2 Abakorinzo 12
12
Amabisulo nobufwimbuli obweetsela Paulo
1Khatimba ndiyitsiale, kata nikarakhoyeele ta; ne enziililila khukamabisulo nende obufwimbuli bwOmwami. 2Ndamanya omundu muKristo; khale, bulaano nemiyika ekhumi nachine, yakaamwa nayilwa khwikulu liakhataru; naba niyali mumubili, shimanyile ta; kata naba niyali elwanyi womubili, shimanyile ta; Nyasaye umanyile. 34Khandi emanyile akomundu mwenoyo, shinga olwa yakaamwa nayilwa muParadiso; naba niyali mumubili, kata niyali harali omubili ta, shimanyile tawe; Nyasaye umanyile. Ne ebweneyo yahulila amakhuwa akarasunjikha ta, akakhaba omusilo omundu okhurumbula. 5Ndaleeyitsialila khukomundu oyo; ne khukanje omwene shinyala okhwiyitsiala ta, habula mukokhubula amaani khwanje. 6Okhuba kata nindakheekomba okhwiyitsiala, shindakhakhola obusilu ta; okhuba ndakhusunga akatoto; nebutswa ndikaya, omundu yesi aleshe okhumbaarilakhwo akandi akashila ako aka alolanga kata okhuhuliilila khwisie omwene. 7Ne khulwa obukhongo bwobufwimbulwi obwo, obushila kosi, khandi mbu endeshe okhwichinjimisia muno muno, niko akachila niheebwa eshibambo mumubili kwanje, omurume waSetani okhu'nyasia, endeshe okhwichinjimisia muno muno 8Khushindu shieneshio ndamusaba Omwami okhuula khataru, mbu shindulekhwo. 9Ne yamboolela ari Obukoosia bwanje bukhuhela, okhuba obunyali bwanje bushilaanila elala aha amaani kabula. Niko akachila ndaleeyitsialila okhubula-amaani khwanje khwosi nokhuchama, mbu obunyali bwaKristo bumenye mwisie. 10Niko akachilanga nisangaalila okhubula amaani, namanyeko, namaraba, nobusandibwi, nende amatinyu, khulwa Kristo; okhuba olwa embula amaani, nilwo olwa emba namaani.
Aka Paulo yaria halubeka lweikanisa yebuKorinzo
11Kho esiluhaale; ne ninywe abachilile; okhuba ninywe ababeele nimukhoyile okhumbaaka; shichila shimbeele nineemile khubarume abo abashila obukhulundu mwikhuwa liosi ta, kata nindali eshindu tawe. 12Toto mwene, ebilolelo biomurume biakholeshela mwinywe mubwisimilisii bwosi, khulwa ebilolelo nende ebiamakana nende ebikhole biobunyali. 13Ne tsikanisa tsindi tsiosi tsiamushila nende shiina? Habula mbu isie shindamusitohela ta? Mundeshele lihii elo!
14Lole, Iuno lukhola khataru nindirechekhanga okhwitsa ewa muli; nebutswa shindalamusitohela tawe; okhuba shikhaabanga emiandu chieenywe ta, habula inywe abeene; okhuba abaana shibakhoyile okhubiishila abeebuli babwe libiikho ta, habula abeebuli okhubiishila abaana. 15Nasi enjamile butswa okhuhaana ebia endi ninabio, nasi omwene ehaanwe, khulwa emioyo chieenywe. Ne olwa obuheeli bwanje khwinywe bushilaananga, obweenywe khwisie butiitihanga noho? 16Kho kabe kario; isie omwene shindamusitoheela ta. Ne olwa endi omuchesichesi, ndamuhamba munjila yoburana. 17Khubeenabo aba ndamurumila, niwina khubo owa ndeekhoonyela okhumubatsa? 18Ndamuchesiyia Tito, niruma omwana weefwe ulia ninaye. Tito yamubatsakhwo noho? Shikhwachenda muRoho mulala oyo? Shikhwalonda mumakulu malala ako?
19Okhuula bulaano mukaala mbu khwiteetsanga imbeli weenywe. Imbeli waNyasaye khuboolelanga muKristo. Abaheelwa banje, amakhuwa kosi nakokhumuumbakha inywe. 20Okhuba eriitsanga mbu haundi, olwa enzitsa, ndakhamunyoola nimurali shinga olwa enzenya ta, kata omwene nimunyooleshela nindali shinga olwa mwenya tawe; mbu haundi biakhabeho obusoolo, nelikhalikhali, noburinla, nobuyingani, nobuchiishi, nobumoonyi, nobwichinjimisii, neindiri; 21mbu haundi olwa enzitsa khandi Nyasaye wanje yakhandiitiyia imbeli weenywe, nasi nimbeelelela abanji khubo aboonoona khale nibareekalukhasia okhulekha akeshifwabwi nobuheyi nobwilaasi bwosi obwa bakhola ta.
Currently Selected:
2 Abakorinzo 12: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
