2 Samweli 2
2
Daudi yeemekhwa abe omuruchi waYuda
1Olunyuma lwamakhuwa ako kosi Daudi yareeba OMWAMI, ari Endikulushe enzinjile mwitaala liosi liaYuda noho? OMWAMI namukalusia mbu Tikulukha. Daudi nareeba ari Nendikulushe ninzia heena? Naye ari E Heberoni. 2Kho Daudi yatikulukha natsiayo, halala nende abakhasibe babili, Ahinoamu omuYezereeli nende Abigaili ousika Nabali omuKarameli. 3Khandi nende abandube aba yalinji ninabo, Daudi natikulukha ninabo, buli mundu nende abeinzuye, nibamenya mumataala kaHeberoni. 4Mana abandu baYuda nibeetsa, nibamutsushiilila Daudi amafura ebweneyo, mbu abe omuruchi weinzu yaYuda.
Nibamuboolela Daudi bari Abandu baYabeshi-gileadi nibo abamuyabila Saulo. 5Kho Daudi yaruma abarume ewabandu baYabeshi-gileadi nabasunjila mbu OMWAMI amuheelesie ikhabi, olwa mwamukholela eshisa shino omwami weenywe, Saulo, nimumuyabila. 6Ne bulaano OMWAMI amukholele inywe akobuheeli oburalilu nende obwatoto; nasi siesi ndalamurunga obulayi buno, shichila mwakhola likhuwa lino. 7Kho bulaano amakhono keenywe kabe namaani, nimuba abeitswoni; okhuba Saulo omwami weenywe yafwile, abeinzu yaYuda nabo banzushiliile amafura embe omuruchi wabwe.
Daudi yaseera inzu yaSaulo lihe
8Ne Abineri omwana waNeri, omuseesia welihe liaSaulo, yali nabukuule Ishiboshetsi omwana waSaulo namuyila injelekha, eMahanaimu; 9niyamukholile omuruchi waGileadi, khandi wabaAshuru, khandi waYezereeli, khandi waEfuraimu, khandi waBenyamini, nende khuIsiraeli yosi. 10Naye Ishiboshetsi waSaulo yali owe-miyika amakhumi kane olwa yachaaka okhuruka Isiraeli, naruka emiyika chibili. 11Neshise shiosi eshia Daudi yali omuruchi weinzu yaYuda muHeberoni, nemiyika musaafu nende emiesi chisasaba.
12Ne Abineri waNeri nende abasumba baIshiboshetsi waSaulo nibarula eMahanaimu nibatsia eGibeoni. 13Naye Yoabu waZeruya nende abasumba baDaudi nibarula nibababukaanila ahambi nende litiba liaGibeoni; nibeekhala, abandi elubeka luno Iwelitiba, nabandi elubeka lulia Iwelitiba. 14Mana Abineri namusunjila Yoabu ari Chama abasooliili bano babuushe babaye imbeli weefwe. Yoabu nasunga mbu Babuushe. 15Kho nibabuukha, nibaambukha, obukhumi bwabwe shinga olwa bwali; mbu ekhumi nababili baBenyamini nende Ishiboshetsi waSaulo, khandi ekhumi nababili abokhubasumba baDaudi. 16Nibatiilana buli mundu nowashie omurwe, nibafumirana mumbafunindio bakwa bosi halala. Khulwako habundu tsana halangwa mbu Helekatsihasurimu, naho hali muGibeoni. 17Ne lihe liali lilulu muno inyanga eyo; naye Abineri yahulwa, nende abandu baIsiraeli, imbeli wabaamba baDaudi.
18Nabo abasiani baZeruya bataru bali nibaliho, mbu Yoabu, nende Abishai, nende Asaheli; naye Asaheli yali omwangu muno ebilenjebie shinga eshitsusu. 19Ne Asaheli yalondachilila Abineri; ne mukhutsiakhwe shiyakotola khumukhono musaatsa kata khumukhasi tawe, mukhulondachilila Abineri. 20Mana Abineri nakhupa amashemo inyuma, nasunga mbu Khane niwe, Asaheli? Nakalusia mbu Nisie. 21Abineri namusunjila ari Kotola khumukhonokwo musaatsa, kata khumukhono mukhasi, ohambe oundi khubasooliili, obukule ebiyaayo bibie. Habula Asaheli shiyafuchiilila okhwibera mukhumulonda tawe. 22Abineri namusunjila Asaheli khandi, ari Wibere oleshe okhunonda; nishiina eshiakhachila ndakhuupa hasi? Ndakhanyala endie okhuchinguula obweni bwanje imbeli waYoabu omusiani weenywe? 23Nebutswa yaloba okhwiberakho mana Abineri namuupa munda nende injela yelifumo, lifumo nilirulila emukongo; naye nakwaho, nafwila habwene yaho. Ne buli mundu owoola habundu yaho ewa Asaheli yakwa nafwa, yeemaho.
24Habula Yoabu nende Abishai bamulondachilila Abineri; eliuba niliyeela olwa bali nibakhoola khulukulu lwaAma, oluhengazne nende Gia, khunjila yeshitsiimi shiaGibeoni. 25AbaBenyamini nabo nibakhung'aana halala inyuma waAbineri, nibeekhola ing'anda ndala, nibasinjila hekulu wolukulu lundi. 26Mana Abineri nalanga Yoabu, namusunjila ari Olukanga lulaliitsanga obushia nobushia noho? Shiomanyile mbu obumaliilishi bulaba obululu? Nolinde okhuula liina, kho obiile abandu bakalushe baleshe okhulondachila abaana babwe? 27Naye Yoabu nasunga mbu Shinga Nyasaye olwa abeesangaho mwoyo, olaba noraboolile ta, khane mutsuli abandu bakheenyooshe, nibaralondachila buli mundu omwana wabwe ta. 28Kho Yoabu yakhupa olwika, abandu bosi nibeema, nibaralondachilila Isiraeli khandi ta, kata okhuseerana khandi tawe.
29Mana Abineri nende abandube nibachenda eshilo eshio tulu, nibabira muAraba eyo; nibaambukha Yorodani, nibatsia tsisaa tsiosi etsiomusenya, niboola eMahanaimu. 30Naye Yoabu nakalukha, narula mukhulondachila Abineri; nolwa yali nakhung'aasiye abandu bosi halala, babulamwo mubasumba baDaudi abandu ekhumi nashienda, khandi nende Asaheli. 31Habula abasumba baDaudi bali nibarootsile Benyamini, nende abandu baAbineri, nibeera abandu ebikhumi bitaru nende amakhumi kasasaba. 32Nibachinga Asaheli, nibamuyabila mushilindwa shiasamwana eshiali eBetselehemu. Nabo Yoabu nende abandube nibachenda eshilo tulu, nibubashiela niboolile eHeberoni.
Currently Selected:
2 Samweli 2: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975