Sɔroo 4
4
A Kohat Noba Yɛlɛ
1A DAANA da yeli la yɛlɛ ko a Mooziz ane Aarɔn a yele: 2Yɛ sɔre a Kohat noba yoŋ a yi a Levi noba poɔ, yɛ sɔre ba bale bale ane ba sããkom-dendɔɛ eŋɛ. 3#Sɔr 8:24 Yɛ sɔre banaŋ naŋ nyɛ yuomo lezare ne pie kyɛ te ta yuomo lezaayi ne pie, banaŋ zaa naŋ seŋ ka ba tonɔ toma a lantaa sege poɔ. 4A Kohat noba toma a lantaa sege poɔ la ka ba kaara a bonsonne zu.
5Ka ba naŋ na wa wele a sege, a Aarɔn ane o bidɔbɔ na daŋ kpɛ te yage la a patiisa a de pilli page a Naaŋmen nɔɛ daga; 6kyɛ pãã de gane naŋ soma pɔge o, a de pɛn-suuni yɛre pɔge o kyɛ de a daga dawogri eŋ a emmo ziiri. 7Ba na de la pɛn-suuni yɛre page a tabole ba naŋ maŋ de a Boroboro Na Ba Naŋ De Ko Naaŋmen dɔgle, kyɛ de a pɛrɛtɛre, a ensɛnse laare, a talaare ane a dogebilii ba naŋ maŋ bare ne koɔ̃. Ba na de la a bie la bie zaa boroboro meŋ dɔgle a tabole zu. 8Ba pãã na de la pɛnze-toẽtoẽ yɛre page kyɛ de gane naŋ soma page, a de a daga dawogri eŋ a emmo ziiri. 9#Yiib 25:31 Ba na de la pɛn-suuni page a fentel-daa ane a fentele, a fentel-mie, a laare ane boma na zaa ba naŋ maŋ eŋ a fentel-kãã. 10Ba na de la gane naŋ soma page a fentel-daa ne o boma zaa a de a eŋ gbɔge ba naŋ maŋ tuoro ne boma poɔ. 11Ba na de la pɛn-suuni yɛre page a salema bagmaalkuuri kyɛ de gane naŋ soma page o a de a dawogri eŋ a emmo ziiri. 12A lɛ puoriŋ, ba na de la a puoruudie boma zaa ba naŋ maŋ tonɔ ne eŋ a pɛn-suuni poɔ, kyɛ de gane naŋ soma page a kyɛ de a eŋ gbɔge ba naŋ maŋ tuoro ne boma poɔ. 13Ba na wuo la a Naaŋmen bagmaalkuuri zu tampɛloŋ te bare, kyɛ de pɛnzeɛ yɛre page. 14Ba na de la a Naaŋmen bagmaalkuuri kpaŋkparema zaa ba naŋ da maŋ tonɔ ne toma a be, a vũũ-laare, a nyaare, a sɔbolɔ, talaare ane a Naaŋmen bagmaalkuuri boma zaa naŋ dɔgle o zu, kyɛ de gane naŋ soma yɛre page kyɛ de a dawogri eŋ a emmo ziiri. 15#Sɔr 7:9; 2 Sam 6:6-7 A Aarɔn ane a o bidɔbɔ naŋ da wa page a puoruudie ane o poɔ boma zaa baare, ka a sege wele baare, a lɛ puoriŋ, a Kohat noba na wa zɛle la a boma, kyɛ a ba seŋ ka ba seene a bonsonne, bonso, ka ba naŋ seene a ba na kpi la. A lantaa sege boma ama la ka a Kohat noba da seŋ ka ba tuo.
16A Naaŋmen bagmaala Aarɔn bidɔɔ Eleyaza la na kaara a fentelɛ vũũ kãã, a ensɛnse, a bie la bie zaa bombie kyɔɔtaare, ane a kããsoŋ zu. O na kaara la a sege ane bonzaa naŋ be o poɔ, a naŋ kaara a puoruudie ane o poɔ boma zaa.
17Lɛ la ka a DAANA da yeli yɛlɛ ko a Mooziz ane Aarɔn a yele: 18Yɛ ta wa vɛŋ ka ba ŋmaa a Kohat bale noba yi a Levi noba poɔ bare. 19Ŋaa la ka yɛ na e ko a Kohat bale ka ba na voorɔ a ta kpi ka ba naŋ wa peɛle a bonsonne zaa bonsonne: Fõõ Aarɔn ane fo bidɔbɔ na maŋ kpɛ ko la ba yeni yeni zaa ba tonnoɔre bee toma. 20#1 Sam 6:19 Kyɛ a ba seŋ ka a Kohat bale kpɛ kaa a bonsonne fẽẽ zaa; ka lɛ naane ba na kpi la.
