Ɛsta 2
2
Ɛsta Naŋ Leɛ Pɔg-naa
1A yɛlɛ ama puoriŋ, a Naa Ahasurus suuri naŋ da wa maa, o da leɛ-teɛre la a Vasti yɛlɛ ane a yɛlɛ o naŋ da e ane a noɔre ba naŋ biŋ kyaare ne a pɔg-naa. 2Lɛ la ka a naa tontonema naŋ da maŋ tonɔ korɔ o yeli, “Vɛŋ ka ba bɔ pɔgsar-veɛle naŋ e bitorri wa ko a naa. 3Vɛŋ ka a naa kaa-iri noba a napaaloŋ lamboe zaa ka ba laŋ a pɔgsar-veɛle naŋ e bitorri lantaa a Suza nayikpoŋ poɔ, a e ka a naa dɔɔ-varaa Hegai naŋ kaara a pɔgeba zu; a e ka ba ko ba peɛmɛ boma. 4A pɔgsaraa na a naa poɔ naŋ wa pɛle ne na leɛre la a Vasti zu a e a pɔg-naa.” A yeli ŋa da pɛle la a naa poɔ ka o da e a lɛ.
5 #
1 Sam 14:51
Gyuumine dɔɔ kaŋ naŋ da e a Bɛngyamen boorɔ neɛ ka o yuori di Mɔdikaaya da be la a Suza nayikpoŋ poɔ. O da e la Gyae bidɔɔ, a Simeyi bidɔɔ ane Kis bidɔɔ. 6#2 Nam 24:15-16 O da poɔ la Gyeruzɛlɛm noba a Baabilɔn Naa Nɛbukanɛza naŋ da fere-nyɔge laŋ ne a Gyuda naa Gyɛkoniya gaa ne a Baabilɔn teŋɛ. 7#Ɛst 2:15 A Mɔdikaaya la da guoli o saa yɔɔ pɔgeyaa Hadasa ka o yuori kaŋ e Ɛsta, bonso, o da ba taa saa bee ma. A pɔgsaraa da e la zeɛ kyɛ veɛlɛ. A o saa ane o ma naŋ da wa kpi, a Mɔdikaaya da de o la ka o e ŋa o meŋɛ pɔgeyaa. 8Ba naŋ da wa moɔle a naa noɔre o naŋ tere ka pɔgesarre yaga wa lantaa a Suza nayikpoŋ poɔ a Hegai nuuriŋ, ba da taa la a Ɛsta meŋ wa ne a naayiri poɔ a wa eŋ a Hegai naŋ da kaara a pɔgeba zu nuuriŋ. 9A Ɛsta da pɛle la a Hegai poɔ ka o da wuli o nɔmmo, a page wieũ zaa ko a Ɛsta a boma ba naŋ da de peɛ ne o eŋɛ ane bondirii. A Hegai da ko o la tontombi-pɔgeba bayopoĩ o naŋ da kaa-iri a naayiri pɔgesarre poɔ, a taa o ne a tontombi-pɔgeba kpɛ ne a pɔgeba yiri zi-velaa. 10A Ɛsta da ba wuli ba o noba bee dɔgroŋ, bonso, a Mɔdikaaya da yeli ka o ta vɛŋ ka ba baŋ. 11Bebiri zaa, a Mɔdikaaya da maŋ te kyɛŋ tɔle la a pɔgeba yiri davoro niŋe a na baŋ a Ɛsta emmaaroŋ yɛlɛ ane bon naŋ erɛ o.
