Ruf 2
2
Ruf Naŋ Tuori Boaz
1A Nawomi serɛ dɔgrɔ kaŋ da bebe la, a waa bondãã-yuori. O da e la Elimɛlɛk boorɔ neɛ ka o yuori di Boaz. 2Ruf naŋ yi a Mowab teŋɛ da yeli ko la a Nawomi, “Vɛŋ ka N gaa weɛ poɔ a te inni kazuri, a tuuro neɛzaa naŋ na zo n nembaaloŋ.” Ka a Nawomi da yeli ko o, “N pɔgeyaa, gɛrɛ.” 3Lɛ la ka o da gaa, a wa tuuro kakyeɛrebɛ mine puori a inne kazuri. A naŋ da e a lɛ, o da wa kpɛ la a Boaz naŋ e a Elimɛlɛk boorɔ neɛ weɛ poɔ. 4A lɛ poɔ la ka a Boaz meŋ da yi a Bɛtelɛhɛm wa. O da wa puori la a kakyeɛrebɛ, “Ka a DAANA be yɛ zie.” Ka ba yelsɔge, “Ka a DAANA maale fo.” 5Lɛ la ka a Boaz da soore a tontonɔ na naŋ da kaara a kakyeɛrebɛ zu, “Nembuo la so a pɔgesaraa ŋa?” 6Ka a tontonɔ na naŋ da kaara a kakyeɛrebɛ zu da yelsɔge, “A Mowab teŋɛ pɔgeyaa naŋ da tu a Nawomi yi a Mowab paaloŋ wa la. 7O da wa yelee la, ‘Yããyãã zaa, naŋ vɛŋ ka N tuuro a kakyeɛrebɛ a inne a kazuri a kadorri naŋ biŋ kpakyagaŋ.’ Lɛ la ka o wa are o gbɛɛ zu yi bagu-pipi zaa wa tɔ ŋaa ka o naŋ zeŋ pɛnne belãã yoŋ naane.”#2:7 A yɛlɛ ŋa ba kyaane velaa a Hiburu gansoŋ poɔ
8Lɛ la ka a Boaz da yeli ko a Ruf, “N pɔgeyaa, kyɛlle woŋ, ta la gaa weɛ zaa poɔ a te inni bee a bare a zie ŋa, tage peɛle a n tonton-bipɔgeba. 9E ka fo nimiri be a weɛ na ba naŋ kyeɛrɛ a boma, a tuuro ba puori. N yeli ko la a pɔlbilii ka ba tɔɔ wa dɔɔnɔ fo. Ka kɔnnyuuri wa kpɛ fo, gaa te nyu a koɔ̃ a pɔlbilii naŋ ɔŋ eŋ a dogre poɔ.” 10Lɛ la ka a Ruf da le vɔgle muro ka o niŋe tɔ teŋɛ kyɛ yeli ko a Boaz, “Bonso ka fo zo n nembaaloŋ, a taa n yɛlɛ, maa naŋ waa nɔɔraa?” 11#Ruf 1:16-17 Ka a Boaz da yelsɔge o, “A yɛlɛ na zaa fo naŋ e ko a fo serɛ ma yi a saŋ a fo serɛ naŋ kpi ane lɛ fo naŋ bare fo saa ane fo ma ane fo tendɔgraa a wa kpeɛrɛ noba fo naŋ ba baŋ poɔ, a zaa ka ba manne ko ma. 12Ka a DAANA yɔɔ fo ne a yɛlɛ fo naŋ e. Fo na nyɛ la fo san-yɔɔ zaa yi a DAANA, a Izerayɛl Naaŋmen zie. O puliŋ la ka fo zo wa sɔgle!” 13Lɛ la ka a Ruf da yeli, “N daana, ka Ŋmen soŋ ka N naŋ kyɛnɛ nyɛrɛ nembaalonzoe yire fo zie, bonso, fo moore ko ma la kyɛ yeli yɛlɛ baaloŋ ko a fo tontonɔ, aneazaa ka N ba waa a fo tontonɔ kaŋ.”
14A diibu saŋ naŋ da wa ta, a Boaz da yeli ko la a Ruf, “Wa di a bondirii ama mine. Tage ta ka te zaa laŋ di.” Lɛnso, o da zeŋ peɛle la a kakyeɛrebɛ ka a Boaz da ɔŋ a kyi mine ba naŋ vuuli ne vũũ ko o. A Ruf da di tegɛɛ la kyɛ ka a mine da kyɛre. 15O naŋ da wa iri ka o inni a boma, a Boaz da yeli ko la a pɔlbilii, “Yɛ bare o ka o inne a boma a kadorri yɛ naŋ biŋ sogɔŋ kyɛ ta e o nimikpɛ-yɛlɛ. 16#Bag 19:9 Yɛ maŋ iri a kazuri mine yi a anaŋ yɛ naŋ leŋ poɔ lɔɔ bare o, a bare a ka o inne kyɛ ta wa yeli o yelfaa zaa.”
17Lɛ la ka o da inni a boma a weɛ poɔ ka zie te maa. O da ŋmɛ la a kazuri na o naŋ da inni ka a da ta ŋa talakpoŋ noɔre. 18O da tuo a la wa a teŋɛ poɔ, ka a o serɛ ma da nyɛ a boma o naŋ inni. O da de la a bondirii o naŋ da di kyɛ kyɛre ko a o serɛ ma. 19A o serɛ ma da soore o la, “Yeŋ ka fo gaa te inni a boma zenɛ? Yeŋ ka fo gaa te toŋ? Ka a dɔɔ na naŋ soŋ fo nyɛ maaloo.” Lɛ la ka o da yeli ko a o serɛ ma a soba na zie o naŋ gaa te toŋ. O da yelee la, “A dɔɔ na zie n naŋ toŋ a toma zenɛ yuori la Boaz.” 20Lɛ la ka Nawomi da yeli ko a o naapɔge, “Ka a DAANA maale a soba ŋa naŋ ba zagre ka o zo a voba ane a kuuni nyonono!” A Nawomi meŋ da la yeli ko la a Ruf, “A dɔɔ e la te dɔgrɔ. Te ne o dɔgroŋ peɛle la taa.” 21Lɛ la ka Ruf naŋ yi a Mowab teŋɛ da yeli, “O gba yeli ko ma la, ‘Tuuro a n tontonema puori te ta saŋ ba naŋ kyɛ a boma zaa.’ ” 22A Nawomi da yeli ko la a o naapɔge Ruf, “N pɔgeyaa, a soma la ka fo maŋ yi tuuro a Boaz tonton-bipɔgeba, ka lɛ naane, ka fõõ gaa wɛ-yuo poɔ, ba na pɔɔ wa dɔɔnɔ fo la.” 23Lɛ la ka a Ruf da tuuro a Boaz tonton-bipɔgeba puori a inne a boma te ta saŋ ba naŋ kyɛ a kazeɛ ane a kapelaa zaa baare. O da laŋ kpeɛrɛ ne la a o serɛ ma.
Currently Selected:
Ruf 2: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.