Ruf 3
3
Ruf Ane Boaz Naŋ Be A Kaŋmɛ Gbaŋgbalaa Poɔ
1 #
Ruf 1:9
A Ruf serɛ ma Nawomi da yeli ko o la, “N pɔgeyaa, a seŋ ka N bɔ yiri fo naŋ na zeŋ ko fo, ka lɛ e ka yɛlɛ kyɛnɛ velaa korɔ fo. 2Nyɛ a Boaz waa la te dɔgrɔ, a onaŋ tonton-bipɔgeba fo ne ba naŋ da toŋ toma be la kyɛ. A tensogɔ ŋa a Boaz na gaa te yeɛle la o kazeɛ a gbaŋgbalaa poɔ. 3So koɔ̃ pampana, a zɛ kãã-nyunoɔ, a su fo boma naŋ veɛlɛ, a sigi gaa a gbaŋgbalaa poɔ; kyɛ tɔɔ wa derɛ fo meŋɛ wullo a dɔɔ te ta saŋ o naŋ di kyɛ nyu baare. 4Ka o naŋ wa te gana, kaa baŋ zie o naŋ gaŋ. A lɛ puoriŋ, pãã gaa te nyɔge a wagyɛ naŋ page a o gbɛɛ eŋɛ veɛ kyɛ gaŋ. O na wuli fo la lɛ fo naŋ na e.” 5Ka a Ruf yeli ko a o serɛ ma, “N na e la a yɛlɛ zaa fo naŋ yeli ka N e.”
6Lɛnso a Ruf da sigi gaa la a gbaŋgbalaa poɔ a te e a lɛ a o serɛ ma naŋ da yeli ka o e. 7A Boaz naŋ da wa di kyɛ nyu baare, a tege ka o eŋɛ maa, o da gaa te gaŋ la a kabie naŋ duo pare. Lɛ la ka a Ruf da kyɛŋ zolomzolom a wa veɛ a wagyɛ naŋ page o gbɛɛ eŋɛ kyɛ gaŋ. 8Tensogpozentaa saŋ, a Boaz da miie la a gbaale iri, o naŋ da nyɛ pɔge ka o gaŋ kɔge o gbɛɛ! 9#Begɛ 25:5; Ezɛk 16:8 Ka o da soore, “Nembuo la?” Ka a Ruf da yelsɔge, “Maa Ruf a fo tonton-bipɔge la; de a fo wagyɛ page a fo tonton-bipɔge, bonso, fo e la n dɔgrɔ.” 10#Ruf 2:11 Ka a Boaz da yeli, “N pɔgeyaa, ka a DAANA maale fo. A fo puori nɔmmo ŋa soma gaŋ la a dɛndɛŋ deni; fo ba zo tu pɔlbilii naŋ waa nandaanema bee bondaanema puori. 11N pɔgeyaa, pampana, ta zoro dabeɛ̃. N na e ko fo la yeli zaa fo naŋ yeli ka N e, bonso, a n noba zaa baŋ ka fo waa la pɔg-meŋɛ. 12Yelmeŋɛ zaa, aneazaa ka N waa la a fo dɔgrɔ naŋ na toɔ̃ yɔɔ de fo kyɛ neɛ kaŋ bebe la a peɛle fo gaŋ ma. 13Gaŋ a kyɛ a tensogɔ ŋa ka zie nyaa. Ka o naŋ wa boɔrɔ ka o de fo, a soma la, vɛŋ ka o e a lɛ. Kyɛ ka o naŋ ba wa boɔrɔ ka o de fo, lɛ eŋ, a DAANA naŋ voorɔ, N na de fo la. Fõõ gaŋ ka zie nyaa.”
14Lɛ la ka o da gaŋ a o gbɛɛ puliŋ ka zie te nyaa. Kyɛ o da iri la zivɛlemɛ, saŋ neɛ naŋ kontoɔ̃ nyɛ o tɔsoba a baŋ o, bonso, a Boaz da yelee la, “A ba seŋ ka neɛ baŋ ka pɔge da wa la a gbaŋgbalaa poɔ.” 15Lɛ la ka a Boaz da yeli, “De a fo kpar-kpoŋ fo naŋ su wa ne, a wa nyɔge o yuo velaa.” Lɛ la ka o da nyɔge a kparoo ka a Boaz manne kazeɛ ŋmannɔɛ ayoɔbo a soŋ de dɔgle o bagŋmane zu. A lɛ puoriŋ la ka a Ruf da gaa a teŋɛ poɔ. 16A Ruf da wa la a o serɛ ma zie ka a o serɛ ma da soore o, “N pɔgeyaa, wola ka yɛlɛ kyɛŋ ko fo?” Lɛ la ka Ruf da manne a yɛlɛ zaa a dɔɔ naŋ e ko o, 17a yele, “O manne la kazeɛ ŋmannɔɛ ayoɔbo ko ma, bonso, o yelee la, ‘Ta leɛ gaa a fo serɛ ma zie ne nuzaglaa.’ ” 18Ka a Nawomi da yeli, “N pɔgeyaa, kyɛllɛ te ta saŋ na fo naŋ na baŋ lɛ a yɛlɛ naŋ na kyɛŋ, bonso, a dɔɔ koŋ zeŋ te ta saŋ o naŋ maale a yɛlɛ zenɛ.”
Dagaare First Bible © The Bible Society of Ghana, 2025.