Piiluu 24

A Aizik Ane A Rebɛka Kultaa Yɛlɛ

1 # Piil 12:2; Yiel 112:2-3 A Aboraham da korɛɛ la, ka o yuomo waa yaga. A DAANA da maale la a Aboraham yelzaa poɔ. 2A Aboraham da yeli ko la a o tontombi-kpoŋ naŋ da kaara o boma zaa zu, “De fo nu eŋ n gbɛkpoŋ puliŋ#24:2 De fo nu eŋ n gbɛkpoŋ puliŋ: A Hiburu noba poɔ, a yeli ŋa da waa la noɔre polloo naŋ ba taa luuruu. A da maŋ waa ŋa o soba dɔɔloŋ la ka o maŋ pɔ ne. 3ka N e ka fo pɔ a DAANA, a sazu ane a teŋɛ Naaŋmen, ka fo koŋ e ka a n bidɔɔ de a Keeina noba poɔ n naŋ kpeɛrɛ pɔgeyaa ka o e o pɔge. 4A pɔ ka fo na gaa la n teŋɛ poɔ, a te de pɔge yi a n noba poɔ ko a n bidɔɔ Aizik.” 5Ka a tontonɔ da soore o, “Ka a pɔge ba wa sage ka o tu ma wa a teŋɛ ŋa poɔ, a na fere la ka n taa a fo bidɔɔ leɛ gaa ne a teŋɛ na fo naŋ yi wa a kyɛ be?” 6Ka a Aboraham da yeli ko o, “Kaara velaa a ta wa vɛŋ ka a n bidɔɔ leɛ gaa a be. 7#Piil 12:1, 7 A DAANA, a sazu Naaŋmen na naŋ da taa ma yi ne n saa yiri ane a n tendɔgraa poɔ, Ona la da yeli yɛlɛ ko ma kyɛ pɔ ko ma, ‘N na ko la a fo biiri a teŋɛ ŋa,’ O na e la ka O maleke de fo weɛ̃, ka fo te de pɔge yi a be wa ko a n bidɔɔ. 8Ka a pɔge ba wa sage ka o tu fo wa, lɛ eŋ, a pɔre fo naŋ pɔ koŋ tuuro fo, kyɛ ta wa vɛnɛ ka a n bidɔɔ leɛrɛ gɛrɛ a be.” 9Lɛ la ka a tontonɔ da de a o nu eŋ a o neŋkpoŋ Aboraham gbɛkpoŋ puliŋ kyɛ da pɔ kyaare ne a lɛ.

10 # Piil 11:31; 27:43 A tontonɔ pãã da de la a o neŋkpoŋ bontanne mine pie a yi tu a sori. O da taa la kyɔɔta-veɛle parɛɛ parɛɛ yi a o neŋkpoŋ zie gɛrɛ ne a Aram-naharayim, a Nahɔ teŋkpoŋ. 11O da eɛɛ la ka a bontanne gaŋ a teŋɛ noɔreŋ a peɛle bulee naŋ taa koɔ̃. A da gɛrɛ la zimaane, a saŋ na pɔgeba naŋ maŋ gaa te ɔŋ koɔ̃. 12O da puoree la a yeli, “DAANA woi, n neŋkpoŋ Aboraham Naaŋmen, n sɔrɔ fo la, vɛŋ ka a e velaa ko ma, a wuli a fo nɔmmo ko a n neŋkpoŋ Aboraham. 13N are la a koɔ̃ bulee ŋa pare ka a teŋɛ pɔgeyaare yire waana ka ba ɔŋ koɔ̃. 14Vɛŋ ka pɔgsaraa onaŋ zaa N naŋ na yeli, ‘Ko ma a fo yuori poɔ koɔ̃ ka N nyu,’ ka o yeli, ‘Nyu, kyɛ ka n ko a fo bontanne meŋ ka a nyu’; e neɛ fo naŋ iri ko a fo tontonɔ Aizik. A ŋaa la ka N na baŋ ka fo wuli la a fo nɔmbayeɛraa ko a n neŋkpoŋ.”

