Luk 17

A Yeezu Yelyelii Mine

(Matio 18:6-7, 21-22; Mak 9:42)

1A Yeezu da yeli ko la O potuuribo, “A ferɛɛ la ka gbɛŋmɛ leebu saŋ wa, kyɛ zubie soba la neɛ na zaa zie anaŋ na tu wa! 2#Mat 18:6-7 Ka banaŋ da de neɛre kuuri leŋ yagle o soba kɔkɔreŋ, a de o lɔɔ eŋ mane poɔ, anaŋ da na seɛ ko o gaŋ o naŋ na e ka a bibiiri bama kanzaa ŋmɛ gbɛre le. 3#Mat 18:15 Yɛ gu yɛmenne velaa! Ka a yɛ kaŋ wa sãã yeli, yɛ wuli o a o saanaa, ka o naŋ wa sage, ka yɛ di suuri ko o. 4#Mat 18:21-22 Ka a soba ŋa ne o zu wa e fo faa gbɛre boyɔpoĩ bebi-yeni poɔ, kyɛ leɛ wa fo zie gbɛre boyɔpoĩ a wa yeli, ‘N sããɛ la’, a ferɛɛ la ka fo di suuri ko o.”

Yeldeebo Yɛlɛ

5 # Mak 9:24 A Apostoliimine da yeli ko la a Daana, “E ka a te yeldeebo la do zu!” 6#Mat 17:20; 21:21 Ka a Daana leɛ yelsɔge, “Ka yɛnee da taa yeldeebo ka o seŋ badog-biri, yɛ da na toɔ̃ yeli ko la teɛ ŋa, ‘Voɔ, a te ba mane poɔ’, kyɛ o na sage la yɛ noɔre.”

7“A yɛ buo soba la na yeli ko o gbaŋgbaa naŋ yi koɔbo bee peere kyeemo zie wa, ‘Wa kyɛ wieũ zaa, a wa zeŋ di diibu’? 8Ŋaa mɔɔ naane ka o na yeli ko o, ‘Maale zimaane diibu ko ma, a de fo bondirii maaloo kparoo su, a kyɛllɛ ma ka N wa di kyɛ nyu baare, kyɛ a puoriŋ, ka fo meŋ pãã di kyɛ nyu’? 9Fo maŋ puori la a gbaŋgbaa bareka ne o naŋ sage a fo noɔre be? 10Lɛ meŋ ne o zu, ka yɛnee wa toŋ a anaŋ ba naŋ ko yɛ noɔre ka yɛ toŋ, yɛ yeli, ‘Te waa la gbaŋgbaare naŋ ba seŋ ne; a te feroo toma la ka te toŋ!’ ”

Yeezu Naŋ Saŋ Kɔŋkɔnne Pie

11 # Luk 9:51; 13:22 A Yeezu naŋ da be a sobiriŋ gɛrɛ Gyeruzɛlɛm, O da tu la Galili ne Samaareya kpakyaga. 12#Bag 13:45-46 O naŋ da wa te kpɛ tembile kaŋ poɔ, kɔnne pie mine da tuori O la, a te are tɔɔre zaa, 13a boɔlɔ gboligboli yele, “Daana Yeezu, zo te nembaaloŋ!” 14#Luk 5:14; Bag 14:2-3 O naŋ da wa te nyɛ ba, O da yeli ko ba la, “Yɛ gaa te de yɛmenne wuli a Naaŋmen bagmaale nembɛrɛ.” Ba naŋ da gɛrɛ la ka a ba kɔnnoŋ deɛ baare. 15A ba kaŋ naŋ da nyɛ ka a o kɔnnoŋ baarɛɛ la, o da leɛ waɛ la a puuro Naaŋmen gboligboli lɛ. 16O da wa le vɔgle la muro a Yeezu puliŋ a puori O bareka. A dɔɔ ŋa da waa la Samaareya neɛ. 17Lɛ la ka a Yeezu da soore o, “Noba pie naane da nyɛ ba sammo be? Kyɛ a ba bawae na bɛ? 18Ka lɛ ba kanzaa ba leɛ wa ka o wa iri Naaŋmen yuori ka a saana ŋa yoŋ naane?” 19#Luk 7:50 Ka a Yeezu pãã yeli ko o, “Vaa-iri a gɛrɛ a fo gaabo zie, a fo yeldeebo saŋ fo la.”

