Ɛsta 3
3
Hɛman Naŋ Boɔrɔ Ka O Sãã A Gyuumine
1A yɛlɛ ama puoriŋ, a Naa Ahasurus da duori la Hɛman ka o do zu zuo a o tonton-nembɛrɛ zaa naŋ be o zie. A Hɛman da wa la Hamedata naŋ da e Agag teŋɛ neɛ bidɔɔ. 2A naa tontonema zaa naŋ da be a naayiri dendɔ-kpoŋ noɔreŋ da maŋ gbi la dumo kyɛ puori a Hɛman ne emmo; bonso, a naa la da tere noɔre ka ba erɛ a lɛ korɔ o. Kyɛ Mɔdikaaya da zagrɛɛ la ka o gbi dumo bee a eŋ o. 3Lɛ la ka a naa tontonema naŋ da be a naayiri dendɔ-kpoŋ noɔreŋ da soore a Mɔdikaaya, “Bonso ka fo zagre a naa noɔre?” 4Ba naŋ da maŋ yeli ko o bebiri la bebiri zaa kyɛ ka o da ba kyɛllɛ, ba da yeli ko la a Hɛman a na nyɛ ka o na bare o la ka o naŋ erɛ a lɛ, bonso, a Mɔdikaaya da yeli ko ba la ka o e la Gyuu neɛ. 5A Hɛman naŋ da wa nyɛ ka Mɔdikaaya da ba maŋ gbi a dumo o niŋeŋ kyɛ eŋ o, a Hɛman suuri da iree la yaga. 6Kyɛ o da nyɛɛ la ka a koŋ seŋ o ka o ko a Mɔdikaaya yoŋ. Lɛnso, o naŋ da wa woŋ ka a Mɔdikaaya waa la Gyuu neɛ, a Hɛman da boɔrɔ la sobie o naŋ na tu kyɛ sãã a Gyuumine zaa, a Mɔdikaaya noba a Ahasurus napaaloŋ zaa poɔ.
7 #
Ɛst 9:24
A Nisan naŋ e a kyuu-dɛndɛŋ poɔ, a Naa Ahasurus naaloŋ yuomo pie ne ayi poɔ, ba da lɔɔ la Pur (a Pur tɛgɛ la bie lɔɔbo) a Hɛman niŋesogɔ a na bɔ a kyuu ane a bebiri, ka a bie le a kyuuri pie ne ayi beri pie ne ata daare, naŋ da e a Adar kyuu. 8Lɛ la ka Hɛman da yeli ko Naa Ahasurus, “Nemboorɔ mine naŋ yaare, kyɛ wɛle bamenne be la a fo paaloŋ tenne lamboe zaa. A ba begɛ e la a toɔraa ne a noba zaa begɛ, ka ba zagre ka ba tu a naa begɛ. Lɛnso, a ba tu sori ka a naa bare ka a lɛ erɛ. 9Ka a naŋ na pɛle a naa poɔ, o tere noɔre ka ba sãã ba zaa a paaloŋ poɔ, kyɛ N na yɔɔ la salem-pelaa warebie tur-pie (10,000) ko a banaŋ naŋ kaara a naa yɛroŋ ka ba de eŋ a naa yiri libie poɔ.” 10#Ɛst 8:2 Lɛ la ka a naa fori o nu fentere naŋ taa o yuori ko a Hɛman, a Hamedata naŋ yi Agag teŋɛ bidɔɔ naŋ da e a Gyuumine dɔndɔma. 11A naa da yeli ko la a Hɛman, “N bare la a libie ko fo ane a noba ka fo na e ba lɛ fo naŋ boɔrɔ.”
12 #
Ɛst 1:22
Ba pãã da boɔle la a naa gansɛgrebɛ lantaa a kyuu-dɛndɛŋ beri pie ne ata daare, ka ba sɛge lɛ zaa a Hɛman naŋ yeli ka ba sɛge. Ba da sɛge ko la a naaloŋ nembɛrɛ naŋ kaara a paaloŋ tembɛrɛ te tɔ a tembilii zu. Ba da sɛge la teŋɛ zaa gane ne a teŋɛ noba kɔkɔre. A Naa Ahasurus yuori eŋɛ la ka ba da sɛge ne a lɛtɛ kyɛ de a naa nu-fentere neɛ ne. 13Ba da toɔle la noba ka ba zo gaa a paaloŋ tenne zaa ne a lɛtɛre, a tere noɔre ka ba sãã kyɛ ko a Gyuumine zaa pabo bebi-yenaa, ba pɔlɔ ane ba neŋnyaŋne, pɔgeba ane bibiiri, a Adar kyuu naŋ e a kyuuri pie ne ayi, beri pie ne ata daare kyɛ faa ba boma. 14Ba da de la a lɛtɛ kaŋ tere ka o e noɔre ka ba moɔle ko a paaloŋ tenne noba zaa ka ba nare gu a bebiri na. 15Ba da moɔle la a naa noɔre ba naŋ sɛge a Suza nayikpoŋ poɔ, ka a noba ba naŋ toɔle ne a lɛtɛ gaa wieũ zaa. A naa ane Hɛman da zeŋɛɛ la ka ba nyu dãã, kyɛ ka a Suza nayikpoŋ zaa da be buriburi poɔ.
Currently Selected:
Ɛsta 3: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.