12Ba da sɔ la a pɔgesarre kãã-nyunoɔ kyuuri ayoɔbo, a sɔ ba turaali meŋ kyuuri ayoɔbo. Ba naŋ da peɛ a pɔgesarre ŋa enne ne kããnyu-noore ane turaali kyuuri pie ne ayi puoriŋ a seŋ lɛ a ba yeltuuri naŋ wuli, a saŋ da taɛ la ka a pɔgesarre kanzaa maŋ kpɛ a Naa Ahasurus zie. 13Ka a pɔgesarre wa yire a pɔgeba yiri gɛrɛ a naa zie ba maŋ ko o la bonzaa o naŋ boɔrɔ ka o taa gaa ne. 14O maŋ kpɛ la a naa zie zimaane saŋ kyɛ leɛ yi baguo saŋ wa a pɔgeba yie ayi soba poɔ a naa dɔɔ-varaa Saasegaz zie. Ona la da kaara a naa pɔg-kpɛglɛ zu. Pɔgsaraa zaa a naa poɔ naŋ wa pɛle ne, o maŋ tere la o yuori ka ba boɔle o, ka lɛ naane, a pɔgsaraa ba la leɛ kpeɛrɛ a naa zie.
15A naŋ da wa ta a Ɛsta naŋ e a Mɔdikaaya saa yɔɔ Abihel pɔgeyaa, o da kpɛ la a naa zie. A Mɔdikaaya da de la Ɛsta ka o e ŋa o meŋɛ pɔgeyaa. A Ɛsta da ba sɔre bonzaa ka lɛ a naa dɔɔ-varaa Hegai naŋ da yelwuli o naane. Neɛzaa naŋ da maŋ wa nyɛ a Ɛsta, o poɔ maŋ pɛle ne o la. 16Ba naŋ da wa taa a Ɛsta kpɛ ne a Naa Ahasurus zie a naayiri poɔ, a kyuuri pie naŋ da e a Tebɛt kyuu, a naa naaloŋ yuomo ayopoĩ poɔ, 17a naa da nɔŋ la a Ɛsta gaŋ a pɔgeba zaa. A pɔgesarre naŋ da e bitorri zaa poɔ, o naŋ da pɛle a naa poɔ ka o wuli o nɔmmo. A naa da de la a pɔg-naa nazupili vɔgle a Ɛsta ka o leɛre a Vasti zu a leɛ pɔg-naa. 18A naa da maale la tig-kpoŋ ko a o tonton-nembɛrɛ ane o tontonema zaa, a yeli; “A Ɛsta tigri la.” A naa da ko la a o naaloŋ teŋɛ noba zaa pɛnnoo bebiri kyɛ ko ba na-kyɔɔta-boma.
Mɔdikaaya Naŋ Faa A Naa Nyɔvore
19Ba naŋ da wa e ka a bitorri wa lantaa a boyi soba, Mɔdikaaya da zeŋ la a naa dendɔ-kpoŋ noɔreŋ. 20#Ɛst 2:10 A Ɛsta da ba e ka ba baŋ o noba bee o dɔgroŋ, bonso, o da tu la lɛ a Mɔdikaaya naŋ yeli ka o e. A Ɛsta da sage la a Mɔdikaaya noɔre aŋa a saŋ a Mɔdikaaya naŋ da kaara o zu. 21A bebie na poɔ, Mɔdikaaya naŋ da maŋ wa zeŋ a naa dendɔ-kpoŋ noɔreŋ, a naa dɔɔ-vare bayi, Bigitan ane Tɛrɛs naŋ da guuro a naa dendɔre poore da sããɛ la ka ba da bo ka ba sɔgle ko a naa Ahasurus. 22Kyɛ Mɔdikaaya da wa baŋ ne la a yɛlɛ, a da te yeli ko a Pɔg-naa Ɛsta ka o da yeli ko a naa ka Mɔdikaaya la yeli. 23#Ɛst 6:1-2 Ba naŋ da wa peɛre a yɛlɛ nyɛ ka a waa lɛ, ba da leŋ la a dɔbɔ bayi ŋa daseelɛ daare zu. Ba da sɛge la a yɛlɛ ŋa a naa niŋesogɔ eŋ a naaloŋ gane poɔ.
Currently Selected:
Ɛsta 2: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.