15 # Piil 22:23 O da ba yeli a yɛlɛ baare kyɛ ka a Rebɛka la lɛ a tuo yuori o bɔgŋmane zu. A Rebɛka da waa la Bɛtuwɛl pɔgeyaa kyɛ ka a Bɛtuwɛl da waa a Aboraham yɔɔ Nahɔ ane o pɔge Milka bidɔɔ. 16A Rebɛka da veɛlɛ la yaga, kyɛ da e bitoro.#24:16 Bitoro: A bitoro tɛgɛ la pɔge naŋ daŋ ba baŋ dɔɔ O da sigi la a bulnimiri poɔ a te ɔŋ koɔ̃ paale a o yuori a leɛ do ne. 17A Aboraham tontonɔ da zo tuori la a pɔgsaraa a yeli, “N sɔrɔ fo la, vɛŋ ka n nyu a fo yuori koɔ̃ belãã lɛ.” 18Ka a pɔgsaraa da leɛ yeli, “N neŋkpoŋ, de nyu” kyɛ da sigri a o yuori wieũ lɛ yi a o bɔgŋmane zu a ko o ka o nyu. 19A pɔgsaraa naŋ da wa ko o a koɔ̃ ka o nyu baare, a pɔgsaraa da yelee la, “N na ɔŋ la a koɔ̃ mine ko a fo bontanne meŋ ka a zaa nyu te baare.” 20O da kyiri la a koɔ̃ eŋ a donne kɔnnyu-laa poɔ wieũ zaa kyɛ la zo gaa a bulee ka o te ɔŋ mine wa ko a bontanne zaa ka a nyu. 21A dɔɔ da kaara la a pɔgsaraa zomm lɛ a ŋmeɛrɛ o gyɛŋ ka o baŋ ka a DAANA eɛɛ la ka a o sori o naŋ tu soma la bee ka o ba soma.

22 # Piil 24:47 A bontanne naŋ da wa nyu a koɔ̃ baare, a dɔɔ da de la salema nyɔbaŋ ane nu-banne ayi daaroŋ naŋ ba wono eŋ a pɔgsarlee, 23kyɛ da soore o, “Nembuo pɔgeyaa la fo? Zie be la a fo saa yiri poɔ ka te na gaŋ iri be?” 24Ka o da yelsɔge, “Bɛtuwɛl pɔgeyaa la ma, kyɛ e Milka ane Nahɔ yaŋaa.” 25O da la yelee la, “Te taa la kɛkɛrɛɛ ane moɔ yaga te yiri poɔ ane zie yɛ naŋ na gaŋ iri.” 26A dɔɔ da suli la o zu kyɛ puori a DAANA 27a yeli, “Ka a DAANA, a n neŋkpoŋ Aboraham Naaŋmen nyɛ puubu ne O naŋ ba zagre ka O wuli a n neŋkpoŋ nɔmmo ane yelmennoŋ. Maa eŋ, O taa ma la tu a sori wa ne a n neŋkpoŋ noba yiri.”

28A pɔgsaraa da zo te yeli la a yɛlɛ naŋ e ko a o ma yideme. 29A Rebɛka da taa la yɔɔdɔɔ ka o yuori di Lɛban. A Lɛban da yi zo gaa la a dɔɔ zie a bulee pare. 30A Lɛban naŋ deɛ da wa nyɛ a nyɔbaŋ ane a nubaŋ a o yɔɔpuulee naŋ eŋ kyɛ da woŋ lɛ a o yɔɔpuulee naŋ yeli ka a dɔɔ yeli ko o la, o da gaa la a dɔɔ zie a te are kɔge a bontanne naŋ be a bulee pare. 31O da yelee la, “Kpɛ wa, fõõ a DAANA naŋ maale. Boŋ la so ka fo are yeŋ poɔ? N maale la zie bare a yiri poɔ ko fo ane a fo bontanne.” 32A dɔɔ pãã da wa kpɛ la a yiri poɔ, ka Lɛban da lori a bontanne tuobu biŋ kyɛ da ko a dɔɔ kɛkɛrɛɛ ane moɔ ka o ko a bontanne. O da ko la a dɔɔ koɔ̃ ka o pɛge o gbɛɛ ane a noba naŋ tu o wa. 33Ba pãã da de la bondirii wa biŋ ka o di, kyɛ ka a dɔɔ da yeli, “N koŋ di ka maa ba yeli bon naŋ wa ne ma a kyɛ sɛre.” Ka a Lɛban yeli ko o, “Yele.”

