Ɛsta 9
9
Ba Naŋ Sãã A Gyuumine Dɔndɔnne
1A kyuuri pie ne ayi soba, naŋ e a Adar kyuu, a beri pie ne ata daare naŋ da wa ta, a saŋ a naa noɔre naŋ na tu a tuubu, a daare na a Gyuumine dɔndɔnne naŋ da teɛre ka ba na di la kpeɛ̃õ ba zu. Kyɛ a bebiri da leɛ la bebiri a Gyuumine naŋ leɛ di kpeɛ̃õ a ba dɔndɔnne zu. 2#Ɛst 8:17 A Gyuumine da laŋ la taa a ba tembɛrɛ poore a Naa Ahasurus paaloŋ lamboe zaa a na eŋ nuuriŋ banaŋ zaa naŋ boɔrɔ ba koobo. Neɛzaa da ba toɔ̃ are ne a Gyuumine gbɛɛ, bonso, a noba da zoro la ba dabeɛ̃. 3A naa tonton-nembɛrɛ naŋ kaara a naaloŋ tembɛrɛ, a tembilii zukaareba ane a gɔbena mine ane a naayiri tontonema zaa da tu la a Gyuumine ba naŋ zoro a Mɔdikaaya zuiŋ. 4A Mɔdikaaya kponnuŋ da ba poɔrɔ a naayiri poɔ. A Mɔdikaaya yuori da yaare la a naa paaloŋ zaa, a da duoro zu gɛrɛ. 5A naŋ da waa lɛ, a Gyuumine da ko la a ba dɔndɔnne zaa ne zɔɔzɔɔ-soɔ. Ba da kɔrre ba la, a sãã ba bare kyɛ e a banaŋ zaa naŋ kyiiri ba lɛ ba naŋ da boɔrɔ. 6A Suza nayikpoŋ poɔ, a Gyuumine da ko la noba kɔɔraanuu (500). 7Ba da ko la Pasandata, Dalefɔn, Asepata, 8Pɔrata, Adaliya, Aridata, 9Pamaseta, Arisai, Aridai, Vayizata, 10a Hɛman bidɔbɔ pie, a Hamedata yããmine, naŋ e a Gyuumine dɔndɔnne; kyɛ ba da ba fa ba boma.
11A lɛ daare zaa ba da yeli ko la a naa a noba ba naŋ ko a Suza nayikpoŋ poɔ seŋ lɛ. 12#Ɛst 5:6; 7:2 A Naa da yeli ko la a Pɔg-naa Ɛsta, “A Suza nayikpoŋ poɔ, a Gyuumine ko la noba kɔɔraanuu (500) ane a Hɛman bidɔbɔ pie meŋ. Boŋ ka ba e a naa tenne naŋ kyɛre a paaloŋ poɔ? Pampana, boŋ ka fo boɔrɔ? N na e ko fo la. Boŋ la ka fo boɔrɔ ka fo la sɔre poɔ? A na nyɛ la eebo.” 13Ka a Ɛsta yeli, “Ka a naa poɔ koŋ sãã, bieo, e ka ba sage ka a Gyuumine naŋ be a Suza poɔ meŋ e kyaare ne a zenɛ bege, a e ka ba leŋ a Hɛman bidɔbɔ pie yagle a daare naŋ ba zu.” 14Lɛ la ka a naa da tere noɔre ka ba e a lɛ; ba da sɛge la noɔre a Suza poɔ ka ba leŋ a Hɛman bidɔbɔ pie daseelɛ. 15A Gyuumine naŋ be a Suza poɔ meŋ da laŋ la taa a Adar kyuu beri pie ne anaare daare, a ko noba kɔɔraata (300) a Suza poɔ; kyɛ ba da ba fa a noba boma.
16A Gyuumine banaŋ naŋ yaare be a naa paaloŋ poɔ meŋ da laŋ la taa a na zɔɔ faa ba nyɔvoɛ, a nyɛ faabo yi a ba dɔndɔnne zie. Ba da ko la a banaŋ naŋ kyiiri ba noba turi lezaata ane pie ne anuu (75,000); kyɛ ba da ba fa a noba boma. 17A ŋaa da e la a Adar kyuu beri pie ne ata daare. Ba da pɛnne la a beri pie ne anaare daare, a de a bebiri ka o leɛ tigri ane popeɛloŋ bebiri.