A Naaŋmen Naaloŋ Waabo Yɛlɛ

(Matio 24:23-28, 37-41)

20 # Gyn 18:36 Saŋ kaŋ a Faraziimine da soore la a Yeezu wagre na a Naaŋmen naaloŋ naŋ na wa, ka O yelsɔge ba, “A Naaŋmen naaloŋ ba waana ne yɛlɛ yɛ naŋ na baŋ nyɛ; 21#Mat 24:23 bee ka ba na toɔ̃ yeli, ‘Yɛ nyɛ o ka o be kyɛ!’ Bee ‘Ona la be kyɛ!’ Bonso, a Naaŋmen naaloŋ be la yɛ zie serɛzaa.”

22Lɛ la ka a Yeezu da yeli ko a O potuuribo, “A bebie tara la, ka yɛ na boɔrɔ ka yɛ nyɛ a Nensaala Bie bebie na kaŋ, kyɛ yɛ koŋ nyɛ o. 23#Luk 21:8 Ba na yeli ko yɛ la, ‘Yɛ nyɛ o kyɛ’ bee ‘yɛ nyɛ o zie ŋa.’ Yɛ ta wa gɛrɛ be bee a boɔrɔ o. 24#Mat 24:27 Aŋa lɛ saa naŋ maŋ nyegre filɔɔ a kyaane a saluoni zaa a yi lambori ŋa a wa te gaa lambori ŋa, lɛ ka a Nensaala Bie na waa a O waabo saŋ. 25#Luk 9:22 Kyɛ O na daŋ nyɛ la dɔgɛɛ yaga, ka a zenɛ noba zagre O bare. 26#Mat 24:37-39 Aŋa lɛ anaŋ da waa a Nowa saŋ, lɛ meŋ ne o zu ka a na waa a Nensaala Bie bebie saŋ. 27#Piil 7:7-23 Ba da dire la kyɛ nyuuro, ka dɔbɔ derɛ pɔgeba, ka pɔgeba kulo serebɛ, a te ta a bebiri na daare a Nowa naŋ kpɛ a gbori ka kɔmpiiri da ŋmɛ, a ko a noba zaa. 28Aŋa lɛ a naŋ da waa a Lɔt saŋ na, ka noba da dire kyɛ nyuuro, a daara kyɛ koɔrɔ boma, a borɔ weɛ boma kyɛ meɛrɛ yie, 29#Piil 19:15; 19:24-25 kyɛ a bebiri na a Lɔt naŋ da wa yi a Sodom teŋɛ poɔ, vũũ ane gyirimuri#17:29 Gyirimuri: A Dagaaba mine maŋ yeli ka Gyeribir bee Gyeribi. da yi la sazu a mi aŋa saa a di ba zaa ko. 30Lɛ ka a na waa a bebiri na daare a Nensaala Bie naŋ na de O meŋɛ wuli. 31#Mat 24:17-18 A lɛ daare, neɛzaa naŋ be peɛzu, kyɛ ka o boma be a die poɔ, ba la seŋ ka o sigi wa de a boma kanzaa a die poɔ. A lɛ meŋ la ka neɛ naŋ be weɛ poɔ ta la leɛ kuli wa yiri. 32#Piil 19:26 Yɛ teɛre a Lɔt pɔge yɛlɛ. 33#Luk 9:24 Banaŋ zaa naŋ boɔrɔ ka ba faa bamenne nyɔvoɛ, na kɔŋ a la, kyɛ ka banaŋ naŋ na kɔŋ ba nyɔvoɛ na taa ba nyɔvoɛ. 34Maa yele korɔ yɛ, a tensogɔ na daare, noba bayi na laŋ gaŋ la gado yenaa zu, ka ba wa taa kaŋ gaa ne kyɛ bare kaŋ. 35#Mat 24:40-41 Pɔgebɔ bayi na laŋ ɛrɛ la zɔŋ, ka ba wa taa kaŋ gaa ne kyɛ bare kaŋ.” [36Noba bayi na be la weɛ poɔ, ka ba wa taa kaŋ gaa ne kyɛ bare kaŋ.] 37#Mat 24:28 Lɛ la ka a O potuuribo soore O, “Daana, yeŋ la ka a na e?” Ka a Yeezu yeli ko ba, “Benee poɔroŋ naŋ be, be la ka gyugmo#17:37 Gyugmo: A Dagaaba mine maŋ boɔle la a gyugmo ka Sedume. meŋ maŋ lantaa.”

Currently Selected:

Luk 17: DGA

Highlight

Copy