34Lɛ la ka o pãã da yeli, “N waa la a Aboraham tontonɔ. 35A DAANA maale la a n neŋkpoŋ yaga zaa ka o leɛ bondaana. A DAANA ko o la peere, boore ane nii, salem-pelaa ane salema, gbaŋgba-dɔbɔ ane gbaŋgba-pɔgeba, bontanne ane bonni. 36A n neŋkpoŋ pɔge Saara dɔge la bidɔɔ ko o a o koroo poɔ, ka a Aboraham da de o boma zaa ko o. 37A n neŋkpoŋ da eɛɛ la ka N da pɔ a yeli, ‘N koŋ de a Keeina teŋɛ deme poɔ N naŋ kpeɛrɛ pɔgeyaa ko a o bidɔɔ ka o e o pɔge; 38ka kyɛ, N gaa a o saa yiri, a o noba poɔ, a te de pɔge a be wa ko a o bidɔɔ.’ 39N da soore la a n neŋkpoŋ, ‘Ka a pɔge ba wa sage ka o tu ma.’ 40#Piil 17:1 Ka o da yelsɔge ma, ‘A DAANA na N naŋ tuuro na toŋ la o maleke ka o wa laŋ ne fo a e ka fo sori e velaa. Fo na de la pɔge yi a n saa noba poɔ wa ko a n bidɔɔ. 41Ka fõõ wa gaa a n saa noba poɔ, a pɔre koŋ la tuuro fo ka ba naŋ ba sage ka ba ko fo a pɔge gba.’

42“N wa la a bulee ŋa zie a zenɛ, a wa puori a yeli, ‘DAANA woi, a n neŋkpoŋ Aboraham Naaŋmen, vɛŋ ka a sori N naŋ tu yɛlɛ kyɛŋ velaa! 43N are la kyɛ a bulee ŋa eŋɛ; vɛŋ ka pɔgsaraa zaa naŋ yi wa ka o ɔŋ koɔ̃ ka N yeli ko o, “Sɔroo la, ko ma a fo yuori poɔ koɔ̃ belãã ka N nyu,” 44ka o yeli ko ma, “Nyu, kyɛ ka N ɔŋ a mine ko a fo bontanne meŋ;” vɛŋ ka o e a pɔge a DAANA naŋ kaa-iri ko a n neŋkpoŋ bidɔɔ.’

45“A n teɛroŋ ŋa da naŋ ba le teŋɛ sɛre kyɛ ka a Rebɛka la lɛ te tuo o yuori o bɔgŋmane zu yi wa a bulee zie ka o ɔŋ koɔ̃. Ka N da sɔre o, ‘N sɔrɔ fo la, vɛŋ ka N nyu.’ 46A pɔgsaraa da togi la a o yuori yi a bɔgŋmane zu wieũ lɛ kyɛ da yeli, ‘Nyu, kyɛ N na ɔŋ la a mine ko a fo bontanne meŋ.’ Lɛ la ka N da nyu kyɛ ka o da ɔŋ eŋ a bontanne meŋ. 47#Piil 24:22 Lɛ la ka N da soore o, ‘Nembuo pɔgeyaa la fo?’ Ka o da yelsɔge, ‘A Nahɔ ane o pɔge Milka bidɔɔ Bɛtuwɛl pɔgeyaa la ma.’ N pãã da de la nyɔbaŋ eŋ o nyɔbogriŋ, a de nubaŋ eŋ o nu eŋɛ. 48N da suli la n zu teŋɛ a puori a DAANA, a n neŋkpoŋ Aboraham Naaŋmen kyɛ iri O yuori. A Naaŋmen ŋa la da de ma, a wuli ma a sori ka n da te nyɛ a n neŋkpoŋ dɔgrɔ pɔgeyaa ko a o bidɔɔ. 49A naŋ pãã ta a ŋaa, yɛ wuli a yɛ nɔmmo ane yelmennoŋ ko a n neŋkpoŋ. Ka a waa la lɛ bee ka a ba waa lɛ, yɛ yeli ko ma ka N leɛ bɔ ziyuo gaa gɔɔ bee doloŋ.”

