Piiluu 23
23
A Saara Kũũ Ane O Ũũmu Yɛlɛ
1A Saara da nyɛ la yuomo kɔɔ ane lezare ne ayopoĩ; a yuomo a Saara naŋ da nyɛ o nyɔvore poɔ la a lɛ. 2A Saara da kpi la a Kiriyat-arba (bee Hɛberɔn) naŋ be a Keeina teŋɛ poɔ. A Aboraham da gaa te maale la a o pɔge kuori kyɛ koŋ o. 3A Aboraham da bare la a o kũũ kyɛ da iri yeli ko a Hita noba: 4#Piil 17:8 “N waa la saana ane nɔɔraa a kpeɛrɛ yɛ poɔ. Yɛ ko ma n meŋɛ kuuni ũũmu zie ka N ũũ a n kũũ.” 5A Hita noba da yelsɔge la a Aboraham, 6“Neŋkpoŋ, kyɛlle woŋ te yɛlɛ; fo waa la nabikpoŋ te poɔ. Ũũ a fo kũũ zie na zaa fo naŋ boɔrɔ a te kuuni ũũmu zie. Te kanzaa koŋ pigi fo sori ka fo ta ũũ a fo kũũ zie na zaa fo naŋ boɔrɔ a kuuni ũũmu zie.” 7A Aboraham da iri te suli la o zu ne emmo a Hita noba naŋ e a teŋɛ na noba zie. 8O da yeli ko ba la, “Ka yɛnee wa sereŋ sage ka N ũũ a n kũũ, yɛ kyɛlle woŋ ma, yɛ sɔre a Ɛferɔn bidɔɔ Zoha, 9ka o ko ma a Makepela taŋ bogi naŋ e o soobo, a be a o weɛ pareŋ. Yɛ vɛŋ ka o pore a yɛ niŋeŋ lɛ o naŋ na koɔre a zie ko ma ka o e n kuuni ũũmu zie.” 10A Ɛferɔn da zeŋ la a Hita noba poɔ. A Ɛferɔn naŋ e a Hita neɛ da yelsɔge la a Aboraham, ka a Hita noba zaa naŋ da zeŋ a teŋkpoŋ dendɔre noɔre wono a yɛlɛ. 11“Ai, n neŋkpoŋ, kyɛlle woŋ a n yɛlɛ; N ko fo la a zie ane a taŋ bogi naŋ be o poɔ. N korɔ fo la a zie a n noba niŋesogɔ ka fo ũũ a fo kũũ.” 12A Aboraham pãã da suli la o zu ne emmo a teŋɛ noba niŋesogɔ. 13O da yeli ko la a Ɛferɔn ka a teŋɛ noba zaa woŋaa, “Ka fõõ na sage kyɛlle woŋ n yɛlɛ! N na ko fo la a zie daaroŋ libiri. Sage de a libiri ka N toɔ̃ ũũ a n kũũ a be.” 14A Ɛferɔn da leɛ yelsɔge la a Aboraham: 15“N neŋkpoŋ, kyɛlle woŋ; zie daaroŋ naŋ e salem-pelaa warebie kɔɔraanaare la boŋ maa ne fo zie? Te uuno a fo kũũ.” 16A Aboraham da sage la a lɛ a Ɛferɔn naŋ yeli. A Aboraham da sɔre la a libie noɔre a seŋ lɛ a Ɛferɔn naŋ da yeli, ka a Hita noba woŋ, salem-pelaa warebie kɔɔraanaare aŋa lɛ ba naŋ maŋ manne a daa poɔ.
17Lɛnso a Ɛferɔn weɛ naŋ da be a Makepela, a Mamere sapare seŋ, a weɛ na poɔ a taŋ bogi naŋ da be, ane a weɛ teere zaa 18da wa leɛ la a Aboraham soobo a Hita noba niŋesogɔ ane a noba zaa naŋ da wa a teŋɛ dendɔre noɔre. 19A ŋaa puoriŋ, a Aboraham da ũũ la a o pɔge Saara a Makepela weɛ taŋ bogi poɔ naŋ tori ne Mamere (a tɛgɛ la Hɛberɔn) naŋ be a Keeina teŋɛ poɔ. 20#Piil 25:9-10; 47:30; 49:29-30; 50:13 A weɛ ane a taŋ bogi naŋ be o poɔ da yi la a Hita noba nuuriŋ a wa leɛ a Aboraham soobo a e o kuuni ũũmu zie.
Currently Selected:
Piiluu 23: DGA
Highlight
Share
Copy
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.