Ba Naŋ Biŋ A Purim Tigri Pare
18A Gyuumine naŋ da be a Suza poɔ da laŋ la taa a beri pie ne ata ane pie ne anaare daare, kyɛ pɛnne a beri pie ne anuu daare, a de a bebiri ka o leɛ tigri ane popeɛloŋ bebiri. 19A lɛ zuiŋ, a Gyuumine naŋ be a tembilii poore ba naŋ ba mɛ dankyime gɔlle da de la a Adar kyuu beri pie ne anaare daare ka o leɛ popeɛloŋ ane tigri bebiri, a e pɛnnoo bebiri ba naŋ maŋ ko taa bondirii kyɔɔtaare.
20A Mɔdikaaya da sɛge la a yɛlɛ ama eŋ lɛtɛre poɔ tere ka ba te ko a Gyuumine naŋ be a Naa Ahasurus paaloŋ poɔ, banaŋ naŋ peɛle ane banaŋ naŋ be tɔɔre, 21a yeli ko ba, ka ba de a Adar kyuu beri pie ne anaare ane pie ne anuu daare, yuoni la yuoni zaa, 22ka a e bebie a Gyuumine naŋ da faa ba nyɔvoɛ a ba dɔndɔnne zie, a waa kyuu ba zubie naŋ leɛ popeɛloŋ, ka ba konni leɛ pɛnnoo. A Mɔdikaaya da yeli ka ba de a ka e tigri ane popeɛloŋ bebie ba naŋ na maŋ ko taa bondirii kyɔɔtaare, kyɛ ko a nandaanema meŋ kyɔɔtaare. 23Lɛnso, a Gyuumine da de la a yeli ŋa ba naŋ da piili ka ba e ka o leɛ ba teŋkoɔ̃-yɛlɛ a seŋ lɛ a Mɔdikaaya naŋ da sɛge ko ba.
24 #
Ɛst 3:7
A Hamedata naŋ da e Agag teŋɛ neɛ bidɔɔ Hɛman, a Gyuumine dɔndɔma da sɔgle boɛ la ka o ko a Gyuumine zaa pare page. O da lɔɔ la Pur (a Pur tɛgɛ la bie lɔɔbo) ka o bɔ nyɛ bebiri o naŋ na sãã ba bare; 25#Ɛst 9:14; 7:10 kyɛ a Ɛsta naŋ da wa a naa zie, a naa da sɛge la noɔre eŋ gane poɔ ka a faaloŋ na a Hɛman naŋ da sɔgle bo kyaare a Gyuumine leɛ do o meŋɛ zu, ka ba da leŋ o ane o bidɔbɔ yagle a daare ba naŋ da ba zu. 26A lɛnso ka ba boɔlɔ a bebie ŋa Purim (a yelbiri ŋa yi la Pur yelbiri poɔ). A yɛlɛ ama zaa naŋ da sɛge eŋ a gane poɔ, yɛlɛ naŋ da kyaare ba ane yɛlɛ naŋ da e ba zuiŋ, 27a Gyuumine da sage de la a bebie ama ka a e teŋkoɔ̃-yɛlɛ ko ba ane ba biiri ane banaŋ zaa naŋ laŋ ne ba. Ba na maŋ di la a bibie ama tigri yuoni yuoni zaa, a daŋ ta nage zaa, a seŋ lɛ ba naŋ sɛge ane a saŋ a naŋ wuli. 28A seŋ ka yɛ maŋ leɛ-teɛre a bebie ŋa yɛlɛ, a di a tigri ba dɔge-tu-taa zaa poɔ, yiri zaa poɔ, paaloŋ ane a teŋkpoŋ zaa poɔ. Yɛ tɔɔ daŋ wa zagra ka yɛ di a Purim tigri a bebie ama yuoni zaa poɔ bee ka a tigri ŋa diibu wa tɔgrɔ a yɛ biiri zie.
29A Pɔg-naa Ɛsta, a Abihel pɔgeyaa ane Mɔdikaaya, a Gyuu neɛ da sɛge la lɛtɛ ayi soba, naŋ wuli kpeɛ̃õ ba naŋ taa kyaare ne a Purim bebiri. 30Ba da sɛge la lɛtɛre ko a Gyuumine zaa naŋ be a Ahasurus paaloŋ tenne kɔɔ ane lezare ne ayopoĩ (127) poore ka ba taa laafeɛ ane emmaaroŋ, 31kyɛ tere noɔre ka ba maŋ di a Purim tigri a bebie na a Gyuu neɛ Mɔdikaaya ane a Pɔg-naa Ɛsta naŋ yeli ka a na e tuuruŋ ba naŋ biŋ ko bamenne ane ba biiri kyaare ne a nɔleŋ ane ba konni. 32A Pɔg-naa Ɛsta noɔre o naŋ da tere da biŋ la a Purim tigri yeltuuri ka ba sɛge eŋ gane poɔ.
Dagaare First Bible © The Bible Society of Ghana, 2025.