1 Abatsesalonika 5
5
Khube nikhwirechesheele okhwitsa khwOmwami
1Ne khumakhuwa kebise netsinduukho, baana beefwe, shimuli nende akachila nimuhandiichilwa likhuwa liosi ta. 2Shichila inywe abeene mumanyile bulayi mbu induukho yOmwami yiitsanga shinga omwibi olwa yeetsa mushilo. 3Olwa baba nibashiboola mbu Omulembe nende obulayi, nonoho obwonooneshi bubasundusia, shinga inzibula olwa yimusundusia omukhasi ouli inda; kata shibaleehonokokha ta. 4Nebutswa inywe, baana beefwe, shimuli mushiilima, mbu induukho eyo yimunyoolelesie shinga omwibi, ta; 5okhuba inywe mwesi muli abaana bobulafu, khandi abaana beshiteere; shikhuli abeshilo, kata abeshiilima, tawe. 6Kho khuleshenje okhukona tsindoolo, shinga abandu bandi ta; habula mbu khubeetsenje meeso nikhwiruka. 7Shichila abakonanga tsindoolo bakonanga eshilo; nabo abameela bameelanga eshilo. 8Nebutswa ifwe, olwa khuli abeshiteere, khwiruche abeene, nikhwifwala khubilifu ebitsengwa biobusuubili nobuheeli; obunaayi bwobuhonia nabwo bube ikuutwa. 9Shichila Nyasaye shiyakhuraho khulwa oburima ta, habula khulwa okhunyoola obuhonia khulwa Omwami weefwe Yesu Kristo, 10owakhufwila, mbu kata nikhuli meeso kata nikhukona, khubeetsenje mwoyo halala ninaye. 11Kho mutinyisaninjie, nimuumbakhana, shinga olwa mukholanga.
Akobuchesiyii namashiesio akahelelesia
12Ne khumusaaya, baana beefwe, mbu mubeetsulile abo abanyakhananga hakari mwinywe, nibamuruka muMwami, nibamwitsusia, 13nimubaheelesia oluyali mubuheeli khulwa emilimo chiabwe. Mumenyenje mumulembe abeene nabeene. 14Khumwitsusia, baana beefwe, mbu chesiyie abakara, tinyisie abafwile omwoyo, khoonye ababula amaani, nimwisimilisilia bosi. 15Omundu yesi aleshe okhurunga owashie obubii khububii ta; nebutswa tsindaalo tsiosi mulondachililenje akali amalayi, abeene mwenyene khandi nende khubosi.
16Sangaalenje tsindaalo tsiosi. 17Murakonelanga okhusaaya ta. 18Mumakhuwa kosi, mukhupenje orio, shichila nilio elia Nyasaye amwenyela muKristo Yesu.
19Murasimia Roho ta. 20Murafwola obulakusi ta. 21Teeme amakhuwa kosi, nimuhanda khukali amalayi. 22Mwihaanye khububii bwersimhia tsiosi.
23Nyasaye womulembe omwene amwahulile elala; mulindungwe bulayi, roho nomwoyo nomubili, mube abalamba ababula eshikha shiosi khukhwitsa khwOmwami weefwe Yesu Kristo. 24Oumulanga nomwisiikwa; alakakhola.
25Baana beefwe, mukhusaayilenje.
26Mushiesilie abaana beefwe bosi nokhutsunzuuna okhutakatifu. 27Emubiila muMwami, mbu ibarwa yino yisoomelwe abaana beefwe bosi.
28Obukoosia bwOmwami weefwe Yesu Kristo bubeetsenjeho nineenywe.
Currently Selected:
1 Abatsesalonika 5: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
