Sɔroo 3
3
A Aarɔn Bidɔbɔ Yɛlɛ
1 #
Yiib 6:23
A Aarɔn ane Mooziz dɔgroŋ-gbɛɛ la a ŋa saŋ na a DAANA naŋ da yeli yɛlɛ ko a Mooziz a Sanae Taŋzu. 2A Aarɔn bidɔbɔ yoe la a ama: Nadab a o bidɛŋ, ane Abihu, Eleyaza ane Itama: 3A Naaŋmen bagmaala Aarɔn bidɔbɔ ba naŋ da sɔ kããsoŋ yoe la lɛ. O da kaa-iri ba la ka ba tonnoɔre e a Naaŋmen bagmaalba toma. 4#Bag 10:1-2 Kyɛ Nadab ane Abihu da kpi la a DAANA niŋeŋ a Sanae wɛgyɛŋ poɔ, ba naŋ da nyege vũũ naŋ ba seŋ ne ko a DAANA. Ba da ba dɔge biiri kyɛ kpi. Eleyaza ane Itama eŋ da toŋ la a Naaŋmen bagmaalba toma a ba saa Aarɔn nyɔvore saŋ.
A Levi Noba Tonnoɔre
5A DAANA pãã da yeli la yɛlɛ ko a Mooziz a yele: 6#Yiib 32:29 “E ka a Levi bale tage peɛle ka fo de ba ko a Naaŋmen bagmaala Aarɔn ka ba na soŋnɔ o. 7Ba na tonɔ la toma korɔ a Aarɔn ane a laŋne noba zaa a lantaa sege niŋesogɔŋ a kyɛ tonɔ toma a sege poɔ; 8#Sɔr 4 bana la na kaara a lantaa sege poɔ boma zaa zu, a kyɛ tonɔ ba feroo toma korɔ a Izerayɛl biiri zaa ka ba naŋ wa tonɔ a sege poɔ. 9Fo na de la a Levi noba ko a Aarɔn ane o biiri. A Levi bale noba la ka ba kaa-iri a Izerayɛl biiri poɔ ka ba tonɔ korɔ a Aarɔn ne ba poɔ zaa. 10#Sɔr 1:51 Kyɛ fo na kaa-iri la a Aarɔn ane o bidɔbɔ ka ba tonɔ a Naaŋmen bagmaalba tonnoɔre, ka neɛzaa ba wa poɔ ba poɔ kyɛ wa peɛle a be, a fere ka ba ko o.”
11Lɛ la ka a DAANA da yeli yɛlɛ ko a Mooziz a yele: 12#Sɔr 8:16; Yiib 13:2 N sage de la a Levi bale noba yi a Izerayɛl biiri zaa poɔ ka ba na leɛre a Izerayɛl bidɛndɛnne zaa zu, bidɛndɛnne zaa naŋ yuori a ba mamine vowoore. A Levi bale na e la N soobo, 13bonso, a bidɛndɛnne zaa e la N soobo; N naŋ da ko a bidɛndɛnne zaa a Igyipiti teŋɛ poɔ, N da iri la a Izerayɛl bidɛndɛnne a maale ba ko N meŋɛ, a nensaalba ane a donne zaa; ba na waa la N soobo. Maa la a DAANA.
A Levi Noba Sɔroo Yɛlɛ
14A DAANA pãã da yeli la yɛlɛ ko a Mooziz a Sanae wɛgyɛŋ poɔ a yele: 15Sɔre a Levi noba sããkom-yie ane ba bale bale. Fo na sɔre la bidɔɔ zaa naŋ ta kyuu-gbuli kyɛ dɔgle. 16Lɛ la ka a Mooziz da sɔre ba a seŋ lɛ a DAANA yelbiri naŋ da yeli. 17#Yiib 6:16-19 A Levi bidɔbɔ ane ba yoe la a ama: Gɛsɔn, Kohat ane Mɛrari. 18A Gɛsɔn bidɔbɔ ane ba bale bale la bama: Libini ane Simeyi. 19A Kohat bidɔbɔ bale bale la bama: Amiram, Iza, Hɛberɔn ane Yuziyɛl. 20A Mɛrari meŋ bidɔbɔ bale bale la bama: Maali ane Musi. A Levi sããkom-yie bale bale la lɛ.
21A Gɛsɔn bale noba da la Libini noba ane Simeyi noba; a bale ama ayi la da lantaa e a Gɛsɔn noba. 22A ba sɔroo daare ba da sɔre la bidɔbɔ naŋ ta kyuu-gbuli kyɛ dɔgle ka ba noɔre ta noba turaayopoĩ ane kɔɔraanuu (7,500). 23A Gɛsɔn noba da seŋ ka ba zeŋ a sege dampuori lambori saniŋe seŋ, 24ka a Layɛl bidɔɔ Eliyasaf waa Gɛsɔn noba sããkom-yiri wederɛ. 25A Gɛsɔn bidɔbɔ feroo toma a lantaa sege poɔŋ la ka ba kaara a sege boma ama zu; a pɛne naŋ pilli a sege, a lantaa sege dendɔre patiisa, 26a davoro patiisare, a davoro dendɔre ane a bagmaalkuuri die patiisare a de ne a patiisa mie; ba feroo toma la ka ba kaara yelzaa naŋ kyaare ne a boma ama.
