebilolelo nebiamakana ebirula mububeeyi 10nobukaatii bwosi bwobumayaanu, mubeenabo abatibanaa. Shichila shibeenjisia obuheeli bwobwatoto, mbu bahonibwe, ta. 11Ne niko akachila Nyasaye nabarumila obwimilisi obushiamu, mbu basuubile khwikhuwa liobubeeyi, 12mbu bosi abaranyoolekha nibasuubiile akobwatoto ta, habula nibachama obumayaanu, kho bakhalachilwe eshiina.
Okhulobolwa khulwa obuhonia
13Ne, baana beefwe aba Nyasaye aheelanga, khukwanile okhumuupilanga Nyasaye orio khulweenywe tsindaalo tsiosi, okhuba Nyasaye yamulobola khukhuchaaka khwene khulwa obuhonia mubwahule obwa Roho ahaana, nende mukhusuubilila obwatoto. 14Yamulanjila obwenobwo munjiili yeefwe, mbu mwinyoolele oluyali lwOmwami weefwe Yesu Kristo.
15Khulwako, baana beefwe, musimbiile, nimuhanda khumakhuwa keene aka khwamwechesia kata khulwa lisungo kata khulwa ibarwa yeefwe. 16Ne bulaano Omwami weefwe Yesu Kristo omwene, halala nende Nyasaye Seefwe owakhuheela nakhuheelesia obuhabini bwobumeli nobunaayi obulayi, khulwa obukoosia, 17amuhabine emioyo chieenywe, nachiralisia mubuli shikhole eshilayi kata lisungo.
Currently Selected:
2 Abatsesalonika 2: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
