2 Samweli 3
3
1Ne lialiho lihe eshise eshirambi hakari weinzu yaSaulo nende inzu yaDaudi; ne Daudi yatsiililila niyeetasa amaani, habula inzu yaSaulo yatsiililila niyitasa okhuteshelana.
Abaana baDaudi abeebulilwa eHeberoMi
(1 Akets. 3.1-4)
2Naye Daudi niyeebula abaana abasiani muHeberoni; omwanawe owambeli niye Aminoni waAhinoamu omuYezereeli; 3nomwana waDaudi wakhabili niye Khileabu waAbigaili ousika Nabali omuKarameli; nowakhataru, Abisalomu waMaaka omukhaana waTalumai omuruchi waGeshuri; 4nowakhane, Adoniya waHagitsi; nowakharaano, Shefatia waAbitali; 5nowakhasasaba, Itsireamu waEgela, mukha Daudi. Bano nibo aba Daudi yeebulila muHeberoni.
6Olwa lihe liali nililiho hakari weinzu yaSaulo nende inzu yaDaudi, Abineri niyeelolosia okhuba owamaani munzu yaSaulo. 7Ne Saulo yali nali nende omusuria, oweliiralie Risipa, omukhaana waAya; naye Ishiboshetsi namusunjila Abineri ari Mbushiina noba nende omusuria wapapa? 8Mana oburima nibuhamba Abineri khulwa amakhuwa kaIshiboshetsi, naye nasunga mbu Nisie omurwe kweimbwa muYuda noho? Leelo embakholelanga akeshisa abeinzu yaSaulo so, nende abaana babwe, nende abeetsabe, nindakhuhaana iwe mumukhono kwaDaudi ta; ne khane leelo unzinjilila khushiuku shiomukhasi uno. 9Nyasaye akholele Abineri ario, nende okhushilaho, nimba nindamukholela Daudi akeenako aka OMWAMI yamwitsubila tawe; 10mbu okhubisia oburuchi, burule munzu yaSaulo, nokhusinjisia eshifumbi shiobwami shiaDaudi khuIsiraeli khandi khuYuda, okhurula eDani okhuula eBeerisheba. 11Naye yakhaywa okhumukalusia Abineri likhuwa lindi liosi, shichila yamuria.
12Kho Abineri yaruma abarume ewaDaudi, aha yali, nareeba ari Eshibala neshiawina? Khandi ari Lia ninasi omuuma, ne lola, omukhono kwanje kulaba ninawe okhukhushiukhasilia Isiraeli yosi. 13Naye nakalusia mbu Nobulayi; khulalia omuuma ninawe; ne mbu enzenya likhuwa elala khwiwe, ndielino, mbu shiolandola mumoni tawe, habula noranjiliile okhuleera Mikali omukhaana waSaulo, olwa witsa okhundola mumoni. 14Khandi Daudi yaruma abarume ewaIshiboshetsi waSaulo, nasunga ari Mbeelesia omukhasi wanje Mikali, owa ndakhwa amafunga eshikhumi kabaFilisiti. 15Naye Ishiboshetsi yaruma namuyinia ewomusaatsawe Palatieli waLaishi. 16Omusaatsawe natsia ninaye, nalila natsia, nalondana ninaye okhuula eBahurimu. Mana Abineri namusunjila mbu Kalukha, tsia; naye nakalukha.
17Mana Abineri nasungana nende abakofu baIsiraeli, nasunga ari Mundaalo etsiabira mwakhaaba Daudi mbu abe omuruchi weenywe; 18kho bulaano mulikhole; okhuba OMWAMI yasunga khuDaudi mbu Khulwa omukhono kwomusumba wanje Daudi ndalahonia abandu banje Isiraeli mumukhono kwabaFilisiti, khandi mumukhono kwabasuku babwe bosi. 19Khandi Abineri naboolera Benyamini yosi; mana Abineri natsia okhuboolela Daudi eHeberoni kosi akalolekha nikali amalayi mumoni tsiaIsiraeli, khandi tsiabeinzu yosi yaBenyamini.
20Kho Abineri yatsiila Daudi eHeberoni, halala nende abandu amakhumi kabili. Naye Daudi nabakasilia lisabo Abineri nende abandu aba yali ninabo. 21Mana Abineri nasunjila Daudi ari Erule enzie, ekhung'aasilie omwami wanje omuruchi Isiraeli yosi, mbu balie ninawe omuuma, khandi mbu oruche khubosi aba omwoyokwo kwenya. Daudi namuseebula Abineri, naye natsia nomulembe.