A Gɛsɔn Ane Mɛrari Noba Yɛlɛ
21A DAANA pãã da yeli la yɛlɛ ko a Mooziz, a yele: 22Sɔre a Gɛsɔn noba meŋ, sɔre ba sããkom-yie ane ba bale bale. 23Fo na sɔre la banaŋ naŋ nyɛ yuomo lezare ne pie kyɛ te ta yuomo lezaayi ne pie, a sɛge banaŋ zaa naŋ seŋ ka ba tonɔ toma a lantaa sege poɔ yoe. 24A Gɛsɔn bale noba na tonɔ korɔ la a noba kyɛ tuoro boma. 25Ba naŋ na maŋ de a puoruudie patiisare ane a lantaa sege bompagre ane a gane naŋ soma ka ba maŋ page a sege zu ane a lantaa sege dendɔre patiisa. 26Ba na de la a davoro boŋyaglee ane a dendɔ-kpoŋ naŋ kpeɛrɛ a davoro naŋ gyeere a puoruudie ane a Naaŋmen bagmaalkuuri patiisare ane a mie. Ba na de la a boma zaa ba naŋ tonɔ ne ba toma kyɛ e yelzaa naŋ seŋ ka a e kyaare ne ba. 27A Gɛsɔn noba toma zaa na e la yeli a Aarɔn ane a o bidɔbɔ naŋ yeli ko ba ka ba e, bonna zaa ba naŋ na de ane bonna zaa ba naŋ na e. Yɛ na wuli ba la bonna zaa a naŋ seŋ ka ba tuo. 28A Gɛsɔn noba tontonne ane ba feroo toma a lantaa sege poɔ na la ka ba be a Naaŋmen bagmaala Aarɔn bidɔɔ Itama puliŋ a tuuro o noɔre.
29A Mɛrari bale noba eŋ, a seŋ ka fo sɔre ba a bale bale ane ba sããkom-yie. 30Sɔre banaŋ naŋ nyɛ yuomo lezare ne pie kyɛ te ta yuomo lezaayi ne pie, a banaŋ zaa naŋ seŋ toma tommo a lantaa sege poɔ. 31Toma ŋa la ka ba da ko ba noɔre ka ba tonɔ: ba toma zaa a lantaa sege poɔŋ la ka ba kaara a puoruudie dateɛre ane a dagarre, a dalugo ane a dalugo dɔgloo ziiri. 32A davoro dalugo ane a dalugo dɔgloo ziiri, a bambinni ane a mie a de ne a toma boma zaa. A Naaŋmen bagmaala na maŋ wuli la ba kanzaa bon o naŋ na tuo. 33A Mɛrari bale toma la a ŋa, ka ba na tonɔ a lantaa sege poɔ. Ba toma zaa la a ŋaa ka ba na tonɔ a Naaŋmen bagmaala Aarɔn bidɔɔ Itama puliŋ.
A Levi Bale Noba Sɔroo Yɛlɛ
34Lɛnso a Mooziz ane Aarɔn ane a laŋne deme wederebɛ da sɔre la a Kohat noba, ba bale bale ane ba sããkom-yie, 35a yi banaŋ naŋ ta yuomo lezare ne pie te tɔ yuomo lezaayi ne pie, neɛzaa naŋ seŋ ne ka o toŋ toma naŋ kyaare ne a lantaa sege; 36a ba bale bale noba noɔre ba naŋ da sɔre da waa la noba turaayi a dɔgle kɔɔraayopoĩ ane lezaayi ne pie (2,750). 37Ŋaa la ka ba da sɔre a Kohat bale noba, a banaŋ zaa naŋ da tonɔ a lantaa sege poɔ, banaŋ a Mooziz ane a Aarɔn naŋ da sɔre a seŋ lɛ a DAANA naŋ da yeli ko a Mooziz.
38A Gɛsɔn noba ba naŋ da sɔre, ba bale bale ane ba sããkom-yie, 39a yi banaŋ naŋ ta yuomo lezare ne pie te tɔ yuomo lezaayi ne pie, neɛzaa naŋ seŋ ne ka o toŋ toma kyaare ne a lantaa sege; 40a ba bale bale ane a ba sããkom-yie noɔre ba naŋ da sɔre da waa la turaayi a dɔgle kɔɔraayoɔbo ane lezare ne pie (2,630). 41Ŋaa la ka ba da sɔre a Gɛsɔn bale noba, a banaŋ zaa naŋ da tonɔ a lantaa sege poɔ, banaŋ a Mooziz ane a Aarɔn naŋ da sɔre a seŋ lɛ a DAANA naŋ da yeli ko a Mooziz.
42A Mɛrari noba ba naŋ da sɔre, ba bale bale ane ba sããkom-yie, 43a yi banaŋ naŋ ta yuomo lezare ne pie te tɔ yuomo lezaayi ne pie, neɛzaa naŋ seŋ ne ka o toŋ toma kyaare ne a lantaa sege; 44a ba bale bale noba noɔre ba naŋ da sɔre da waa la turaata a dɔgle kɔɔraayi (3,200). 45Ŋaa la ka ba da sɔre a Mɛrari bale noba, banaŋ a Mooziz ane a Aarɔn naŋ da sɔre a seŋ lɛ a DAANA naŋ da yeli ko a Mooziz.
46A Levi noba banaŋ zaa a Izerayɛl wederebɛ naŋ da soŋ a Mooziz ane a Aarɔn ka ba sɔre, a ba bale bale ane a ba sããkom-yie, 47a yi banaŋ naŋ ta yuomo lezare ne pie te tɔ yuomo lezaayi ne pie, neɛzaa naŋ seŋ ne ka o tonɔ a lantaa sege poɔ toma kyɛ tuoro a lantaa sege boma, 48ba zaa lantaa ba naŋ da sɔre noɔre da waa noba turaanii a dɔgle kɔɔraanuu ane lezaanaare (8,580). 49A kyaare ne a noɔre a DAANA naŋ da tere, a Mooziz da kaa-iri la ba kanzaa a ko o, o tonnoɔre ane boma o naŋ na tuo; lɛ la ka Mooziz da sɔre ba, a seŋ lɛ a DAANA naŋ da yeli ko o.
Dagaare First Bible © The Bible Society of Ghana, 2025.