Ɛsta 5
5
A Ɛsta Tigri
1A beri ata daare, a Ɛsta da su la o pɔg-naa kparoo, a te are a naayiri davoro poɔ, a tori a naa kyaaraa. A naa da zeŋ la o naaloŋ kogi zu a naayiri poɔ a tori a davoro dendɔre noɔre. 2#Ɛst 4:11; 8:4 A naa naŋ deɛ wa nyɛ a Pɔg-naa Ɛsta ka o are a davoro poɔ, o da nyɛ la nimimaaroŋ yi a naa zie. A naa da teɛ̃ la a o naaloŋ salema daŋgbale naŋ be o nu poɔ tɔgle a Ɛsta. Lɛ la ka a Ɛsta gaa te seene a daŋgbale zu. 3A naa da soore o la, “Wola la, Pɔg-naa Ɛsta? Boŋ la ka fo boɔrɔ? N na ko fo la bon fo naŋ boɔrɔ, haali ka maa na poŋ a n naaloŋ ziiri ayi, a gba iri kaŋ ko fo.” 4#Ɛst 1:19 Lɛ la ka a Ɛsta yeli, “Naa, ka fo poɔ koŋ sãã, vɛŋ ka fõõ ane Hɛman wa a tigri N naŋ maala korɔ a naa zenɛ.” 5Lɛ la ka a Naa yeli, “Yɛ taa a Hɛman wa ne wieũ, ka te na e lɛ a Ɛsta naŋ boɔrɔ.” Lɛnso, a naa ane Hɛman da wa la a tigri a Ɛsta naŋ maale zie. 6#Ɛst 9:12 Ba naŋ da wa nyuuro dãã la ka a naa da soore a Ɛsta, “Fo yelboɔraa la boŋ? A na nyɛ la eebo ko fo. Boŋ la ka fo boɔrɔ ka fo sɔre? Haali ka a n naaloŋ kyɛlee gba la, a na nyɛ la eebo.” 7Lɛ la ka a Ɛsta yeli, “A bon N naŋ boɔrɔ ka N sɔre la ŋa: 8Ka maa wa nyɛ nimimaaroŋ yi a naa zie, kyɛ ka a pɛle a naa poɔ ka o ko ma bon N naŋ boɔrɔ, a sɔrɔ, vɛŋ ka a naa ane a Hɛman wa a tigri N naŋ na maale ko yɛ bieo. Lɛ la ka N pãã na yeli ko a naa bon N naŋ boɔrɔ.”
Hɛman Naŋ Nare Ka Ba Leŋ Mɔdikaaya Daseelɛ
9A lɛ daare, a Hɛman da yi la a pɔg-naa zie ne popeɛloŋ, kyɛ ka noɔ zaa erɛ o. Kyɛ a Hɛman naŋ da wa nyɛ a Mɔdikaaya a naayiri dendɔre noɔreŋ, a nyɛ ka o ba iri are bee a ko o emmo zaa, a Hɛman suuri da iri ne o la; 10kyɛ a Hɛman da nyɔge la o meŋɛ a kuli. O pãã da toŋ boɔle la o bamine ane o pɔge, Zɛrɛs 11a manne ko ba lɛ o bondaanoŋ naŋ ba poɔrɔ, o bidɔbɔ naŋ seŋ lɛ, ane lɛ a naa naŋ duori o kponnuŋ ka o do zuo a naa tonton-nembɛrɛ ane a naaloŋ tontonema zaa. 12A Hɛman da la yelee la, “Haali, a Pɔg-naa Ɛsta ba boɔle neɛzaa a tigri o naŋ maale zie, ka maa ne a naa yoŋ naane. Bieo meŋ, o la boɔlɛɛ maa ne a naa. 13Kyɛ a ŋaa zaa ba erɛ ma yelsoŋ zaa, N naŋ maŋ wa nyɛ a Mɔdikaaya, a Gyuu neɛ, ka o naŋ kyɛnɛ zeŋ a naayiri dendɔ-kpoŋ noɔre.” 14Lɛ la ka o pɔge Zɛrɛs ane a o bamine zaa yeli ko o, “E ka ba ba daare, ka a wogruŋ ta mitare lezare ne ayi, ka baguo saŋ ka fo yeli ko a naa ka o e ka ba leŋ a Mɔdikaaya daseelɛ a daa zu. Fõõ ne a naa pãã na gaa la a tigri zie ne ennoɔ.” A yelwuluu ŋa da pɛle la a Hɛman poɔ, ka o da e ka ba te ba a daare.
Dagaare First Bible © The Bible Society of Ghana, 2025.