22Habwenaho abasumba baDaudi halala nende Yoabu nibarula mukhuseera, nibeetsa nende ebiyaayo ebinji; ne Abineri shiyali nali ewaDaudi eHeberoni ta; shichila yali namuseebuule, naye yali natsiile nomulembe. 23Olwa Yoabu nende abelihe liosi elia yali ninalio bali niboolile, bamuboolela Yoabu, bari Abineri omwana waNeri yeetsile ewomuruchi, naye amuseebuule, ne utsiile nomulembe. 24Mana Yoabu namutsiila omuruchi, namusunjila mbu Kho okholile orie? Lola, Abineri akhwitsiile nishiina eshichilile nomuseebula, naye utsiile pe? 25Omanyile Abineri waNeri, mbu yeetsile okhukhukaatia, khandi okhumanya akokhusamulakhwo nende okhuchelela, nokhumanya kosi aka okholanga.
26Nolwa Yoabu yali narulile ewaDaudi, yaruma abarume inyuma waAbineri, nibamukalusia okhurula khwiyabo liaSira; habula Daudi shiyamanya ta. 27Nolwa Abineri yali nakaluushe eHeberoni, Yoabu yamuyila elubeka, hakari haluyia, mbu asungane ninaye masilisi, namuupilayo munda, naye nafwa, khulwa amabanga kaAsaheli omwana wabwe. 28Nolunyumakhwo, olwa Daudi yahulilakhwo, yasunga mbu Isie nende aboburuchi bwanje khubula neshiuku shiamabanga kaAbineri waNeri, imbeli wOMWAMI, obushia nobushia; 29shikwe khumurwe kwaYoabu, khandi khubosi beinzu yasamwana; arakhachweya okhubamwo munzu yaYoabu omundu oweshisununu, kata owamachele, kata oukwanile butswa okhusiilila obuusi khumutunga, kata owirwa nolukanga, kata outamba eshiokhulia, tawe. 30Kho Yoabu nende Abishai omwana wabwe nibeera Abineri, shichila yali niyeerile Asaheli omwana wabwe mwihe eGibeoni.
31Mana Daudi nasunjila Yoabu nende abandu bosi aba yali ninabo, mbu Randule tsingubo tsieenywe, mwibohe tsingubo tsiamakunia, mumwikhuule Abineri. Naye omuruchi Daudi nalonda inyuma weshitalatalilo shiomulambo. 32Nibamuyabila Abineri muHeberoni; omuruchi naye nachinga omwoyo niyeekhuula hang'ani yaAbineri; abandu bosi nibeekhuula. 33Omuruchi namwikhuula Abineri, nasunga mbu
Mana kabeele kakhoyeele Abineri okhufwa shinga omuyingwa?
34Amakhonoko shikali nikaboyilwe,
kata ebilenjebio okhureebwa mubitiili tawe;
shinga omundu olwa akwitsanga imbeli wabamayaanu, nilwo olwa wakwile.
Abandu bosi nibamwikhuula khandi. 35Mana abandu bosi nibeetsa mbu bamunichilisie Daudi okhulia khubiliibwa, eshialo nishishili eshiteere; habula Daudi yeetsuba, ari Nyasaye yakholele siesi ario, nende okhushilaho, nimba nindiakhwo khumukaate kata khushindu shiosi eliuba nilishili okhuyeela! 36Abandu bosi nibalola likhuwa elo, nilibakaasila; kata kosi aka omuruchi yakholanga kakaasilanga abandu abo bosi. 37Kho abandu abo bosi nende Isiraeli yosi bamanyila elala inyanga eyo, mbu shikhubeele okhwenya khwomuruchi, okhwira Abineri waNeri, tawe. 38Omuruchi nabasunjila abasumbabe ari Shimumanyile mbu omukhulundu khandi omundu omukhongo akwile inyanga yino muIsiraeli? 39Nasi inyanga yino endembuushe, kata nindi omuruchi owatsushiililwa amafura; abandu bano nabo, abaana baZeruya, oburaasi bwabwe burambile OMWAMI arunje omukholi wobumayaanu, obumayaanubwe shinga olwa buli.
Oluluyia Union Version © Bible Society of Kenya 1975