Ɛsta 6
6
A Naa Naŋ Ko Mɔdikaaya Emmo
1A tensogɔ na daare, a naa da ba toɔ̃ gbiri, o da tere la noɔre ka ba taa a gane ba naŋ sɛge a yɛlɛ eŋ, a teŋkoreŋ yɛlɛ gane wa ne, a wa sɔre ko o. 2#Ɛst 2:21-23 Ba da sɔre la a zie na Mɔdikaaya naŋ da yeli ko a naa lɛ a naa dɔɔ-vare bayi naŋ da guuro a naayiri dendɔre, Bigitana ane Tɛrɛs, naŋ da boɔrɔ ka ba ko a naa Ahasurus. 3Lɛ la ka a naa da soore, “Boŋ emmo bee yeli la ka te e ko a Mɔdikaaya ne a yeli ŋa o naŋ da e?” Ka a naa tontonema naŋ tonɔ korɔ o yelsɔge, “Ba ba e yelzaa ko o.” 4#Ɛst 5:14 Ka a naa soore, “Aŋ la be a davoro poɔ?” A lɛ poɔ la ka Hɛman meŋ deɛ wa kpɛ a naayiri davoro poɔ ka o yeli ko a naa ka o na e ka ba leŋ a Mɔdikaaya daseelɛ a daare na o naŋ da e ka ba ba eŋɛ. 5Lɛ la ka a naa tontonema da yeli ko o, “Hɛman be la a davoro poɔ are.” Ka a naa yeli, “Yɛ e ka o kpɛ wa.” 6Lɛ la ka a Hɛman kpɛ wa, ka a naa soore o, “Boŋ ka te na e ko neɛ a naa naŋ boɔrɔ ka o ko o emmo?” A Hɛman da teɛre la o poɔŋ, “Nembuo ka a naa na boɔrɔ ka o ko emmo gaŋ maa?” 7Lɛ la ka Hɛman yeli ko a naa, “A dɔɔ a naa naŋ boɔrɔ ka o ko emmo, 8e ka ba wa ne a naa kparoo o naŋ daŋ su ane wiri o naŋ daŋ zɔŋ, ane nazupili o naŋ daŋ vɔgle. 9E ka ba de a kparoo ane a wiri wa ko a naa tonton-nembɛrɛ kaŋ naŋ taa yuori ka o su a dɔɔ a naa naŋ boɔrɔ ka o ko o emmo; a e ka o soba zɔŋ a wiri, ka o taa o yɔ ne a teŋkpoŋ lantaa ziiri, a de o weɛ̃, a moɔlɔ yele: ‘A ŋaa ka ba na maŋ e neɛ a naa naŋ wa boɔrɔ ka o ko o emmo.’ ” 10Lɛ la ka a naa yeli ko Hɛman, “Page wieũ de a kparoo ane a wiri gaa te e ko a Gyuu neɛ Mɔdikaaya naŋ zeŋ a naayiri dendɔ-kpoŋ noɔre aŋa lɛ fo naŋ yeli. Ta bare yelzaa fo naŋ yeli.” 11Lɛ la ka a Hɛman de a kparoo te su a Mɔdikaaya a e ka o zɔŋ a wiri, a de weɛ̃ ka a Mɔdikaaya zɔŋ a wiri tuuro, ka o de o yɔ ne a teŋkpoŋ lantaa ziiri, a moɔlɔ yele, “A ŋaa ka ba na maŋ e neɛ a naa naŋ boɔrɔ ka o ko emmo.”
12A lɛ puoriŋ, a Mɔdikaaya da leɛ gaa la a naayiri dendɔ-kpoŋ noɔre kyɛ ka a Hɛman leɛ wieũ zaa gaa o yiri, a kono kyɛ page o zu. 13A Hɛman naŋ wa yeli ko o pɔge Zɛrɛs ane o bamine bonna zaa naŋ e o, a o yelwulbo ane o pɔge da yeli ko o la, “Ka a Mɔdikaaya ŋa niŋe fo leebu naŋ piili wa e Gyuu neɛ, ka lɛ, fo kontoɔ̃ o, kyɛ fo sereŋ na le la o niŋeŋ.”
A Hɛman Leebu Ane Mɔdikaaya Zɛg-duobu
14 #
Ɛst 5:8
Ba naŋ da naŋ kyɛnɛ yele a yɛlɛ ne a Hɛman la ka a naa dɔɔ-vare la lɛ wa ta, a wa taa o wieũ gaa ne a tigri a Ɛsta naŋ maale zie.
Dagaare First Bible © The Bible Society of Ghana, 2025.