Ɛsta 8
8
Ɛsta Naŋ Faa A Gyuumine
1A lɛ daare, a Naa Ahasurus da de la a Hɛman naŋ e a Gyuumine dɔndɔma yiri ko a Pɔg-naa Ɛsta; a Mɔdikaaya da wa la a naa zie, bonso, a Ɛsta da yeli ko la a naa ka a Mɔdikaaya e la o boorɔ neɛ. 2#Ɛst 3:10 Lɛ la ka a naa fori o naaloŋ nu-fentere o naŋ de yi a Hɛman zie ko a Mɔdikaaya. A Ɛsta da de la a Hɛman yiri ko a Mɔdikaaya ka o kaara.
3A Ɛsta da laboreŋ yeli la yɛlɛ ko a naa; o da le la a naa niŋeŋ, a kono kyɛ sɔrɔ, ka o ta sage ka a Hɛman, a Agag teŋɛ neɛ teɛroŋ faa ane lɛ o naŋ bo kyaare ne a Gyuumine nyɛ eebo. 4#Ɛst 5:2 A naa da teɛ̃ la o salema daŋgbale tɔgle a Ɛsta, 5ka a Ɛsta vaa-iri are a naa niŋeŋ. A Ɛsta da yelee la, “Ka a naa poɔ wa pɛle ka N nyɛ nimimaaroŋ yi a naa zie, ka a yeli wa tori a naa zie, ka o sage ko ma, o e ka ba sɛge noɔre a luuri a yɛlɛ a Hɛman, a Hamedata bidɔɔ naŋ e Agag teŋɛ neɛ naŋ e ka ba tere noɔre ka ba ko a Gyuumine naŋ be a paaloŋ zaa poɔ pare page. 6Wola ka N na kaara a zubie ŋa naŋ waana n noba zu? Bee wola ka N na kaara n dɔgroŋ noba ka ba sãã ba bare?” 7Lɛ la ka a Naa Ahasurus yeli ko a Pɔg-naa Ɛsta ane a Gyuu neɛ Mɔdikaaya, “Nyɛ, N de la a Hɛman yiri ko a Ɛsta, kyɛ ka ba leŋ a Hɛman a daare zu, o naŋ da boɔrɔ ka ba ko a Gyuumine zuiŋ. 8Sɛge lɛ fo naŋ boɔrɔ kyaare ne a Gyuumine ne a naa yuori, a dii a naa nu-fentere o eŋɛ; bonso, ba kontoɔ̃ luuri noɔre ba naŋ sɛge ne a naa yuori a dii a naa fentere o eŋɛ.”
9 #
Ɛst 1:22
Ba da boɔle la a naa gansɛgrebɛ lantaa a lɛ saŋ, a kyuuri ata poɔ, naŋ e Sivan kyuu beri lezare ne ata daare. Ba da sɛgɛɛ la tere noɔre seŋ lɛ zaa a Mɔdikaaya naŋ yeli ka ba sɛge ko a Gyuumine ane a naaloŋ nembɛrɛ ane a gɔbena mine naŋ kaara a naaloŋ tembɛrɛ te tɔ a tembilii, a yi Indiya te tɔ Itopiya. Ba da sɛge ko la a paaloŋ tenne kɔɔ ane lezare ne ayopoĩ (127) zaa, teŋɛ zaa ne o gane ka ba da sɛge ne o sɛgebie ba kɔkɔre poɔ. Ba da sɛge ko la a Gyuumine meŋ ne ba sɛgebie ba kɔkɔre poɔ. 10A Mɔdikaaya da sɛge la a lɛtɛre ne a Naa Ahasurus yuori, a dii a naa fentere a eŋɛ, a de ko noba naŋ zɔŋ a naayiri wie naŋ zoro ka ba gaa ne a lɛtɛre. 11A lɛtɛre ŋa poɔ, a naa ko la a Gyuumine naŋ be a o paaloŋ tenne poore zaa sori ka ba maŋ lantaa a zɔɔ faa ba nyɔvoɛ. A naa ko ba la sori ka ba sãã, kyɛ ko noba zaa naŋ wa iri zɔɔrɔ ne ba ka ba ko ba pare page; a ko ba bibiiri, ane ba pɔgeba kyɛ fa ba boma 12a bebi-yeni na daare, a Naa Ahasurus paaloŋ zaa poɔ, a kyuuri pie ne ayi soba, beri pie ne ata daare naŋ e a Adar kyuu poɔ. 13Ba da toɔle la a lɛtɛ kaŋ ka ba te moɔle ko a paaloŋ tenne noba zaa ka a e bege. A Gyuumine da seŋ ka ba nare bamenne a zɔɔ ne a ba dɔndɔnne. 14Lɛ la ka a noba ba naŋ toɔle da zɔŋ a naayiri wie naŋ zoro yaga, a yi page wieũ gaa, a seŋ lɛ a naa naŋ yeli. Ba da sɛge la bege a Suza nayikpoŋ poɔ.
15A Mɔdikaaya da yi la a naa zie, a su nabi-boma naŋ e suuni ane pelaa, a vɔgle salema nazupili, a su kpar-kpoŋ naŋ e zeɛ ane pelaa, kyɛ ka a teŋkpoŋ Suza noba kyaara ne popeɛloŋ. 16Bonso, a Gyuumine zie, a da e la popeɛloŋ, kyelloo ane emmo. 17#Yiib 15:14-16 A paaloŋ tenne zaa ane a tembɛrɛ zaa a naa noɔre ane bege naŋ wa ta, popeɛloŋ ane kyelloo da maŋ be la a Gyuumine poɔ ka ba di tigri, a de bebiri pɛnne. A paaloŋ nemboorɔ yaga meŋ da yeli ka ba e la Gyuumine, ba naŋ da zoro a Gyuumine zuiŋ.
Dagaare First Bible © The Bible Society of Ghana, 2025.