27A Kahat bale noba la Amram noba, Iza boorɔ noba, Hɛberɔn boorɔ noba ane a Uziyɛl boorɔ noba. A bale ama la lantaa waa a Kohat boorɔ noba. 28Ba naŋ da wa sɔre a dɔbɔ zaa naŋ nyɛ kyuu-gbuli kyɛ dɔgle, ba zaa noɔre da waa la noba turaanii ane kɔɔraayoɔbo (8,600), a da tonɔ a puoruudie toma. 29A Kohat bale noba da seŋ ka ba zeŋ a sege dampuori lambori sapare nudoloŋ seŋ, 30#Bag 10:4 ka Yuziyɛl bidɔɔ Elizafan e ba sããkom-yiri, a Kohat bale wederɛ. 31#Sɔr 7:9 A Kohat noba feroo toma da la ka ba kaara a Naaŋmen nɔɛ daga, a tabole, a fentel-daa, a bagmaalkuuri, a puoruudie laare a Naaŋmen bagmaalba naŋ maŋ tonɔ ne, ane a patiisa. Ba feroo toma la toma na zaa naŋ kyaare ne a boma ama. 32A Naaŋmen bagmaala Aarɔn bidɔɔ Eleyaza la na e a Levi wederebɛ zaa neŋkpoŋ, ka o feroo toma na e ka o kaara a banaŋ naŋ tonɔ toma a puoruudie poɔ.
33Mɛrari bale noba da la a Maali boorɔ noba ane a Musi boorɔ noba. A bama la da lantaa e a Mɛrari boorɔ noba. 34A ba sɔroo daare, ba dɔbɔ naŋ da nyɛ kyuu-gbuli kyɛ dɔgle noɔre da waa la noba turaayoɔbo ane kɔɔraayi (6,200). 35A Mɛrari bale sããkom-yiri neŋkpoŋ da la Abihel bidɔɔ Zuriyɛl; ba na la da na zeŋ a sege dampuori lambori sapare nugɔɔ seŋ. 36A tonnoɔre ba naŋ da ko a Mɛrari bidɔbɔ da la ka ba kaara a sege dateɛre, a dawogri, a dalugo, a dalugo parɛɛ arezie ane a boma zaa. A ba toma da la ka ba tonɔ toma na zaa naŋ kyaare ne a boma ama. 37Ba toma meŋ da la ka ba kaara a davoro dalugo naŋ are gyeere ane a dalugo parɛɛ dɔgloo ziiri a de ne a bambinni#3:37 Bambinni: A Dagaaba mine maŋ yeli ka Kpaŋkpaare bee Kpag-bie. ane a mie zu.
38 #
Sɔr 3:10
Banaŋ naŋ da seŋ ka ba zeŋ a sege niŋesogɔ sapare seŋ (a lantaa sege niŋesogɔ naŋ kyaare a sapare seŋ) da la a Mooziz, Aarɔn ane a Aarɔn bidɔbɔ. Ba feroo toma da la ka ba kaara a puoruudie yeltuulo zaa ka a tonɔ, yelzaa naŋ seŋ ka ba e ko a Izerayɛl biiri; kyɛ a da seŋ ka ba ko neɛzaa naŋ ba poɔ ba poɔ kyɛ tage peɛle a be. 39A Levi noba a DAANA naŋ da e ka a Mooziz ane a Aarɔn da sɛge a ba bale bale yoe eŋ gane poɔ, a yi dɔbɔ naŋ ta kyuu-gbuli kyɛ dɔgle zaa lantaa noɔre da e la noba turi lezare ne ayi (22,000).
A Bidɛndɛŋ Faabo Yɛlɛ
40A DAANA pãã da yeli ko la a Mooziz: Sɔre a Izerayɛl biiri bidɔɔ-dɛndɛnne zaa naŋ nyɛ kyuu-gbuli kyɛ dɔgle a sɛge ba yoe. 41Kyɛ bare a Levi noba ka ba e N soobo (Maa la a DAANA) a leɛre a Izerayɛl bidɛndɛnne zaa zu, ka a Levi noba donne bil-dɛnne meŋ leɛre a Izerayɛl biiri donne bil-dɛnne zaa zu. 42A lɛ la ka a Mooziz da sɔre a Izerayɛl biiri bidɛndɛnne zaa aŋa lɛ a DAANA naŋ da yeli ko o. 43A bidɛndɛnne zaa naŋ ta kyuu-gbuli kyɛ gɛrɛ ka o da sɛge ba yoe zaa lantaa da e la noba turi lezare ne ayi dɔgle kɔɔraayi ane lezaata ne pie ne ata (22,273).
44Lɛ la ka a DAANA da yeli yɛlɛ ko a Mooziz a yele: 45#Sɔr 3:12 De a Levi noba ka ba leɛre a Izerayɛl bidɛndɛnne zaa zu, ka a Levi noba donne meŋ leɛre a Izerayɛl biiri donne bil-dɛnne zaa zu; a Levi noba na waa la N soobo. Maa la a DAANA. 46#Sɔr 3:39, 43 A Izerayɛl biiri kɔɔraayi ne lezaata ne pie ane ata (273) naŋ dɔgle ba noba noɔre eŋɛ ka ba gaŋ a Levi noba yɔɔ-deebo sane, 47ba yeni yeni zaa na yɔɔ la warebie anuu ka a seŋ lɛ a puoruudie yɔɔre naŋ biŋ. 48De a noba na naŋ dɔgle yɔɔ-deebo libie ko a Aarɔn ane a o bidɔbɔ. 49Lɛ la ka a Mooziz da de a noba naŋ dɔgle gaŋ a Levi noba yi a noba zie; 50o da de la a libie yi a Izerayɛl biiri bidɛndɛnne zie ka a lantaa e warebie turi dɔgle kɔɔraata ane lezaata ne anuu (1,365) ka a seŋ lɛ ba naŋ biŋ a puoruudie poɔ. 51A Mooziz da de la a yɔɔ-deebo libie ko a Aarɔn ane o bidɔbɔ aŋa lɛ a DAANA naŋ da yeli ko a Mooziz.
Currently Selected:
Sɔroo 3: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.