50Lɛ la ka a Lɛban ane a Bɛtuwɛl da leɛ yeli, “A DAANA zie la ka a yeli ŋa yi, te kontoɔ̃ yeli yelzaa, ka velaa bee faa a poɔ. 51A Rebɛka la ŋa fo niŋeŋ, de o gɛrɛ ne, ka o te e a fo neŋkpoŋ bidɔɔ pɔge, aŋa lɛ a DAANA naŋ yeli.”

52A Aboraham tontonɔ naŋ da wa woŋ a ba yelbie, o da le vɔgle la muro a DAANA niŋesogɔ. 53A tontonɔ da iri la salem-pelaa ane salema peɛmɛ ane kparre ko a Rebɛka. O da ko la a pɔgsaraa yɔɔdɔɔ ane o ma boma daaroŋ naŋ ba wono. 54A Aboraham tontonɔ ane o taaba pãã da di la diibu kyɛ nyu kyɛ da gaŋ ka zie nyaa. Ba naŋ da wa iri a baguo saŋ la ka o da yeli, “Yɛ bare ma ka N leɛ gaa a n neŋkpoŋ zie.” 55Ka a Rebɛka yɔɔdɔɔ ane o ma da leɛ yeli, “Vɛŋ ka a pɔgsaraa be te zie belãã, aŋa bebie pie mine lɛ. A lɛ puoriŋ, o pãã na baŋ gaa la.” 56Ka a tontonɔ meŋ da leɛ yeli ko ba, “Yɛ ta vɛŋ ka N la kɔɔre, bonso, a DAANA eɛɛ la ka a n sori kyɛŋ velaa. Yɛ vɛŋ ka N leɛ gaa a n neŋkpoŋ zie.” 57Ka ba da leɛ yeli, “Te na boɔle la a pɔgsaraa a soore o nyɛ.” 58Ba da boɔle la a Rebɛka a soore o, “Fo na tu la a dɔɔ gaa be?” Ka o da yelsɔge, “N na gaa la.” 59Ba pãã da eŋ la a ba yɔɔpuulee Rebɛka ane o yaala sori ka ba laŋ ne a Aboraham tontonɔ ane o noba ka ba gaa. 60#Piil 22:17 Ba da yeli la nɔvelaa ko a Rebɛka a yele:

“Ka fõõ, a te yɔɔpuulee leɛ

noba turi turi ma;

ka a fo boorɔ zɔɔ a ŋma

a ba dɔndɔnne boma.”

61A Rebɛka ane o tonton-pɔgebilii da iri do zɔ̃ɔ̃ la a bontanne a tu a Aboraham tontonɔ. A tontonɔ pãã da taa la a Rebɛka gaa ne.

62 # Piil 16:14; 25:11 A Aizik da iri la a Bɛɛ-laha-royi teŋɛ a wa zeŋ a Nɛgɛb paaloŋ poɔ. 63A Aizik da yi te kyɛnɛ la weɛ poɔ zimaane saŋ, a wa kaara ka bontanne la te waana. 64A Rebɛka naŋ da wa kaara a nyɛ a Aizik, o da sigi la a bontaŋ zu wieũ zaa, 65a soore a Aboraham tontonɔ, “Aŋ la a dɔɔ na naŋ te kyɛnɛ tuoro te a weɛ poɔ?” Ka a tontonɔ leɛ yelsɔge, “A n neŋkpoŋ la.” Lɛ la ka a Rebɛka da de pɛne page o niŋe. 66A tontonɔ da manne ko la a Aizik lɛ a yɛlɛ zaa naŋ da kyɛŋ. 67#Piil 23:2 A Aizik pãã da taa la a Rebɛka wa kpɛ ne a o ma Saara sege poɔ. O da de la a Rebɛka ka o leɛ o pɔge, ka o da nɔŋ o. A ŋaa da maa la a Aizik suuri a yi a o ma kũũ eŋɛ.

Currently Selected:

Piiluu 24: DGA

Highlight

Copy